Esporo (okunanula omubiri) yakaba nyinja ku woyo changwe yakakubera mbi. Byarhengerera na bichi oli washarha, gurhe onasharha, na kangana gurhe onasharha.

•  Echinja ch’Esporo chili chihe?

•  Echibi chayo chili chihe?

•  Ebi aby’eyenyu misole enaderha

 Okujira Esporo nako kuli omu byakarhuma wagwarha amagala menja. Ebiblia eyemerere “ok’okunanula omubiri kuherhe akamaro.” (1 Timothy 4:8, Amahugulo m’efo) “Okujira Esporo eli njira nzibu-zibu yakarhuma wayorha oyanguhire,” k’omurhabana mpu ye Ryan wa myaka 27 aderhere. “Kuli kwinja bwenene kulusha okufi yorha omu nju oli washarha e jeux.”

 Okujira Esporo kwakayongera obuhashe b’okukola n’abandi, n’okuchigalula. Ebiblia ekoleseze omufano gw’esporo omu kuyigiriza ewazo linja. Ederhere: “Abali balibirha omu mulindi boshi banalibirha, aliko muguma yenyine yenahabwa oluhembo.” Kandi ederhere: “Buli yeshi oli omu nteego ndebe anachigalula omu bintu byoshi.” (1 Wakorinto 9:24, 25) Bichi birhuyigirize? Oku bihemere okuchigalula n’okuyunvikana n’abandi y’omuntu agala kukenga amakanuni m’enteego (competition). Omunyere muguma wachibiruka mpu ye Abigail wa myaka 17 abiyemerere. Aderhere, “Okusharha omu nteego, kwanyigirize obulyo b’okuyunvikana n’okuganira n’abandi.”

 Okusharha omu nteego kwakarhuma omuntu agwarha abera. Esporo enahira abantu haguma. “Hofi buli masharha maba eyi mali mw’obuko bulebe bw’enteego, aliko nk’ohanzize wamasharhako omu kuli nka kuchisimisa konyine, eli njira nyinja y’okuchihira oku bandi.” Ku murhabana muguma mpu ye Jordan aderhere.

 Bichi onasharha. Ebiblia ederhere: “Yehova anasuzuma omunyakunali n’omubi konako; anashomba na buli yeshi osima obubandi.”​—Zaburi 11:5.

 Hali esporo ziba zibonekene oku z’obubandi. Omufano, Munyere muguma mpu ye Lauren aderhere ntya: “Omuhigo gw’amasharha g’amangumi (box) kuli kushurha abandi hoshaho. Rhwewe nka bakristu, rhunayaka eby’entambala, sasa si nka gurhe rhwakaja rhwachisimisa omu kulola gurhe abandi yi badibikana?”

 Eby’okuwaza ko: Wachigerere kuderhera bwinja masharha malebe m’obubandi, wamalolereko, changwe wenyine wamasharhako, ey’oli wawaza mpu bula masharha konyine marhakarhuma wakola eby’obubandi si? Akaba ntyo oyibuke oku Zaburi 11:5 ederhere oku Yehova anayanga abantu “banasima obubandi,” arhali mpu abantu banajira obubandi.

 Gurhe onasharha. Ebiblia ederhere: “Intacho mujirage n’entambala changwe n’okulonza kuchihir’embere, s’ahubwe oku bwirhohye, mubone abandi oku babalushire.”​—Wafilipi 2:3.

 Omu bukweri, masharha mali mw’ebigusho bihangene (bihidikene, bihigizene) mali mw’obuchilwira buguma ntya. Aliko eroho ly’okusima kuhimana mu buli choshi linaja lyakomera eyi murhanachili omu masharha. “eroho ly’okuhidikana lyakazinda lyanakujamo buzira kulegama. Ok’oli omu masharha, k’onakwanene ochihangane kukuza obwirhohye.” K’omunyere muguma mpu ye Brian aderhere.

 Eby’okuwazako: Murhabana muguma oyirikirwe Chris aderhere, “Rhunasharha akabumbu buli boso, aliko haba n’ebibi binayinja byabamo.” Chechirhumire ochibaze, ‘Bichi biguma byakarhuma ebibi byahanza byarhengerera bwenene? Gurhe nakajira omu kuhalira omu kuntu y’ebibi birhahanza byarhengerera?’

 Kangana gurhe onasharha. Ebiblia ederhere: “Murhegere ebintu by’akamaro bili bihe.”​—Wafilipi 1:10.

 Okwanene kupanga eby’okwanene kuhir’embere; ebintu by’ekiroho by’ebikwanene kuba birhanzi. Amashara amanene makarhola bisanzi binene, obe oli wamasharha mo changwa kufa kumalola ko. “Nagendaga nazigana kukorogana na mama eju y’ebisanzi nagezeze eyindi nalola amasharha oku Televiziyo n’obola byaliri bisanzi byakakolesezwe omu bindi.” K’omunyere mpu ye Daria aderhere.

 Eby’okuwazako: K’onayunviriza ey’abazere bawe bakuhanula oku bilolere eby’okwanene orhangirire ko? Omunyere muguma mpu ye Trina aderhere ntya: “Eyi nyono, bene-berhu na basheje berhu rhwaheza bisanzi binene omu kulola amasharha oku Televiziyo n’okufunda kujira ebintu by’akamaro, mama anarhuyibusa oku abola bajuwere bowe balipwa rhubalole-rhurhabalola. ‘Sasa si nenyu nde wabalipa?’ kw’anaja arhubaza. Ahola ebi aliri arhuyereka bili by’ebila: abajuwere bakala baherhe akasi. Sasa rhukaja rhulekerera edevware zerhu n’ebindi rhukwanene kukola, ahola eyi ntacho nji rhwachimalira omu mango mayinjire. Ahanene mama aliri arhuyereka ok’okulola changwa okujira amasharha arhali ch’echintu chikwanene kuba ch’akamaro omu kalamo kerhu.”