“Myaka migeke egerere ntalirhulerere bulala naliri nahurana ebibazo binene bya buli lusiku. Mw’ebyola bihe nalichiyunvirhe nka nakachiniga. Aliko ntalisimire kufa. Nalisimire amalibuko mahwe.”​—Jonathan, ogwerhe myaka 17.

 Omu buchunguzi bwajirwaga hano hofi omu banafunzi 14 000 b’amasomo makulu (segondere), muguma ku barhano aliri awaza bwenene kuchiniga omu myezi 12 yamagera.  aNk’obwene kw’akalamo kamakugamba, bichi wakajira?

•   Lindira. Ochihangane orhashumikwaga kurhola esimikiro jubajuba. Chiro akaba ebibazo byawe bikomere, hali enjira zakagurhabala ogale kulembera.

 Wakachiyunva nka wahwererwe na ntacho wakachigala kujira. Aliko okuntu oliwachiyunva arhali mpu b’obukweri. Hali enjira yakakurhubala olembere echibazo oliwahurana nacho kugerera oburhabazi, wakapata echirhulirizo orhali wazize.

•  Akanuni k’Ebiblia: “Rhusindagizwe bwenene enyunda zoshi, aliko rhurhananizizwe omu kuntu rhurhakagala kuchishaganya; rhwahwererwe aliko arhali loshi loshi mpu rhubule gurhe rhwakachikula.”​—2 Wakorinto 4:8.

   Ebi wakajira: Akaba amawazo m’okuchiniga magenderere, lonza bichi byakakurhabala. Omufano, wakahamagala enimero y’etelefone enarhabala abanalonza kuchiniga changwa wakalonza oburhabale bwa jubajuba oku bitaro. Ahola haba abantu bayigirizwe kurhabala, na kweri balonzeze kukurhabala.

•   Ganira n’owindi muntu. Hali abantu bakulagireko banalonzeze kukurhabala. Abola bali mw’abera bawe, abantu b’omulala, barhakamenya ebikuhangayisize akaba orhababwirire.

 Bantu baguma baba bakenere amaneti yibabona ebintu bwinja. Konokola omwira akakurhabala kubona ebibazo byawe bwinja wanashuba gwarha inyifinjo y’okulama.

•  Akanuni k’Ebiblia: “Omwira w’okuli . . . ali muntu w’aburhirwe omu kurhabala omu mango m’emilago.”​—Mezali 17:17.

   Ebi wakajira: Omu kurhondera enganiro, wakaderha ntya: “Hamagera esiku yimperhe amawazo mabi. Hali echibazo si nka nkubwirire okubili?” Changwa wakaderha ntya: “Mperhe ebibazo ntakamala nyenyine. Wakantabala si?”

•   Ojibonana na mungaga. Ebibazo by’amagala, nk’okuvunika omurhima changwa Obulwala b’okugwarha emilago omu bwenge, byakarhuma omuntu aheza enyifinjo z’okulama. Echisimisize kuli kuyunva okw’ebyola bibazo byakahwa.

 Nkw’okwe ebichurane byakarhuma waheza eapeti y’okulya, konokola emilago yomu bwenge yakarhuma waheza enyifinjo y’okulama. Ezola ndwala zombi zakabukwa.

•  Akanuni k’Ebiblia: “Abantu bagwerhe amagala menja barhaja emwa munganga, aliko abalwere baba bamukenere.”​—Matayo 9:12.

   Ebi wakajira: Oyinje waja ero bwenene, ojire esipore, oyinje walya ebilyo by’okuyumbaka omubiri. Okuntu amagala mali kwakarhuma wagwarha amawazo menja changwa mabi.

•   Esala. Ebiblia ederhere oku Omulemi werhu “ali mukulu kulusha emirhima yerhu anayinji byoshi.” (1 Yohana 3:20) Bulagurhe orhakaganira naye omu sala zene? Okolese ezino lyage, Yehova, onamubwire byoshi bili oku murhima gwawe.

 Hali emilago eba elemerere omu kuntu omuntu yenyine arhakayigala. Omulemi, wawe, Yehova, alitayari kukurhabala.

•  Akanuni k’Ebiblia: “Mumenyese Mungu ebi muhunire; n’omurhula gwa Mungu guchubukire byoshi omuntu akagala kuyunva, gw’alanga emirhima yenyu n’enkengero zenyu.”​—Wafilipi 4:6, 7.

   Ebi wakajira: Y’omala kubwira Yehova emilago yawe, waza chiro oku chintu chinja wakamubwirako koko olola lusiku. (Wakolosai 3:15) Eshukrani yakakurhabala ogwarhe amawazo menja oku bilolere akalamo.

 Akaba orhachigwerhe enyifinjo y’akalamo, oheme oburhabale. Jonathan rhwashambalagako burhanzi alijirire ntyo: “Nalikenere nganire bwenene n’abazere bani nampate oburhabale bwa munganga. Aliko mperhe nachiyunva bwinja zene, chiro akaba kw’emilago y’akalamo erhazihwa, ntachili nalwisa amawazo m’okulonza kuchiniga.”