Hali amango bantu baguma omu bakozi Mungu bakachibwira ok’okulama nk’okw’amakanuni me Biblia maderhere, byakahema ebisanzi na bushiru bunene. (Zaburi 73:2, 3) Bakahwanza kukola ebintu bipingene n’amarhegeko ma Yehova na ntyo banagoseza ababo Bakrisu omu kubisha engeso zabo zibi.

 Ogula mwazi guyandikirwe omu kurhabala balala boshi babishire okuntu bali aliko banalonzeze kuleka enjira zabo zibi.

Ku bunola bukurasa, rhwabona ebila bibazo

•  Okulama Akalamo ka shusho ebiri k’okuderha gurhe?

•  Okulama akalamo ka shusho ebiri kwakanjira muntu mubi si?

•  Gurhe nakaleka kulama akalamo ka shusho ebiri?

•  Eby’eyenyu misole enaderha

 Okulama akalamo ka shusho ebiri k’okuderha okw’amango oli haguma n’abarhakenga Yehova, wanakola ebintu omenyere oku bili bibi; aliko amango oli haguma n’abenyu bakozi ba Yehova wanakola nk’oli mukozi wa Yehova. Ahola byanaboneka ok’oli walama akalamo ka shusho ebiri, eyi na buli shusho likwanene liyambale akatambara k’okuchibisha.

 “Amango oherhe eshusho ebiri, wanaba ey’obishire chintu chilebe kw’ezola shusho zombi, na ntyo ntaye wakamenya obumuntu bwawe. Omu kuderha okuli, akalamo ka shusho ebiri kanakoza eshoni.”​—Erin.

 Walimenyere si? Akalamo ka shusho ebiri kahebere mw’ebintu onakola woyo wenyine bwibisho ey’onamenyere oku bigayisize Yehova.

 “Amango nyeneza myaka 14, nahwanza kulola amafoto m’epornografi oku site oku Enternete. Eyi nakabere haguma n’abandi nanayerekana oku ngayire epornografi, aliko omu bukweri, omu murhima eyi ntayigayire.”​—Nolan.

 Akanuni k’Ebiblia: “Ntaye wakagala kukolera bami babiri; bulala agaya muguma anasima owindi, changwa achishwekera ku muguma n’okusuzagura owindi.”​—Matayo 6:24.

 Arhali mpu mpaka ntyo. Kweri, bantu baguma bachishogere okurhalama nk’okw’amakanuni m’Ebiblia maderhere. Nawe ntyo ku binali si? Changwa hali mpanvu nka:

•   Okuyubaha kuba tofauti n’abenyu b’emyaka.

•   Okuba ogwerhe binene okolera haguma n’abenyu banafunzi kulusha eby’okola n’ab’omu chibaga chawe.

•   Okuchiyunva nka nta misi n’obuhashe ogwerhe b’okukulikira amarhegeko ma Mungu.

 “Mbwazize oku misole miguma elamire akalamo ka shusho ebiri enachiyunva bwinja haguma na balala barhakenga amakanuni ma Mungu bulala bakakola buli choshi balonzeze.”​—David.

 Okuderha okuli, nta mpanvu chiro na nguma mw’ezila eyemererwe yakakuha orozo l’okulama akalamo ka shusho ebiri. Che chirhumire birhurhabere kufasiriya nka gurhe abantu benja nabo bakarhebekwa. Akaba echola chakuhikire, gurhe wakajira?

1.  1. Owaze okuntu akalamo kawe kali zene. Ochibaze: ‘Okula ndamire, kundonzeze si? Akaba arhali ntyo, ebi nachishogere ngahe byakangeza?’

    Akanuni k’Ebiblia: “Omuntu mwenge anabona obuhanya . . . , aliko echihwinja chowe chanagendera, nantyo chanachibonera engaruka.”​—Mezali 27:12.

2.  2. Obe wazi. Ganira n’abazere bawe oku bilolere ehali yawe changwa na mwira wawe okulire ekiroho onakengere amarhegeko ma Yehova. Hali oku bakachiyunva basimire bulala wabahemere oburhabale. Kandi bachishingira woyo okubona osimire kukola ebintu binja!

    “Okuyemera amagosa mani abandi bali banyereka chaliri chiguma omu bintu byalinkomerere kujira, aliko amango najaga nayemera, nayunva ntulerere.”​—Nolan.

    Akanuni k’Ebiblia: “Onabisha amagosa mage arhayunguka, aliko onamahungama n’okumaleka ayerekwa obubabale.”​—Mezali 28:13.

3.  3. Oyemere ebyakakuhikira. Oyibuke, akaba hali echintu wabishire abazere bawe changwa echibaga chawe echola chakarhuma bafunda kukunihira. Na ntyo, abazere n’abashamuka b’echibaga bagwerhe obushobozi b’okukulahiza kujira chintu chilebe. Oyemere ebyakakuhikira, onahigirire kuchigendesa oku “bwimana omu bintu byoshi” kurhonderera mw’akola kasanzi.​—Waebrania 13:18.

    Akanuni k’Ebiblia: “Yunviriza empunulo onayemere obuhane, y’ogwarha obwengehe omu mango mayinjire.”​—Mezali 19:20.

4.  4. Okomeze obwemere bwawe oku buzigire Mungu akugwerheko. Bulala Yehova anarhusima, anayinji bwinja buli choshi rhunajira. Nantyo, akaba olamire akalamo ka shusho ebiri, amenyere, binamugayisa. Naho, aherhe enyorha nenen y’okukurhabala ohindamule ebijiro byawe bibi ‘bulala akulagireko.’​—1 Petro 5:7.

    Akanuni k’Ebiblia: “Amasu ma Yehova mali mazunguluka oku gulu lyoshi y’ayerekana emisi yage ku balala baherhe omurhima guyenere kuye.”​—2 Mambo ya Nyakati 16:9.