EMISOLE ENABAZA
Gurhe Nakalwisa Akahinda Amango Namafisa?
Oherhe omwira changwa omuntu w’omulala ochizinda kufa? Akaba ntyo, ogula mwazi gwakurhabala olembere echola chibazo.
M’ogula mwazi rhwabona:
K’anyunvirhe akahinda kanene?
Ku baguma, amango bamafisa omuntu banayunva kahinda kanene bwenene, ka kanalegama.
“Nta lusiku lugera buzira kuwaza ku shokulu. Chiro akaba hamagera myaka ebiri afire, binankomerera kuganira eju yage buzira kulira.”—Olivia.
“Mugaka alitambere bwenene mpikire emihigo yani, s’aliko arhalamaga bwenene omu kuntu abone gurhe nayihikira. Binanduma bwenene okubona arhachibonaga oku malehe g’emihigo yani.”—Alison.
Okola kufisa kwakarhuma omuntu achiyunva kubi bwenene. Omufano:
“Amango eshe weba wa mwali-werhu mukulu afa, byalindumire bwenene oku murhima. Obola b’obwaliri burhanzi nafisa omuntu nkomerene naye bwenene, nachiyunva nka train ehekere emizigo ye yamankonga.”—Nadine.
“Naliyunvirhe oburhe amango shokulu afa, bulala arh’aliri ashishikala amagala mage chiro akaba oku rhwalimubwirire ajire ntyo.”—Carlos.
“Nyono na mwali werhu, rhwenyine omu bantu b’Omulala ba hofi hofi rhurhageraga okuchilio cha shokulu. Oku buzinda, nalichiyunvire kubi bwenene bulala ntabonaga akasanzi koku ganira naye embere afe.”—Adriana.
“Mulume muguma na mukage baliri bera bwenene n’omulala gwerhu balifire omu agisida y’omutugari. Enyuma waho, eyi nakabwene omuntu w’omulala arhenga ahambuga nanayunva obuba oku naye afa.”—Jared.
“Hamagera myaka esharhu mugaka afire, nachiganya bwenene kubona ntagezaga ebichanji haguma naye achili mugumaguma.”—Julianna.
Amalumwa, oburhe, okuchiyunva kubi, obuba, n’amaganya, abantu banazigana kuchiyunva ntyo amango bamafisa. Akaba wachigerere kuyunva chiguma mw’ebyola, ochizere oku byoshi byahwa hano hofihofi. Omu kulindira amola mango mahike, Nka gurhe rhwakagala kulembera akola kahinda?
Gurhe nakalwisa akahinda indi nayunva?
Obwire mwira wawe okuntu oli wachiyunva. Ebiblia ederhere ok’omwira w’okuli “ali mwene wabo w’omuntu wamaburhwa umu mango m’omugayo.” (Mezali 17:17) Amango rhamabwira omuntu okuntu rhuli rhwachiyunva kwakarhurhabala rhupate oburhabale rhukenere.
“Kurhali kubi okuyunva akahinda. Mango maguma wakalira ey’onali wenyine, s’aliko wakahwanza kuwaza oku ebintu birhakahindamuka haban’akatyu; che chirhumire kuli kwinja okuganira n’owindi muntu.”—Yvette.
Oyibuke omuzigirwa wawe. Ebiblia ederhere ntya “omuntu mwinja ajira ebintu binja abikire omu omurhima gwage.” (Luka 6:45, Easy-to-Read Version, 1992) Wakayandika omu karne kawe ebintu binja oyibukire oku bimulolere.
“Nava narhola esimikiro y’okuyandika byoshi mwira wani ambwiraga embere afe, n’echola chantabala chiyunve nkachili haguma naye. Okubiyandika kwantabala ndembere olufu lwage.”—Jeffrey.
Oshishikale amagala gawe. Ebiblia eyerekene akamaro k’okujira esiporo. (1 Timoteo 4:8) Ochizere ok’oli walya bwinja, oli wajira esiporo, n’okuhumuka bwenene.
“Akahinda kakarhuma obwenge bwerhu burhaba haguma, bobola ochihangane buli mango kugwarha amagala menja. Che chirhumire, arhalahiraga kulya n’okulyama bwenene.”—Maria.
Orhabale abandi. Ebiblia ederhere: “Hali busime bunene omukahana kulusha obuba omu kuhaabwa.”—Matendo 20:35.
“Ochihagane kujirira abandi bantu echintu chinja, ahanene kubalala bafisize kuguma nawe. Echola chakakuyibusa oku abandi nabo bali balibuka.”—Carlos.
Oderhe omu sala okuntu oli wachiyunva. Ebiblia eyereneke oku Yehova aba “Munviriza w’esala.” (Zaburi 65:2) Kandi eyerekene oku Yehova “anafumya balala boshi bavunikire omurhima, anarhuba ebihulu byabo.”—Zaburi 147:3.
“Oheme Yehova emisi n’oburhabale okenere. Hali esiku zakaba zikomere kulusha ezindi, aliko Yehova ali haguma nerhu amango moshi.”—Jeanette.
Ogwarhe obulangalire bukwanene. Orhayibagiraga oku buli muntu anayerekana akahinda kage kwage-kwage amango amafisa. Ebiblia eyerekene oku Yakobo “agenderera kulahira kurhulirizwa” amango alema awaza k’omugala afire. (Mwanzo 37:35) Bobola orhasomerwaga amango amalumwa mawe mali magenderera.
“Hali amafoto mananyinja omu bwenge mananyibusa nyama mukulu, chiro akaba hamagera myaka 15 afire.”—Taylor.
Banka wawaza amango w’omavunika egufa. Byakaluma bwenene, byakanarhola ebichanji binene y’ofuma. Mw’ebyola bihe abanganga bakakuha empanulo yakakurhabala ohikire kufuma.
Konokola ku binaba oku muntu ogwerhe akahinda k’okufisa omuzigirwa wage. Bihemere ebichanji yachiyunva bwinja. Che chirhumire ongenderere kulembera. Rhushambale oku mahano mali mu gunola mwazi, rhunalole hano lihe lyakakurhabala bwenene.
