Amango wamafungula Ebiblia, wabona mu myandiko minene. Echola chimenye chakuyubahisa! S’ahubwe obone Ebiblia nka meza gaheberwe ku bintu binene binja by’okulya. Orhakalya ku buli choshi wabwene. Aliko wakachishoga ebi wakalya onayugurhe.

 Y’oyunguka “n’ebilyo” bye Biblia, okwanene kuseza obwenge oku by’oli wasoma. Gunola mwazi gwakurhabala kujira ntyo.

Mu gunola mwazi:

•  Bulagurhe okwanene kuseza obwenge oku by’oli wasoma omu Biblia?

•  Nka gurhe wakayunguka bwenene n’obusomi bwawe bwe Biblia?

•  Eby’eyenyu misole enaderha

 Ok’onali waseza obwenge oku busomi bwawe bwe Biblia, kuwanayunguka nabo. Waza ku gunola mufano: Wakarhogeza amajani-chayi juba-juba omu gopo ly’amenji madagarhire n’okugwarha bununu bukege bw’echola chayi. Aliko wakayunva bununu bwenene nk’olekere echola chayi chibere kasanzi kageke mw’agola menji.

 Konako, oku bilolere obusomi bwe Biblia. Ahali h’okugeza amasu juba-juba omu Biblia, oseze obwenge n’omurhima gwawe oku mwazi oli wasoma. Intyo k’omwandisi we Zaburi ya 119 aliri ajira. Oku bilolere esheriya ya Mungu, aderhere ntya: “Inanyiwazako olusiku loshi.”​—Zaburi 119:97.

 Aliko, arhali k’okuderha ok’okwanene kugeza olusiku loshi oli wasoma n’okuwaza oku Biblia. Ewazo likulu ly’elila: Omwandisi w’ezaburi aliri arhola kasanzi k’okuwaza oku Chinwa cha Mungu. Okujira ntyo kwaliri kwamurhabala arhole esimikiro zinja.​—Zaburi 119:98-100.

 “Nyama aliri ambwira ntya, ‘Ogwerhe siku mushanvu omu boso, na mw’elyola boso onajira bintu byawe binene. Bulagurhe orhahereza Yehova kw’akola kasanzi? Okujira ntyo kuli kwinja!’”​—Melanie.

 Amango wamawaza oku makanuni me Biblia, echola chakurhabala bwenene kurhola esimikiro zinja, omufano amango oli wachishoga abera changwa amango wamageregezwa kujira chintu chilebe chibi.

•   Ojire eprograme. Mwali-werhu muguma oyirikirwe Julia aderhere ntya: “Orhole eprograme y’akusoma esiku zoshi Ebiblia. Omenye ebi wasoma, amango wabisoma, n’efasi wasomera.”

•   Osomere aharhali olwamo. Munyere muguma oyirikirwe Gianna aderhere ntya: “Olonze efasi erhulerere. Kandi, obwire abandi omu mulala gwawe oku bilolere eprogame yawe y’obusomi yibarhayinja bakuhugisa amango oli wasoma.”

   Akaba oli wakolesa etablete changwa etelefone yawe, oyihire omu bulyo emenye yakuhugisa. Na chiro wakachihangana kukolesa Ebiblia y’amakaratasi. Kweri, abantu banalonza emyazi bayerekene oku amango wamakolesa ebitabu by’amakaratasi omu kusoma, wayunva ebintu bwinja. Aliko, by’akakukomerera kuseza obwenge amango oli wasomera oku ecran.

   “Okusomera oku ecran kunampugisa. Nakapata emesaje changwa omuliro gwani gwakahwa changwa Enternete yakasharha. Aliko okubilolere ebitabu by’amakaratasi, okenere kugwarha omwangaza gonyine.”​—Elena.

•   Ohwanze n’esala. Oheme Yehova akurhabale kuyunva, kuyibuka, onayunguke n’echigabi che Biblia olonzeze kusoma.​—Yakobo 1:5.

   Y’ojira nk’oku wanasaliraga, ohumbe bwenene omu mwazi oli wasoma. Nka gurhe wakajira ntyo? Akaba oli wakolesa e aplikasyo JW Library changwa Ebiblia y’oku Enternete, wakakoza k’olola lwandiko y’obona eyindi myazi oku bilolere olola lwandiko.

•   Ochibaze ebibazo. Omufano: ‘Bichi eyila ngani embwirire oku bilolere Yehova? K’eyerekene engeso ndebe nakayiganya?’ (Waefeso 5:1) ‘Bichi nayigire mw’enola ngani nakakolesa omu kalamo kani’? (Zaburi 119:105) ‘Kanakakolesa ebinasomere omu kurhabala abandi mu njira nguma changwa eyindi?’​—Waroma 1:11.

   Ochibaze ntya, ‘Nka gurhe ebinayigire bifarhene n’erhwe likulu lye Biblia?’ Echola chibazo chili ch’akamaro bwenene. Bulagurhe? Bulala buli chintu omu Biblia​—kurhangira ku Mwanzo kugera ku Ufunuo—​chipatene mu njira nguma changwa eyindi n’erhwe likulu lye Biblia: Okuntu Yehova nj’achesa ezino lyage kugerera Obwami bwage bw’embingu n’okuyerekana oku yewe y’ekwanene kurhambula n’okuntu anarhambula k’okwinja bwenene.