“Okulembera k’omulume n’omukazi kunageregezwa buli lusiku. Okulembera kwakabonekana nka nkabaga kurhavire kwaba kw’akamaro, amango ochili mulamba, aliko kuli kwa ngombwa y’obunyumpa bugalikana.”—John

•  Bulagurhe bikuhemere okulembera?

•  Gurhe wakayerekana ok’onalembera?

•  “Okulembera kuli kwa ngombwa”

• Omu bunyumpa m’onamenyera engeso zibi z’owenyu zoshi.

  “Okw’ehy’obuhya hyanachika ntya tu, biyorohere bwenene okurhondera kuseza obwenge oku ngeso zibi oli wabona oku wenyu. N’ey’ohwanza kugwarha amawazo mabi mali nk’amola byakaba juba-juba okugambwa kulembera.”—Jessena

• Okurhalembera kwakarhuma walema waderha buzira burhanga kuwaza.

  “Imba juba-juba kukarama changwa kuyerekana okuntu ndi nachiyunva omu kuntu hali okunanvubagula ebintakaderhere. Nkanabaga eyi namdembera nakagalire kulema narhanga kuwaza oku bintu, imenye ebinakaderha n’ebintakaderha.”—Carmen

  Ebiblia ederhere: “Obuzigire bunalindira bunaba m’obwinja.” (1 Wakorinto 13:4) Bishushire nka biyunvikene bwinja okuderha oku abantu basimene banakwanene balemberane. Aliko lero arhali ntyo kubija byazigana kuba. John rhwarhangaga kuderha aderhere ntya: “Kuguma n’ezindi ngeso zinja zoshi, okulembera kunashwanga jubaba-juba ahali h’okukomera. Bihemere okuchihangana bwenene okuderha mp’omuntu akuze eyola ngeso.”

• Amango hamaba ech’orhaliwazize chiro, woyo olemberage.

  Omufano: Mukawe changwa balo anakubwira echintu omu kuntu kubihire. Wakayunva nawe nk’omugalulire echindi chibihire.

  Akanuni k’Ebiblia: “Orhabaga juba-juba kugaya, okugaya juba-juba kuyerekene obuhwinja.”—Muhubiri 7:9, Mahugulo m’eshishi.

  Obulyo b’okulembera: Lindira bugeke. Embere oshubize, obe nka warhola ebyali aderha oku arhalonzaga akudukange s’olole bichi yalonza kuderha. “Abanene mu rhwewe bazigana kuyurukira bashubiza omubulyo rhwarholere mw’ebyaderhere ahali h’okulola bichi biguma owerhu yewe yaderha kanuni,” kw’echitabu Fighting for Your Marriage chiderhere.

  Chiro akaba kweri owenyu akulonzaga k’obuhambazi, okulembera kwawe n’okuchigalula kwakahoza oburhe ahali h’okubuyongera k’obwindi. “Aharhali shali, omuliro gunazima,” kw’ebibiblia ederhere.—Mezali 26:20.

  “Nka wamahwanza kubona mukawe nka mwanzi wawe, rhang’owaze bugeke oku by’onamusimira n’aho han’ahola omujirire echintu chinja.”—Ethan.

  Eby’okuwazako:

  • Gurhe nawe onajira nk’owenyu amaderha changwa amaderha echintu chirhakwirire?

  • Gurhe wakayerekana okulembera bwenene amandi mango byaba?

• Amango owenyu amahanza agalukira egosa ligeregeze okulembera kwawe.

  Omufano: Owenyu anazigana kucherehwa, anakubwira omulindire; wanalindira, wanalindira, kugerera aha wayunva oburhe.

  Akanuni k’Ebiblia: “Mugenderere okulemberana buli muguma n’owindi n’okubabalirana oku bulonza.”—Wakolosai 3:13.

  Obulyo b’okulembera: Opime kulwira oku bunyumpa bwawe ahali h’okuchilwako. Ochibaze, ‘Nani inkashuba kukaliha bwenene inyongere okuch’owerhu ajirire kukwakomewza obunyumpa bwerhu si changwa kubushanduza?’ Echindi, oyibuke oku “Rhweshi rhunagoma mango manene.” (Yakobo 3:2) Kokuderha oku nawe onaherhe engeso bihemere okwize.

  “Mango maguma-maaguma inandembera omwira kulusha okunandembera bani. Imbwene nka nkabaga kwenge inangeza bisanzi binene na bani n’okubona amagoasa mage moshi. Aliko okulembera kwakayerekana oku immuzigire inammukengere. Che chirhumire okulembera kuli kw’akamaro omu bunyumpa bwani.”—Nia

  Eby’okuwazako:

  • Kanganagurhe onalembera amagosa m’owenyu?

  • Gurhe wakayongera okulembera kwawe kandi?