Obukama bwa Mungu n’obutwazi bwomwiguru. Obutwazi obwo nibujakwihyao obutwazi obundi bwona. Nabwo burakora engonzi za Mungu omunsi nk’omwiguru. Amakuru ag’Obukama bwa Mungu nagokushemelerwa. Kanya kake obukama bwa Mungu nibwija kugobesheleza obwetage bw’abantu orwokuba n’obutwazi burungi. Nibwija kuteranisa amoi abantu bona omunsi.​—Shoma Danieli 2:44; Matayo 6:9, 10; 24:14.

Kisaine obukama bube bwina omukama. Yehova akatonda Omwanawe Yesu, abe Mukama w’Obukamabwe.​—Shoma Okushurulirwa 11:15.

Omwana wa Mungu niwe Mukama agoshokire orwenshonga eina obufura n’amazima. (Yohana 1:14) Kandi, ain’obushobora bwokujuna abantu orwenshonga naijakutwala ensi aly’omwiguru. Orwo Yesu yahimbwilwe, akatemba omwiguru n’okushuntama omumukono gwa bulyo gwa Yehova alindiliire kuhabwa Obukama. (Abaheburania 10:12, 13) Anzindo, Mungu akamua obushobora bw’okutwala.​—Shoma Danieli 7:13, 14.

Embaga y’abantu abalikwetwa “abatakatifu” baratwara hamoi na Yesu omwiguru. (Danieli 7:27) Abegesibwa ababeile bali nyesigwa za Yesu nibo bambele kuba abatakatifu. Yehova akyagendelera kuronda abashaija hamo na abakazi enyesigwa kuba abatakatifu nka Yesu, abatakatifu abo mbahimburwa baina omubili gw’omwoyo.​—Shoma Yohana 14:1-3; 1 Abakorinto 15:42-44.

 N’abantu bangaa abaragya omwiguru? Yesu akabeta “obuhyo buke.” (Luka 12:32) Anzindo, orubara rwabo ruraba 144,000. Baratwala hamoi na Yesu ensi yona.​—Shoma Okushurulirwa 14:1.

Obukama bwa Mungu bukabanza kutwala omumwaka gwa 1914. * Ekintu kyambele ekyo Yesu yakozire orwoyajubwilwe kuba Mukama, kikabakiri kukuntura ahansi Shetani na mashetani bawenene. Shetani akatamwa muno nawe akaleta. (Okushurulirwa 12:7-10, 12) Kuruga orwo, amatangwa g’abantu gakaba gangi. Endashana, eifa, endwara, n’emisisi y’ensi mbyorekya “akabonero” ka nk’okwo kanya kake Obukama bwa Mungu buratwala ensi yona.​—Shoma Luka 21:7, 10, 11, 31.

Kuraba omuburangirizi obulikukorwa omunsi zona, Obukama bwa Mungu mbuteka amoi embaga y’abantu kuruga omumahanga gona. Embaga yabantu abalikwetohya mbaba abatwarwa ba Yesu. Obukama bwa Mungu mbwija kubebembera omu bukiro bubi obwa mbwenu kaburahwerekerezibwa. Kityo bona abalikwenda kubona eigoba ly’Obukama bwa Mungu mbetaga kwega kuba abagorogoki ba Yesu.​—Shoma Okushurulirwa 7:9, 14, 16, 17.

Omumakiro ge miaka 1,000, Obukama obwo mbwija kugobeshereza ekigenderelo kya Mungu eky’ambele aha abantu. Ensi yona eraba paradiso. Anzindo, Yesu aragarurira Mungu Obukama. (1 Abakorinto 15:24-26) Isi, nomanya omuntu wenawena owolikugonza kushoborora aha Bukama bwa Mungu?​—Shoma Ezaburi 37:10, 11, 29.