1-3. Nobasa kubaza bibazoki ebikwete aha rufu? isi, edini ezindi nizihorora zitai ebibazo ebyo?

EBIBULIA neturaganisa nk’okwo ‘orufu rulichweka.’ (Okushurulirwa 21:4) Omu mutwe gwa  5, tukega nk’okwo ekichunguzo nikitukora tubase kubona oburora obutalihwao. Kyonka kany’aka tukyagendelera kufa. (Mwegesa 9:5) Kyonka ekibazo nikyeki, katulikufa nitugya nkahai?

² Empororo y’ekibazo ekyo negasha muno orwo tulikuferwa n’omuntu owo tulikugonza. Rundi twakwebaza tuti: ‘Yagya nkahai? Isi, natubona? Isi, nabasa kutujuna? Isi, tulimubona orundi?’

³ Edini zingi nizihorora ekibazo ekyo, omu ngeli ezitali zimoi. Nizegesa nk’okwo: Kolaba nokorage oragya omwiguru kyonka kolaba nokora ebibi oragya omu muliro. Ezindi nizegesa nk’okwo omuntu kalikufa nahinduka kuba mwoyo, n’okugenda kwikara n’abarumunabe abafire. Nangu ezindi nizegesa nk’okwo orwo alikufa akaramurwa, nazarwa bundibuhya anga narora orundi aina omubili ogw’engeli endijo alimuntu anga alikigunju.

4. Nikitekelezoki ekikuru ekikwete aha rufu ekyo edini zingi zilikwegesa?

⁴ Ebintu ebyo edini zilikwegesa tibilikushanangana. Kyonka edini zona nizegesa ekitekelezo kimoi ekikuru. Nizegesa nk’okwo omuntu kalikufa aina ekintu ekilikugendelera kurora. Isi, nikwo?

5, 6. Katulikufa nitugya nkahai?

⁵ Yehova namanya abafu okwo bali, natushoborora nk’okwo omuntu kalikufa oburorabwe niburekelera aho. Orufu mpindure y’oburora. Aha rw’ekyo omuntu kalikufa talikugendelera kwikara hona hona alimurora, ab’atakina bitekelezo byona byona. * Katulikufa titwakubasa kubona, kuhulira, anga kutekeleza.

⁶ Omukama Suleimani akahandiika ati, “abafire tibakimanya kyona kyona.” Abafu tibakubasa kushemelerwa anga kutamwa, kandi “tabayo mulimo, anga kitekelezo anga magezi anga bumanyi omuli sheoli.” (Shoma Mwegesa 9:5, 6, 10.) Omu Zaburi 146:4, Ebibulia netugambira nk’okwo, omuntu kalikufa “ebya wenene bihwer’aho.”

7. Yesu akagambaho atai orufu?

⁷ Munywanyiwe omugonzibwa Lazaro orwo yafire, Yesu akagambira abegesibwabe ati: “Munywanyi waitu Lazaro anagiire.” Kyonka Yesu akaba atalikworekya nk’okwo Lazaro anagiire oturo. Yesu akagendelera kubagambira ati: “Lazaro afire.” (Yohana 11:11-14) Kityo Yesu akashananganisa orufu n’oturo. Tiyagambire ati; Lazaro orwo yafire akaba ali omwiguru anga kuba hamoi n’abanyarugandabe abafire. Tiyagambire ati; orwo Lazaro yabaile afire akaba ali omu mulilo ogutalihwaho anga ati ‘akazarwa bundi buhya ali muntu anga kigunju. Shana akashananganisa Lazaro n’omuntu anagire oturo otw’amani. Ebihandiiko ebindi nibishananganisa  orufu n’oturo otw’amani. Ebibulia negambaho eti; orwo Sitefano yaisirwe, ‘akanagira oturo tw’orufu.’ (Ebikorwa 7:60, NW) Entumwa Paulo ekahandika nk’okwo abakirisito ababaire bafire ‘bakaba banagiire oturo tw’orufu.’​—1 Abakorinto 15:6, NW.

8. Nitumanya tutai nk’okwo Yehova orwo yatutonzire akaba atagendeleire katufa?

⁸ Isi, Katonda orwo yatonzire Adamu na Eva akaba agendeleire kabafa? Chei! Yehova akabatonda kabatura eirai lyona baina oburora obuhikiilire. Yehova akatonda abantu baina eshuubi y’okutura eirai lyona. (Mwegesa 3:11) Abazaire tibagonza bana babo kabagurusha anga kufa, Yehova  nawe nayehulira atyo. Kyonka orw’okuba Yehova akatutonda katutura eirai lyona, kubaki nitufa?

9. Adamu na Eva, kubaki bayetagirwe kworobera emihango ya Katonda?

⁹ Omu busitani ya Edeni, Yehova akaragira Adamu ati: “Buli muti omu busitani wakugulyaho okwo olikwenda; kyonkai aha muti gw’okumanyisa ebirungi n’ebibi, otaligulyaho. Aha rw’okuba kiro ky’oligulyaho, olifa.” (Embandizo 2:9, 16, 17) Kikaba kitagumile Adamu kworobera omuhango ogwo, orw’okuba Yehova akaba aina enshonga ey’okugambira Adamu na Eva ekintu ekilikugasha n’ekitalikugasha. Bakworekire nk’okwo nibakunira Yehova n’obutwazibwe orwo bakumworobeire. Kukora batyo bakworekire nk’okwo baina esiimi ahali byona ebyo Yehova yabahaire.

10, 11. (a) Sitani akabeihyabeihya atai Adamu na Eva? (b) Kubaki Adamu na Eva bakaba bataina nshonga y’okutakunira muhango gwa Katonda?

¹⁰ Nikijunahaza kumanya okwo Adamu na Eva bakaramura kutorobera Yehova. Sitani akabaza Eva ati: “Ruhanga akagamba ati, mutalilya aha muti gwona gwona omu busitani?” Aho Eva amuhorora ati: “Ebiraba by’emiti y’omu busitani twakubilya; kyonkai Ruhanga akagamba ati, ‘Omuti oguli omugati y’ebusitani mutaligulyaho kiraba, nangu n’okugukoraho chei, mutalija mukafa.’”​—Embandizo 3:1-3.

¹¹ Aho Sitani amugambira ati: “N’akati timufe aha rw’okuba Ruhanga namanya okwo ekiro ekyo muligulyaho, amaisho ganyu galiburura, muliba nka wenene, mumanye ekirungi n’ekibi.” (Embandizo 3:4-6) Sitani akaba nayenda Eva atekeleze okwo yakubasa  kweramulira ebintu ebirungi n’ebibi. Orwo Sitani yagambiire Eva ati timulifa, Eva atongora ekiraba ky’omuti alya ashuba atwalira iba nawe alya.Adamu na Eva bakaba nibamanya geigeigei nk’okwo Katonda akabatanga kulya ekiraba ekyo. Kityo orwo balire ekiraba ekyo bakanga kworobera omuhango ogwo kuruga ahali Katonda. Ekyo kikorekya okwo bagahyire Ishebo ow’omwiguru. Bakaba bataina nshonga yona yona ey’okutorobera muhango ogwo gwa Katonda!

12. Kubaki nikijunahaza kubona Adamu na Eva bakanga kworobera Yehova?

¹² Nikijunahaza kumanya okwo abazaire baitu abambere tibakunire mutonzi wabo! Wakwehulire otai kawakubaire noyekaza kulerage abana bawe omu kanya kagufi nibakushenga tibalikukora bilinya eby’obegesize? Isi, wakushasire?

13. Orwo Yehova yagambire Adamu ati, oligaruka omw’itaka akaba nayorekyaki?

¹³ Orwo bashengire Katonda Adamu na Eva bakaba batakiina eshuubi y’okutura eirai lyona. Yehova akagambira Adamu ati, “Okw’oli itaka oligaruka omw’itaka.” (Shoma Embandizo 3:19.) Ekyo nikyorekya nk’okwo Adamu yakushanangaine nk’eitaka okwo litaina burora. (Embandizo 2:7) Orwo Adamu yakozire entambara akafa, kityo akaba atakirora rundi.

14. Kubaki abantu nibafa?

 ¹⁴ Kuba Adamu na Eva bayorobaire Katonda bakuba nibarora kugoba kany’aka. Kyonka orwo bayangire kumworobera bakakora entambara, bafa. Entambara nink’endwara eyotwasikire kuruga aha bazaire baitu abambere. Chwena twina entambara egyo niyo nshonga nitufa. (Abaroma 5:12) Kyonka kikaba kitali kigendelero kya Katonda orwo yatonzire abantu. Katonda tiyagondize bantu kabafa, niyo nshonga Ebibulia neyeta orufu “Omubisha.”​—1 Abakorinto 15:26.

15. Kubaki okumanya amazima agakwete aha rufu nikutuha obwegeleere?

¹⁵ Okumanya amazima agakwete aha bafire nikutujuna tutagira bitekelerezo bibi. Ebibulia netwegesa nk’okwo abafire tibaina majune anga bushasi. Titwina kufumora nabo. Tibakubasa kutujuna anga ichwe kubajuna. Tibaina kututinisa, aha rw’ekyo tikisaine kubatiina. Kyonka edini zingi nizegesa okwo abafire nibagendelera kutura omu kichweka ekindi, nizorekya nk’okwo abafu nibabasa kushabirwa kuraba aha kuheleza abakuru b’edini anga abatakatifu amahera kubashabira. Kyonka katulikumanya amazima agakwete aha rufu, tibatubaihya beihye.

16. Edini zingi nizegesa bishubaki ebikwete aha bafu?

¹⁶ Sitani nakoza edini z’ebishuba kuhabisa abantu batekeleze okwo abafu baliyo nibarora. Obulebero bumoi nibw’obu, edini nanka nizegesa nk’okwo omuntu kalikufa, omwoyogwe nigugendelera kurora. Isi, edini yawe ekwegesize etyo? Isi, edini yawe neyegesa ebyo Ebibulia elikwegesa ebikwete aha bafire? Sitani nakoza ebishuba kwihya abantu ahali Yehova.

17. Kugamba oti ‘Katonda nabonabonesa abantu omu mulilo ogutalihwaho’ kubaki kitalikumuha kitiinwa?

¹⁷ Ebintu bingi ebyo edini zingi zilikwegesa nibitinisa.  Obulebero bumoi nibwobu, edini nanka nizegesa nk’okwo Katonda nabonabonesa abantu omu mulilo ogutalihwaho eirai lyona. Ebishuba ebyo nibikora Yehova atakunirwa. Yehova talikubasa kushasa abantu omu ngeli egyo! (Shoma 1 Yohana 4:8.) Isi, iwe wakwehulira otai kawakubona omuzaire nabonabonesa omwanawe, akwasile emikono nagyokya n’omulilo? Oramubona alimuntu mubi muno. Nangu tiwakwenda muzaire ogwo kaba munywanyi wawe. Nikwo kili, Sitani nagonza tubone Yehova ali muntu mubi muno nk’omuzaire ogwo.

18. Kubaki tikisaine kutina abantu abafire?

¹⁸ Edini zingi nizegesa nk’okwo abantu kabalikufa nibahinduka kuba bitondwa by’omwoyo. Nizegesa nk’okwo abantu nibetagwa kukunira n’okutina ebitondwa ebyo, orw’okuba nibibasa kuba binywanyi byabo anga bibisha byabo. Abantu bangi nibaikiliza ebishuba ebyo. Nibatiina abafu, aha rw’ekyo nibabegashanizaho kukiraho okwegashaniza ahali Yehova. Kyonka oijuke nk’okwo abafire tibalikuhulira, kityo titwina nshonga y’okubatiina. Wenene niwe Katonda ow’amzima, kisaine tumufukamire.​—Okushurulirwa 4:11.

19. Aliho magobaki kumanya amazima agakwete aha rufu?

¹⁹ Okumanya amazima agakwete aha rufu nikutuha obwegeleere, kuruga omu myegeso y’ebishuba. Amazima ago nigatujuna tushobokerwe kurungi muno eshuubi za Yehova ez’akanya akalikwija.

20. Nitwija kwegaki omu sura elikuhonderaho?

²⁰ Emyaka mingi elabireho Yobu akabaza ati, “Omuntu k’afa ashuba arora?” (Yobu 14:14) Isi, omuntu ayafire nabasa kuhimbuka? Katonda natuha empororo nungi kulabira omu Bibulia. Nitwija kwegaho ekyo omu mutwe ogulikuhonderaho.