1. Nitwija kufumoraho nsharaki elikumanyika muno?

AMAMILIONI g’abantu nibamanya enshara ya Isheichwe asingiire omwiguru. Yesu akakoza enshara egyo kwegesa abegesibwabe okwo bakubasa kushaba. Akashaba ahali kihai? Kubaki enshara egyo negasha muno ahali ichwe?

2. Nibintuki bishatu ebyo Yesu yatwegesize katushaba?

² Yesu akagamba ati, “Ahonu mushomega enshara muti, ‘Isheichwe asingiire omwiguru, eibara lyawe lihabwe ekitinwa. Obukama bwawe bwije, eby’ogonza bikorwe omu nsi nk’omwiguru. ’”(Shoma Matayo 6:9-13.) Kubaki Yesu yatwegesize tushabe ebintu ebyo bishatu?​—ShomaEkishoborozo Ekyongeirweho 20.

3. Nitwetaga kumanya bintuki ebikwete aha bukama bwa Katonda?

³ Twegire nk’okwo eibara lya Katonda ni Yehova. Kandi twashuba twayega ekigendelero kya Katonda aha bantu n’ensi. Kyonka Yesu akorekyaki orwo yagambire ati: “Obukama bwawe bwije”? Nitwija kwega ebikwete aha bukama bwa Katonda, ebintu eby’oburakora, n’okwo burakora eibara lya Katonda kalyezibwa.

4. Obukama bwa Katonda kiki, N’omutwazi wa bwonene n’ohai?

⁴ Yehova ataireho eserikali omwiguru kandi alonzire omwanawe Yesu, kaba niwe Mukama. Obutwazi obwo Ebibulia nebweta Obukama bwa Katonda. Yesu niwe “Omukama w’abakama omutwazi w’abatwazi.” (1 Timoteo 6:15, NW) Yesu aina amani g’okukolera abantu ebintu bingi ebirungi, kushaga omutwazi wena wena.

5. Obukama bwa Katonda bulitwara kuruga nkahai? Isi, bulitwaraki?

 ⁵ Yesu orwo yahimbwirwe, akashuba omwiguru ekiro kya makumi gana. Yehova akaronka Yesu kuba Mukama w’Obukama obwo. (Ebikorwa 2:33) Obukama bwa Katonda nibwija kutwara ensi kuruga omwiguru. (Okushurulirwa 11:15) Niyo nshonga Obukama bwa Katonda Ebibulia nebweta ‘Obukama obw’omwiguru.’​—2 Timoteo 4:18.

6, 7. Kubaki Yesu niwe Mukama alikugasha kushaga Abakama b’ensi egi?

⁶ Ebibulia negamba eti, Yesu niwe mukuru kushaga abantu bona, niyo nshonga “wenene mushai nyakumelera.” (1 Timoteo 6:16) Abatwazi b’ensi nibafa, kyonka Yesu talifa eirai lyona. Ebintu ebirungi ebyo Yesu arakora, nibija kutura eirai lyona.

⁷ Oburangi bw’Ebibulia nibugamba nk’okwo Yesu niwe araba Mukama aina obuganyizi amoi n’ehaki. Oburangi obwo nibugamba buti: “Omwoyo gwa Yehova nigwija kusingira eiguru ya wenene, omwoyo gw’obumanyi n’amagezi, omwoyo gw’entegeka n’amani, omwoyo gw’obuganyizi n’omwoyo gw’okutina Yehova; okutina Yehova nigo galiba gali mashemelerwage. Taliramura kuhonderana n’ebyalikubonesa amaishoge, anga kuchwa omushango nk’okwo ahulire. Kandi n’abantu abajege alibaramura obuzira kigonzi.” (Isaya 11:2-4, NW) Isi, wakwenzire omukama nk’ogwo?

8. Nitumanya tutai nk’okwo Yesu talikwija kuba mutwazi ali wenka?

⁸ Katonda aronkire abantu bake babase kuba batwazi hamoi na Yesu omwiguru. Obulebero bumoi n’entumwa Paulo, ekagambira Timoteo eti: “Katulyegumisiliza, kwakwo tulilya nawe engoma.” (2 Timoteo 2:12) Isi, bantu bangahai abaliba batwazi hamoi na Yesu?

9. N’abantu bangahai abaraba Bakama hamoi na Yesu? Yehova akabanza kubaronka maki?

 ⁹ Nk’okwo twegire omu mutwe gwa 7 , entumwa Yohana omu kubonekerwa ekabona Yesu ali Mukama hamoi na balinya 144,000. Isi, 144,000 abo nibahai? Yohana nagendelera kushoborora nk’okwo ‘eibaralye [Yesu] n’elya Ishe gahandikire aha buso bwabo.’ Nashuba nayongeraho ati: “Abo nibo bakuratira kataama [Yesu] hona hona mbali agenda agiire. Aba bakachungurwa omu bantu.” (Shoma Okushurulirwa 14:1, 4.) Bonene abo 144,000 n’Abakirisito abesigwa abo Katonda aronkire “omu nsi balalya engoma” hamoi na Yesu. Orwo balikufa omu kanya konene, nibahimburwa babase kugya kutura omwiguru. (Okushurulirwa 5:10) Kuruga omu makiro g’entumwa, Yehova akabanza kuronka abesigwa abo babase kugobeshereza orubara rw’Abakama 144,000.

10. Okuronkwa kwa Yesu hamoi n’abakama 144,000 nikworekya kutai okwo Yehova ali kutugonza?

¹⁰ Yehova natugonza muno niyo nshonga aronzire abantu babe batwazi hamoi na Kirisito. Yesu naija kuba ali mutwazi murungi orw’enshonga natumanyage. Namanya muno ebikwete aha bantu n’obushasi obubaliho. Paulo akagamba nk’okwo Yesu namanya okwo tulikwehulira orwo tulikugwebwaho ebyemba “alikutumanya obujege bwaitu akarengesibwa omu ngeli zona nka ichwe.” (Abaheburania 4:15; 5:8) Nangu bonene abo 144,000 nibamanya obushasi obutuliho, orw’okuba bonene bakagwebwaho obushasi n’endwara nka ichwe. Ekyo nikitworekya nk’okwo Yesu hamoi na 144,000 nibaija kumanyage obwetage bwaitu n’okwo barabugobeshereza.

11. Kubaki Yesu yayegesize abegesibwabe bashabe engonzi za Katonda zikorwe omwiguru?

¹¹ Yesu akegesa abesigwabe bashabe engonzi za Katonda zigobesherezibwe omwiguru. Kubaki? Omu mutwe gwa 3 tukega nk’okwo Sitani Ibilisi akashenga Yehova. Orwo yabaire mushengi, Yehova akajubura omushengi ogwo hamoi n’abamalaikabe babase kwikara omwiguru akanya kake. Aha rw’ekyo ti bamalaika bona omwiguru ababaire nibakora engonzi za Katonda. Omu mutwe gwa 10, nitwija kwega bingi ebikwete ahali Sitani hamoi n’abamalaikabe.

12. Nibintuki bibili ebilikugasha, ebilikushobororwa omu kitabo ky’ Okushurulirwa 12:10?

¹² Ebibulia negamba nk’okwo Yesu orwo yamazire kutekwaho Kuba Mukama w’Obukama bwa Katonda, yakurashaine na Sitani. (Shoma Okushurulirwa 12:7-10.) Orujuru rwa 10 nirushobororaho ebintu bibili eby’omugasho. Obukama bwa Katonda bwakubandize kutwara orwo Yesu yakubaire Mukama w’Obukama obwo, Kandi Sitani yakukuntwirwe omu nsi kuruga omwiguru. Nk’okwo turayega, ebintu ebyo byabaireho.

13. Nikihai ekyabaireho orwo Sitani yabingirwe omwiguru?

¹³ Ebibulia neshobororaho okwo abamalaika abagorogoki bakashemelerwa orwo Sitani n’abamalaikabe babingirwe kuruga omwiguru. Nitushoma tuti: “Ahonu iwe iguru shanduka nangu nainywe abalikaturamu!” (Okushurulirwa 12:12) Kany’aka omwiguru aliyo ebyera n’obumoi orw’enshonga abamalaika bona nibakora ebyo Katonda agonza.

14. Orwo Sitani yakuntwirwe kuruga omwiguru emikalire ekabetai omu nsi?

¹⁴ Kuruga akany’ako ebintu bikahinduka omu nsi.  Aliho ebintu bingi ebibi “kuba Ibilisi yabasiliikira” aina “ekiniga kingi, enshonga nomanya okwo akanyake kasigara kagufi!” (Okushurulirwa 12:12) Sitani aina ekiniga kingi. Akabingwa omwiguru kandi namanya nk’okwo omu kanya kake naija kusiliikibwa. Nakora kyona kyona ekyalikwenda abase kututahya omu bibundo, omu mashasi, n’ebyemba byabuli ngeli.

15. Katonda aina kigendeleroki kwolekera ensi?

¹⁵ Kandi, ekigendelero kya Katonda kwolekera ensi, tikikahindukire. Nagonza muno abantu abesigwa babase kwikara omu nsi eliba eli paradiso. (Ezaburi 37:29) Obukama bwa Katonda nibwija kugobeshereza ekigendelero ekyo omuli ngeliki?

16, 17. Eihandiiko lya Danieli 2:44 nilishobororaki ebikwete aha Bukama bwa Katonda?

¹⁶ Oburangi bwa Danieli 2:44, NW nibugamba buti: “Omu biro by’abakama abo, Katonda asingire omwiguru alitaho obukamabwe obutalihwaho eirai lyona, kandi obukama obwo tibulihabwa batwazi bona bona. Bulisiliikya n’okushenkenyura obutwazi bwona obw’abantu, kandi bulikaraho eirai lyona.” Oburangi obwo nibutwegesaki abikwete aha bukama bwa Katonda?

¹⁷ Ekya mbere, oburangi obwo nibushoborora nk’okwo Obukama bwa Katonda bwakubandize kutwara “omu biro by’abakama abo.” Ekintu enkyo nikyorekya nk’okwo obukama obundi bwakubaire nibutwara omu kanya ak’obukama bwa Katonda bwakubandize kutwara. Ekya kabili, oburangi obwo nibushoborora nk’okwo Obukama bwa Katonda bulikaraho eirai lyona kandi tihaliho butwazi bundi oburatwara hamoi n’obukama bwa Katonda. Ekya kashatu, nihaija kubaho endashana orubaju orw’obukama bwa Katonda n’obutwazi  bw’abantu. Obukama bwa Katonda nibwija kusinga mara buliba butwazi obulitwara ensi eirai lyona. Aha nzindo abantu nibaija kubona obutwazi burungi obutakabagayoga.

18. Endashana y’enzindo ey’Obukama bwa Katonda n’abatwazi b’ensi neyetwa etai?

¹⁸ Obukama bwa Katonda nibwija kwihyaho obutwazi bw’abantu butai? Orwo ekiro ky’endashana y’enzindo elikwetwa Arimagedoni kiliba kitakagobire, amasitani nigaija kubeihya beihya “Abakama b’ensi yona. Abakama b’ensi yona balihuruza hamoi kurashana endashana aha kiro ekikuru ekya Katonda Rushoborabyona.” Obutwazi bw’abantu buli rashana n’obutwazi bwa Katonda.​——Okushurulirwa 16:14, 16, NW; Shoma Ekishoborozo Ekyongeirweho 10.

19, 20. Kubaki Obukama bwa Katonda nibwo busaine kutwala ensi egi?

¹⁹ Kubaki nitwetaga Obukama bwa Katonda? Aliho enshonga ishatu. Eya mbere, orw’enshonga y’entambara niturwara n’okufa. Kyonka, Ebibulia negamba nk’okwo ahansi y’obutwazi bwa Katonda tulitura eirai lyona. Eihandiiko lya Yohana 3:16 ndigamba nk’okwo “Ruhanga akagonza ensi muno yagoba n’aha kuhayo Omwanawe omumoi, wena alimwikiliza talifa, nawe abone oburora obutahwaho.”

²⁰ Enshonga ya kabili, kany’aka tuzingoirwe abantu ababi. Abantu bangi tibakwesigwa, nibabeihya ebishuba, kandi nibegendeshereza kubi. Titwakwihya bantu abo omu nsi, kyonka Katonda naija kubaihyamu. Abantu bona abali kukora ebibi nibaija kusiliikibwa omu kanya ka Arimagedoni. (Shoma Ezaburi 37:10.) Enshonga ya kashatu neyorekya nk’okwo obukama bw’abantu bwina obujege, obukatili, n’obulyalya. Kityo obukama bw’abantu tibulikujuna bantu kaborobera Katonda.  Ebibulia negamba nk’okwo “Abantu nibatwara abandi omu kubashasa.”—Mwegesa 8:9, NW.

21. Obukama nibwija kugobeshereza butai engonzi za Katonda omu nsi?

²¹ Orwo Arimagedoni elihwaho, Obukama bwa Katonda bulikora engonzize zikorwe omu nsi. Obulebero bumoi nibw’obu, Obukama obwo nibwija kusiliikya Sitani n’abamalaikabe. (Okushurulirwa 20:1-3) Aho haliba hatakiliho ndwara n’orufu. Ekichunguzo kya Yesu nikyo kilajuna abantu bona abesigwa babase kubona oburora obutalihwaho omu nsi eliba eli paradiso. (Okushurulirwa 22:1-3) Obukama obwo nibwija kukora eibara lya Katonda lyezibwe. Isi, ekyo nikyorekyaki? Abantu bona nibaija kuhaisiliza eibara lya Yehova akanya ak’Obukama bwa Katonda buliba nibutwala ensi yona.​—Shoma Ekishoborozo Ekyongeirweho 21.

22. Nitumanya tutai nk’okwo Yesu tiyatairweho kuba mutwazi orwo yabaire ali omu nsi anga orwo yahimbwirwe?

²² Yesu akegesa abegeisibwabe bashabe bati: “Obukama bwawe bwije.” Ekyo nikyorekya nk’okwo obutwazi bwa Yehova bwakubandize kutwara omu kanya akahondeireho. Ekya mbere Yehova yakwemereize Obukamabwe n’okutekaho Yesu kaba Mukama. Isi, Yesu akatekwaho  kuba Mukama orwo yashubile Omwiguru? Chei, akaba nayetagwa kulindaho kake. Omu kanya kagufi orwo Yesu yahimbwirwe, Petero na Paulo bakashobororaho oburangi obukwete ahali Yesu obulikuzoka omu Zaburi eya 110:1. Omu burangi obwo, Yehova nagamba ati: “Ikara aha mukono gwange ogwa bulyo, kuhika orwo ndinaga ababisha bawe omu maguru gawe.” (Ebikorwa 2:32-35; Abaheburania 10:12, 13) Yehova akatekaho Yesu kuba mutwazi maki?

23. (a) Yesu akabanza kutwala maki ali Mukama w’Obukama bwa Katonda? (b) Nitwija kwegaki omu mutwe ogulikuhonderaho?

²³ Emyaka mingi Abakirisito bake abesigwa bakamanya nk’okwo omwaka ogwa 1914 gwakubaire gw’omugasho muno omu kugobeshereza oburangi obuli omu Bibulia. Ebintu ebyabaireo omu nsi kubanza omwaka gwa 1914 nibyorekya kwokwokwo Yesu akaba mutwazi omu mwaka ogwo. (Ezaburi 110:2) Orwo Yesu yabandize kubamutwazi, Sitani akakunturwa omu nsi, mara kany’aka ‘namanya okwo akanyake kasigara kagufi.’ (Okushurulirwa 12:12) Omu mutwe ogulikuhonderaho nitwija kubona obulebero bungi obulikworekya nk’okwo nitwikara omu kany’ako akagufi. Kandi nitwija kwega nk’okwo omu kanya kake Obukama bwa Katonda nibwija kugobeshereza engonzize omu nsi.​—Shoma Ekishoborozo Ekyongeirweho 22.