1. N’ohai asaine kutwegesa okwo twakubasa kufukamira Katonda?

EDINI zingi nizigamba okwo zilikwegesa amazima agakwete ahali Katonda. Kyonka tikwo kili, orw’enshonga edini ezo nizegesa ebintu ebitalikwo ebikwete ahali Katonda n’okwotwakubasa kumufukamira. Nitubasa kumanya tutai emihanda elikugasha eyo kufukamira Katonda? Yehova wenkai niwe asaine kutwegesa okwo twakubasa kumufukamira.

2. Wakwega otai okwo wakufukamira Katonda omu ngeli elikugasha?

² Yehova atuhaire Ebibulia etwegese okwo twakubasa kumufukamira omu ngeli elikugasha. Kityo, yega Ebibulia, kolakora otyo Yehova alakujuna obone amagoba g’emyegesoye orw’enshonga nakwenda muno.​—Isaya 48:17.

3. Katonda nayenda tukoreki?

³ Abantu abandi nibagamba bati, Katonda naikiliza edini zona, kyonka Yesu tiyatwegesize atyo. Akagamba ati: “Ti buli omoi angambira ati, ‘Rugaba, Rugaba,’ alitaaha mubukama bwa mwiguru shana olinya akora ebyo Tata asingiire omwiguru, alikwenda.” Kityo, nikigasha muno twege n’okukora ebyo Katonda alikwenda. Ekyo kintu ky’omugasho orw’okuba Yesu akashananganisa abantu abatali kworobera Katonda n’abantu “abafakare.”​—Matayo 7:21-23.

4. Yesu akagamba atai ekikwete aha kukora engonzi za Katonda?

⁴ Yesu akagamba nk’okwo katuraba nitwenda kukora ebyo Katonda ali kugonza, nitwija kugingizibwa. Akagamba ati: “Mutahire omu kihigi ekifundagataine. Ekihigi  ekitwara ahabi kiba kihango mara n’omuhanda nigwanguha. Abakitaahiramu baba bangi. Ekihigi eky’okutaahiramu kugya omu burora nikifundagatana, kandi n’omuhanda gw’okubugoba niguguma. N’ababona oburora obwo baba bake.” (Matayo 7:13, 14) Ekihigi ekifundagataine anga omuhanda ogulikugasha ogw’okufukamira Katonda, nigutwara omu burora obutalihwaho. Ekihigi ekihango anga omuhanda ogutalikugasha ogw’okufukamira Katonda, nigutwara omu kusiliikibwa eirai lyona. Yehova talikwenda muntu wena wena kasilikibwa. Naha buli muntu akanya akokwega ebikwete ahali wenene.​—2 Petero 3:9.

5. Nobasa kubamanya otai balinya abali kufukamira Katonda omu ngeli elikugasha?

⁵ Yesu akagamba nk’okwo nitubasa kumanya balinya abalikufukamira Katonda omu ngeli elikugasha. Twakukora tutyo omu kuhenjuza ebyo balikukora n’okwesiga. Akagamba ati: “Murabamanyiraga aha bikorwa byabo.” Ashuba ayongeraho ati: “Nikwo n’omuti gurungi guraba ebiraba birungi.” (Matayo 7:16, 17) Ekyo tikilikworekya nk’okwo balinya abalikufukamira Katonda bahikiilire. Kyonka, nibekaza kukora ebilikugasha omu maishoge. Leka tulebeho ebintu ebya kutujuna kumanya balinya abali kufukamira Yehova omu ngeli elikugasha.

6, 7. Kubaki omwegashanizo gw’amazima nigwetagwa kwebemberwa Ebibulia? Isi, obulebero bwa Yesu nibutwegesaki?

⁶ Omwegashanizo gwaitu kisaine gwebemberwe Ebibulia. Ebibulia negamba eti: “Ebihandiiko Bitakatifu byona bikakyanurwa Ruhanga, mara nibigasha aha kwegesa, n’aha kuhana banu, kubahabura, n’okubegesa okuba bagorogoki, omuntu wa Ruhanga ashobore kuba mugorogoki, ayetegekire kukora buli mulimo  ogurungi.” (2 Timoteo 3:16, 17) Entumwa Paulo ekahandikira Abakirisito eti: “Orwo mwatoire ekigambokye ekyo mwahuliire ahali ichwe, timwakikunzire nka kigambo kya bantu, mukakikunda okwo kikali, kigambo kya Ruhanga.” (1 Abatesalonika 2:13) Omwegashanizo gw’amazima kisaine gwebemberwe ebili omu Bibulia, gutebemberwa bitekelezo by’abantu, aha migenzo anga aha kintu ekindi kyona kyona.

⁷ Ebintu byona ebyo Yesu yayegesize, byayebemberwaga Ekigambo kya Katonda. (Shoma Yohana 17:17.) Emirundi nyingi akajuliza Ebihandiiko. (Matayo 4:4, 7, 10) Abesigwa ba Katonda, nibahondera obulebero bwa Yesu, n’ebyo balikwegesa nibyebemberwa Ebibulia.

8. Yesu akatwegesaki ekikwete aha kufukamira Yehova?

⁸ Nitwetagwa kufukamira Yehova wenkai. Ezaburi 83:18, NW negamba eti: “Abantu bamanye nk’okwo iwe niwe oyetwa Yehova, iwe wenka niwe oikara eiguru muno eiguru y’ensi yona.” Yesu akaba nayenda abantu bamanye Katonda ow’amazima, niyo nshonga akabegesa eibara lya wenene. (Shoma Yohana 17:6.) Yesu akagamba ati: “Orafukamiraga Yehova wawe mara wenene wenkai obe niwe okolera.” (Matayo 4:10, NW) Abesigwa ba Katonda, nibahondera obulebero bwa Yesu. Nitufukamira Yehova wenkai, nitwegesa abandi eibaralye, neby’aratukolera kanya akalikwija.

9, 10. Nitubasa kworekya tutai nk’okwo nitugonza abantu abandi?

⁹ Nitwetagwa kugonza abantu. Yesu akegesa abegesibwabe bagonzangane. (Shoma Yohana 13:35.) Nitwendangana, n’orwo tutali bantu bangeli emoi anga emilelerwe emoi. Engonzi nizitujwanganisa hamoi kuba barumuna. (Abakolosai 3:14) Niyo nshonga, titulikwetahya mundashana anga kwita abandi. Ebibulia negamba  eti: “Aha niho abali baana ba Ruhanga n’abaana ba Sitani bakubonekera. Atakora kurungi taba wa Ruhanga, nangu n’atagonza murumuna abulimu.” Ashuba ayongeraho ati: ‘Nituragirwa kugonzangana, tutashusha Kaini ayabaire ali wa Sitani akaita omurumuna.’​—1 Yohana 3:10-12; 4:20, 21.

¹⁰ Nitukoza akanya, amani, neitunga lyaitu kujunangana n’okutekanganamu ekihika. (Abaheburania 10:24, 25) ‘Nitukolera kurungi abantu bona.’​—Abagalasia 6:10.

11. Kubaki nitwesiga nk’okwo Yesu niwe muhanda ogulikutuhabura kugya ahali Katonda?

¹¹ Nitwetagwa kworobera Yesu orw’okuba wenene niwe muhanda ogulikutwebembera ahali Katonda Ebibulia negamba eti: “Taliho ondijo n’omoi aya kushobora kurokora muntu, kuba omu nsi yona taliho muntu n’omoi owo Ruhanga atutungire kuturokora atali ogu.” (Ebikorwa 4:12) Omu Mutwe ogwa 5 ogw’ekitabo eki tukega nk’okwo Yehova akatweka omwanawe Yesu omu nsi kahayo oburorabwe bube kichunguzo aha bantu abalikwesiga Katonda. (Matayo 20:28) Yehova aronkire Yesu kaba Mukama w’okutwara ensi. Niyo nshonga Ebibulia netugambira nk’okwo katulaba nitwenda kutura eirai lyona, nitwetagwa kworobera Yesu.​—Shoma Yohana 3:36.

12. Kubaki tutali kwetahya musiasa?

¹² Titulikwetagwa kwetahya musiasa. Yesu tiyayetahize musiasa. Orwo omushangogwe gwabaire niguhulilizibwa, Yesu akagambira omutwazi wa Roma ayayetwaga Pilato ati, “Obukama bwange ti bwa nsi egi.” (Shoma Yohana 18:36.) Nk’okwo Yesu yakozire, ichwe nitwekwata obukama bwa Katonda aha rw’ekyo titulikwetahya musiasa. Kyonka, Ebibulia neragira “Buli muntu agire omuhuliro aha batwazi.” (Abaroma 13:1) Nitukunira amateka gensi. Kyonka, amateka g’ensi orwo galikuba  gatalikugendwanwa na miku ya Katonda titulikugaikiliza, nituhondera obulebero bw’entumwa obulikugamba buti: “Turagiirwe kuhulira Ruhanga kushaaga okuhulira abantu.”​—Ebikorwa 5:29; Mariko 12:17.

13. Niturangilira makuruki agakwete aha bukama bwa Katonda?

¹³ Nitwesiga nk’okwo Obukama bwa Katonda bwonkai nibwo bwakubasa kwihyaho amatangwa amoi n’amashasi g’ensi yona. Yesu akagamba ati, “evangeli egi y’obukama” elirangilirwa omu nsi yona. (Shoma Matayo 24:14.) Tihaliho butwazi bw’abantu obwakubasa kukora ebintu eby’Obukama bwa Katonda burakora. (Ezaburi 146:3) Yesu akatwegesa katushaba Obukama bwa Katonda orwo yagambire ati: “Obukama bwawe bwije, eby’ogonza bikorwe omu nsi nk’omwiguru.” (Matayo 6:10) Ebibulia neshobolora okwo Obukama bwa Katonda bulasiliikya obutwazi bwona obw’abantu, kandi Obukama obwo “bulikaraho eirai lyona.”​—Danieli 2:44.

14. Nibahai abali kufukamira Katonda omu ngeli elikugasha?

¹⁴ Kolikumara kwega ebintu ebyo, oyebaze oti: ‘Nibahai abo emyegeso yabo elikwebemberwa Ebibulia? Nibahai abalikwegesa eibara lya Katonda? Nibahai abaina engonzi z’amazima mara nibesiga okwo Katonda yatwekire Yesu omu nsi abase kuturokora? Nibahai abatakwetahya musiasa z’ensi egi? Nibahai abalikurangilira nk’okwo Obukama bwa Katonda bwonka nibwo bwakubasa kwihyaho amatangwa n’amashasi g’abantu?’ Bajulizi ba Yehova bonka.​—Isaya 43:10-12.

15. Nitwetaga kukoraki Katonda abase kwikiliza omwegashanizo gwaitu?

¹⁵ Tikilikumara kwesiga okwo aliho Katonda. Orw’okuba n’amasitani nigesiga okwo Katonda aliho, kyonka tigalikumworobera. (Yakobo 2:19) Katurayenda Katonda  aikilize omwegashanizo gwaitu tikisaine kwesiga kushai tuti Katonda aliho, nitwetaga kukora ebyo alikwenda.

16. Kubaki nitwetaga kwanga kwema hamoi n’edini z’ebishuba?

¹⁶ Katurayenda Katonda kaikiliza omwegashanizo gwaitu, tikisaine kwema hamoi n’edini z’ebishuba. Omurangi Isaya akahandiika ati: “Mushohore Babiloni mweshemeze.” (Isaya 52:11; 2 Abakorinto 6:17) Niyo nshonga nitwetaga kwanga buli kintu ekikwete aha dini z’ebishuba.

17, 18. “Babiloni Ekihango” kiki? Isi, kubaki nikigasha kulekera kwema hamoi nawe?

¹⁷ Edini z’ebishuba nizihai? Nizilinya zona ezilikwegesa ebitalikugendanwa n’ekigambo kya Katonda. Ebibulia neyeta edini ezo zona “Babiloni Ekihango.” (Okushurulirwa 17:5, NW) Isi, kubaki nizetwa zityo? Orwo ebiro by’omutunga gwa Noa byalabireho, emyegeso y’edini z’ebishuba ekabandiza omu kigo kya Babiloni. Emyegeso egyo ey’ebishuba ekagendeshelezibwa omu nsi yona. Obulebero bumoi nibw’obu, abantu ba Babiloni bafukamiraga emizimu eshatu. Kany’aka, edini zingi nizegesa nk’okwo Katonda ali omu bushatu. Kyonka Ebibulia neyegesa nk’okwo aliho Katonda omoi ow’amazima [Yehova,] na Yesu Kirisito omwanawe. (Yohana 17:3) Abantu ba Babiloni bakaba nibesiga nk’okwo omwoyo gw’omuntu gugendelera kurora orwo amara kufa kandi nabasa kubonabonesibwa omu muliro ogutalihwaho. Kyonka omwegeso ogwo n’ogwebishuba.​—Shoma Ekishoborozo Ekyongeirweho 14, 17, and 18.

¹⁸ Katonda naranga nk’okwo omu kanya kake naija kusilikya edini zona ez’ebishuba. (Okushurulirwa 18:8) Isi, noshobokerwa kubaki nikigasha kurugamu bwangu omu dini z’ebishuba? Yehova nayenda okore otyo bwangu atakaizile kusiliikya edini ezo.​—Okushurulirwa 18:4.

19. Yehova naija kukoraki koraramura kumukolera?

 ¹⁹ Orw’olikuramura kuruga omu dini z’ebishuba, okabanza kukora ebyo Yehova alikwenda, banywanyi bawe anga abanyaruganda bawe bakwanga kwikiliza oburamuzi bwawe, nangu orundi bakubanza kukuhakanisa. Kyonka Yehova taina kukunaga. Orayema hamoi n’ekaye empango eina engonzi z’amazima omu nsi yona, kandi oraba oina eshubi ey’okwija kwikara eirai lyona omu nsi empya eya Katonda. (Mariko 10:28-30) Nangu akanya akalikwija, wakushanga banywanyi bawe n’abanyaruganda abayangaga oburamuzi bwawe obw’okukolera Yehava nibaramura kwega Ebibulia.

20. Kubaki kintu ky’omugasho muno kufukamira Katonda omu ngeli elikugasha?

²⁰ Akanya kali haihi, Katonda naija kusiliikya ababi bona, aho Obukamabwe bulatwara ensi yona. (2 Petero 3:9, 13) Ako kaliba kali kanya karungi muno! Abantu bona nibaija kufukamira Yehova omu ngeli eyo alikwikiliza. Aha rw’ekyo, nikigasha muno ahali iwe kuramura kufukamira Katonda omu ngeli elikugasha.