1. Katonda akatonda abantu aina kigendeleroki?

KATONDA aina ekigendelero kirungi aha bantu. Akatonda Adamu na Eva, omushaija n’omukazi abambere babase kutura omu busitani nungi. Ekigendelero kya wenene kikaba kili nk’okwo bazare abana, n’okukora ensi yona keba Paradiso, n’okwemelerera ebigunju.​—Embandizo 1:28; 2:8, 9, 15; shomaEkishoborozo Ekyongeirweho 6.

2. (a) Nitumanya tutai nk’okwo Yehova alakora nk’okwo yagendeleire? (b) Ebibulia negambaki ebikwete aha kutura eirai lyona?

² Isi, n’otekereza nk’okwo turatura omu nsi eraba eli Paradiso? Yehova natugambira ati: “Nagambire mara ebyo ngambire ndabigobesheleza.” (Isaya 46:9-11; 55:11) Nikwo, alakora nk’okwo agendeleire, taliho kintu kyakubasa kumutanga. Yehova nagamba nk’okwo akatonda ensi aina ekigendelero. “Taragitonzire ataina nshonga.” (Isaya 45:18) Nayenda abantu bature omu nsi yona. Bantu abangeliki abo Katonda alikwenda kabatura omu nsi, isi, bagituremu emyaka engahai? Ebibulia negamba eti: “Abagorogoki balisika ensi bagituremu eirai lyona.”​—Ezaburi 37:29 NW; Okushurulirwa 21:3, 4.

3. Arw’okuba abantu nibarwara n’okufa, aliyo orwo wakubaza kibazoki?

³ Kany’aka abantu nibarwara n’okufa. Omu bichweka bingi, abantu nibarwana n’okwitangana. Mazima, ekyo kikaba kitali kigendelero kya Katonda. Aho nikihai ekyabaireho? Isi, kubaki? Ebibulia yonka niyo yakubasa kutuha empororo.

4, 5. (a) N’ohai ayakolize enjoka kufumora na Eva omu busitani ya Edeni? (b) Omuntu omurungi yakubasa atai kuhinduka n’okuba mushuma?

⁴ Ebibulia netugambira nk’okwo Katonda aina omubisha “alikwetwa Ibilisi mara Sitani.” Sitani akakoza enjoka kufumora na Eva omu busitani ya Edeni. (Okushurulirwa 12:9; Embandizo 3:1) Akakora kiboneke nk’okwo enjoka niyo yabaire nefumora​—Shoma Ekishoborozo Ekyongeirweho 7.

⁵ Isi, Katonda akatonda Sitani Ibilisi? Chei! Ogwo akaba ali Mumalaika omwiguru, orwo Katonda yabaire natonda ensi eyo Adamu na Eva bakwikairemu. Akahinduka yaba Ibilisi. (Yobu 38:4, 7) Twakwebaza; ekyo nikibasikana kitai? Tekerezaho ekintu eki: Omuntu murungi yakubasa atai kuhinduka n’okuba mushuma? Taliho muntu azarwa ali mushuma. Kyonka omuntu ogwo yakwegomba anga kwenda ekintu ekitali kya wenene. Orwo yakugendeleza ebitekerezo ebyo, nikwo amairuge gabi gakugendelera kweyongera. Orwo yakubona akashango yakwiba. Yayehindura kuba mushuma.​—Shoma Yakobo 1:13-15; shoma Ekishoborozo Ekyongeirweho 8.

6. Malaika akahinduka atai kuba mubisha wa Katonda?

⁶ Malaika ogwo [Sitani] akakora atyo. Yehova orwo yatonzire Adamu na Eva, akabagambira bazare abana ‘baijuze ensi.’ (Embandizo 1:27, 28) Rundi malaika ogwo akatekereza ati, ‘Abantu aba basaine kwegashaniza ahalinye kushaga kwegashaniza ahali Yehova!’ Amairuge gakagendelera kweyongera orwo yagendeleire kutekereza ekintu ekyo. Malaika ogwo akenda abantu begashanize ahali wenene kushaga kwegashaniza ahali Yehova. Akabeiya n’okuhabisa Eva abase kugobesheleza ekindelerokye.  (Shoma Embandizo 3:1-5.) Omu kukora atyo, akaba Sitani Ibilisi, kityo yaba mubisha wa Katonda.

7. (a) Nikihai ekyakozire Adamu na Eva kabafa? (b) Kubaki nituba bagurusi n’okufa?

⁷ Adamu na Eva bakanga kuhuliliza Katonda balya ekiraba ekyobatangirwe. (Embandizo 2:17; 3:6) Orw’okuba bakakora entambara ahali Yehova, aha nzindo bakafa, nk’okwo Yehova yabaire agambire. (Embandizo 3:17-19) Orw’enshonga egyo, abana ba Adamu na Eva bakasika entambara, aha rw’ekyo nabo nibafa. (Shoma Abaroma 5:12.) Obase kushobokerwa oruzaro rwa Adamu na Eva okwo basikire entambara, tekerezaho enfumo egi. Tugambe n’okora ekintu n’orutiba rulemaire, ekintu ekyo kilarugamu kilemaire. Adamu akakora entambara orwo yayangire kworobera Katonda. Orw’okuba ichwe tuli ruzaro rwa Adamu, tukasika “akamogo” konene konene ak’entambara. Orw’enshonga y’entambara, nituba bagurusi n’okufa.​—Abaroma 3:23; Shoma Ekishoborozo Ekyongeirweho ekya 9..

8, 9. (a) Sitani akenda Adamu na Eva besigeki? (b) Kubaki Yehova atasiliikize bashengi abo aho nao?

⁸ Sitani akashenga Yehova orwo yarembalembire Adamu na Eva bange kworobera Katonda. Akaba nayenda Adamu na Eva babase kwikiliza nk’okwo Yehova mubeihi mara mutwazi mubi atalikwenda kabashemelerwa mitulire yabo. Sitani akagamba nk’okwo abantu tibakwetaga kuhanulirwa Katonda, na nk’okwo Adamu na Eva basaine kweramulira ebintu ebilikugasha n’ebitalikugasha. Yehova yakukozireki? Yakubasize kwita abashengi abo n’okumaraho obushengi. Isi, notekereza nk’okwo ekintu ekyo kyakwolekire nk’okwo Sitani n’omubeihi? Chei.

⁹ Aha rw’ekyo, Yehova tiyasiliikize bashengi abo aho  nao orwo bamushengire. Akajubura akanya karabeho abantu babase kweramulira ebirungi n’ebibi bonene bonka. Kukora atyo kwakumanyisize nk’okwo Sitani n’omubeihi na nk’okwo Yehova niwe alikumanya ebintu ebilikugasha abantu. Turayega bingi ebikwete aha kintu ekyo omu Sura eya 11. Kyonka, oburamuzi obwo Adamu na Eva bakozire n’obubona otai? Isi bakaba baina enshonga y’okutorobera Katonda n’okwesiga Sitani? Yehova niwe yabahaire buli kantu akobabaire nibetaga. Akabaha oburora obuhikiliire, obwikaro burungi obulikushemera,  n’emilimo eyobashemeleirwe. Kyonka Sitani tiyabahaire kintu kyona kyona. Kayakubaire ali iwe, wakukozireki?

10. Chwena twina obwegeleere bw’okukora buramuziki?

¹⁰ Kany’aka, ichwe chwena twina obwegeleere obw’okuramura kukora ekintu kyona kyona, n’emitulire yaitu eyemeleire aha buramuzi obwo. Nitubasa kuramura kworobera Katonda kuba mutwazi waitu n’okworekya nk’okwo Sitani mubeihi. Anga twakubasa kuronda Sitani abe mutwazi waitu. (Ezaburi 73:28; shoma Emigani 27:11.) Kany’aka, bantu bake muno omu nsi abalikuramura kworobera Katonda. Ekyo nikyorekya nk’okwo Katonda tiwe mutwazi w’ensi egi. Katonda karaba atali mutwazi w’ensi egi, aho netwarwa ohai?

11, 12. (a) Endagano ya Sitani neyorekya etai nk’okwo wenene niwe mutwazi w’ensi? (b) Ni bihandiikoki ebilikworekya nk’okwo Sitani niwe mutwazi w’ensi?

¹¹ Yesu akaba namanya omutwazi w’ensi. Aliho akanya ako Sitani ‘yamwelekire engoma zona z’omu nsi n’ekitiinwa kyazo.’ Sitani akashuba yaraganisa Yesu ati: “K’orabandama okanfukamira, engoma ezi zona ndazikuha.” (Matayo 4:8, 9; Luka 4:5, 6) Oyebaze, ‘Engoma ezo kazakubaire zitali za Sitani, isi, yakuragaine kuziha Yesu?’ Chei. Eserikali zona ezili omu nsi n’eitunga lya Sitani.

¹² Aliyo orwo wakwebaza: ‘Kyakubasikana kitai Sitani kuba mutwazi w’ensi egi? Isi, ti Yehova, Katonda Rushobora byona, ayatonzire ensi?’ (Okushurulirwa 4:11) Mazima, Yehova niwe mutonzi, kyonka Yesu akagamba okwo Sitani niwe “mutwazi w’ensi egi.” (Yohana 12:31; 14:30; 16:11) Entumwa Paulo eketa Sitani Ibilisi “ruhanga w’ensi egi.” (2 Abakorinto 4:3, 4) N’entumwa Yohana ekahandiika nk’okwo “ensi yona eli omu mani g’omubisha.”​—1 Yohana 5:19.

13. Kubaki nitwetaga ensi empya?

¹³ Ensi n’egendelera kuba mbi muno. Eijwire endashana, obufisadi, obugobya, hamoi n’obukuutu. N’orwo abantu bakwekaza batai, tibashobora kwihyaho amashasi ago. Kyonka, kanya kake Katonda naija kusiliikya ensi egi embi omu ndashana ya Arimagedoni n’okureta ensi eina obugorogoki.​—Okushurulirwa 16:14-16; shoma Ekishoborozo Ekyongeirweho 10.

14. Katonda aronkire owai kaba niwe Mukama w’Obukamabwe? Ebibulia ekarangaki ebikwete ahali Yesu?

¹⁴ Yehova akaronda Yesu Kirisito kaba Mukama w’Obukama bwa wenene bw’omwiguru. Emyaka mingi elabireho, Ebibulia ekaranga nk’okwo Yesu yakutwete ali “Mukama w’emilembe” n’obutwazibwe tibwakugizire ndekelero. (Isaya 9:6, 7) Yesu akegesa abahondezibe bashabe ebikwete aha butwazi obwo orwo yagambire ati: “Obukama bwawe bwije eby’ogonza bikorwe omu nsi nk’omwiguru.” (Matayo 6:10) Omu Mutwe gwa 8, turayega okwo Obukama bwa Katonda burasiliikya obutwazi bw’ensi egi n’okubanza kutwara ensi. (Shoma Danieli 2:44.) Aha nzindo, Obukama bwa Katonda bulakora ensi keba Paradiso.​—Shoma Ekishoborozo Ekyongeirweho 11.

15. “Ensi empya” kiki?

¹⁵ Ebibulia negamba eti: “Kuhondera okwo yaturaganisize ichwe tulindilire eiguru elihya n’ensi empya, mbali obugorogoki butura.” (2 Petero 3:13; Isaya 65:17) Omu kanya akandi ekigambo “ensi” omu Bibulia nikyorekya abantu abalikutura omu nsi. (Embandizo 11:1) Kityo “ensi empya” eina obugorogoki  neshananganisibwa n’abantu bona abalikwikilizibwa Katonda.

16. Balinya abaratura omu nsi eraba eli Paradiso barahabwaki, naichwe kisaine tukoreki?

¹⁶ Yesu akaragana kubaha “oburora obutahwao” balinya abaratura omu nsi empya eya Katonda. (Mariko 10:30) Tusaine kukoraki tubase kubona oburora obutalihwao? Obase kubona empororo nitukutagiliza oshome Yohana 3:16 n’omutwe gwa17:3 Leka tulebe Ebibulia ebyo elikugamba ebikwete aha mitulire omu nsi eli Paradiso.

17, 18. Nitumanya tutai nk’okwo alibaho emilembe n’obuchurezi omu nsi?

¹⁷ Obubi, endashana, obushuga hamoi n’obukuutu bilibabitaliho. Abantu bona ababi baliba bataliho. (Ezaburi 37:10, 11) Yehova, ‘ensi yagichwa endashana kugoba omu mperero.’ (Ezaburi 46:9; Isaya 2:4) Ensi yona eraijura abantu abalikumwenda n’okumuhuliliza. Alibaho emilembe eirai lyona.​—Ezaburi 72:7.

¹⁸ Abantu ba Yehova baligira obuchurezi. Omu makiro g’Ebibulia Abaisiraeli orwo bayorobeire Katonda, bakagira obuchurezi orw’enshonga akabalinda. (Eby’abalevita 25:18,19) Omu nsi eraba eli Paradiso titukwija kutina muntu wena wena anga kintu kyona kyona. Tulagira obuchurezi akanya kona!​—Shoma Isaya 32:18; Mika 4:4.

19. Kubaki nitwesiga nk’okwo alibaho ebyakulya bingi omu nsi empya eya Katonda?

¹⁹ Alibaho ebyakulya bingi. “Ensi eyeze emyaka; Emyaka eyere muno aha bushozi bw’amabanga.” (Ezaburi 72:16) Yehova, “Katonda waitu yatutunga omugisha,” “n’ensi yayeza emyaka.”​—Ezaburi 67:6.

20. Nitumanya tutai nk’okwo ensi neija kuba Paradiso?

²⁰ Ensi yona neija kuba paradiso. Abantu nibaija  kuba baina enju n’ebibanja birungi. (Shoma Isaya 65:21-24; Okushurulirwa 11:18.) Ensi yona neija kuba nungi muno nk’ebusitani ya Edeni okwo yabaire eli. Yehova naija kugobeshereza ametage gaitu gona. Ebibulia nemugambaho eti: “Obumburura engaro zawe oigusa buli Kitondwa okwo kyaba nikyenda.”​—Ezaburi 145:16.

21. Nitumanya tutai nk’okwo alibaho emilembe omu bigunju n’omu bantu?

²¹ Alibaho emilembe omu bigunju n’omu bantu. Ebigunju tibilyema kubi bantu rundi. Abana barayehulirage, n’orwo baraba bali omugati y’ebigunju ebilikukara birebi.​—Shoma Isaya 11:6-9; 65:25.

22. Yesu naija kukoleraki abarwaire?

²² Tihalibaho ndwara. Yesu akakiza abantu bangi orwo yabaire aly’omu nsi. (Matayo 9:35; Mariko 1:40-42; Yohana 5:5-9) Yesu orwo araba ali Mukama w’Obukama bwa Katonda, arakiza buli muntu. Taliho muntu aragamba ati: “Ndi murwaire.”​—Isaya 33:24; 35:5, 6.

23. Katonda naraganisaki ebikwete aha bafu?

²³ Abafu nibaija kuhimburwa. Katonda naraganisa nk’okwo naija kuhimbura embaga y’abantu. “Alibaho okuhimbuka kwa bagorogoki n’abatari bagarogoki.”​—Shoma Yohana 5: 28, 29; Ebikorwa 24:15, NW.

24. Nobona otai kutura omu Paradiso?

²⁴ Chwena twina obwegeleere obwo kweramulira. Twakubasa kuramura kwega n’okukolera Yehova, anga kukora ekyo tulikwenda. Katularamura kukolera Yehova nitwija kushemelerwa ebintu ebirungi akanya akalikwija. Orwo omushaija omoi yagambire Yesu amwijuke orwo alafa, nirwo Yesu yaragaine ati: “Oraba oli hamoi nanye omuli Paradiso.” (Luka 23:43) Leka tugendelere kwega bingi ebikwete ahali Yesu Kirisito n’okwo aragobeshereza endagano zirungi za Katonda.