1. N’ohai ayakubasa kuranga ebintu eby’akanya akalikwija?

ISI, orahulire etaarifa y’ehabari n’okwebaza oti, ‘kubaki ebintu nibigendelera kuba bibi?’ Ensi eijwire ebibundo n’obukatili ebilikukora abantu abandi besige nk’okwo enzindo y’ensi egi eli haihi muno. Isi, nikwo enzindo eli haihi? Isi, aliyo omuhanda gwona gwona ogwa kutumanyisa ekintu ekyo? Ego. Abantu tibashobora kuranga ebintu eby’akanya akalikwija. Yehova wenka niwe yakubasa kuranga ebintu ebyo. Omu Bibulia natushoborora ebikwete aha kanya akalikwija ak’ensi n’abantu.​—Isaya 46:10; Yakobo 4:14.

2, 3. Abegesibwa ba Yesu bakaba nibenda kumanyaki, na Yesu akabagambiraki?

² Enzindo y’ensi elikugambwa omu Bibulia, niyo nzindo y’obubi bwona ti kusilikiibwa kwa nsi nyabusi. Yesu akegesa abantu nk’okwo Obukama bwa Katonda nibwija kutwara ensi. (Luka 4:43) Abegesibwa ba Yesu bakaba nibenda kumanya Obukama bwa Katonda bwakwizire maki, nabo bakabaza Yesu bati: “Ebi nibibaho maki n’akabonero k’okwija kwawe n’ekiro ky’amaheleruka ni kahai?” (Matayo 24:3) Yesu tiyagambire kiro kyonene kyonene, kyonka akabashobolora ebintu ebyakuzokire enzindo y’ensi etakagobire. Ebintu ebyo Yesu yagambire nibiboneka omu biro ebi.

³ Omu mutwe ogu, nitwija kuleba ebintu ebilikworekya nk’okwo tuli omu biro by’enzindo. Ekya mbere, nitwetaga kuleba endashana eyarashainwe  omwiguru, eya kozire ebintu bibe bibi muno omu nsi.

4, 5. (a) Nikintuki ekyazokire omwiguru orwo Yesu yahairwe obukama? (b) Nk’okwo ekitabo ky’Okushurulirwa 12:12 kilikugamba, nikintuki ekyazokire orwo Sitani yanagirwe omu nsi?

⁴ Omu Mutwe gwa 8 tukega okwo Yesu akatekwaho kuba mukama omwiguru omu mwaka gwa 1914. (Danieli 7:13, 14) Ekitabo ky’Okushurulirwa nikibarura ebintu ebyabaireho: “Aho endashana eimuka omwiguru. Mikaili [Yesu] n’abamalaikabe barashanisa Ekinyamgenge [Sitani] n’abamakaika bakyo lirashana.” * Sitani n’abamalaikabe bakakunturwa omu nsi. Banza otekeleze abamalaika okwo bashemeleirwe! Isi, kikaba kitai omu nsi? Ebibulia negamba nk’okwo kakubaire akanya kokubonabona kungi omu bantu. Kubaki? Orw’enshonga Ibilisi aina ekiniga kingi, “namanya okwo akanyake kasigara kagufi.”​—Okushurulirwa 12:7, 9, 12.

⁵ Ibilisi alesire okubonabona kungi omu nsi. Aina ekiniga kingi orw’enshonga aina akanya kagufi Katonda atakamusiliikize. Reka mbwenu tulebe ebintu ebyo Yesu yagambire ebyakuzokire omu biro by’enzindo.​—Shoma Ekishoborozo Ekyongeirweho.

6, 7. Endashana amoi n’eifa bilesire rushengoki omu nsi?

⁶ Endashana. Yesu akagamba ati: “Eihanga lilitabalira elindi, n’obukama bulitabalira obundi.” (Matayo 24:7) Omu biro byaitu abantu bangi bafeleire omu  ndashana kushaga omu kanya akandi omu makuru ageirai lya karai. Eripoti emoi ey’eishirika lya Worldwatch negamba okwo abantu abalikushaga emilioni kikumi bafeleire omu ndanshana kwema omwaka gwa 1914. Orubara rw’abantu abafeleire omu ndashana omu myaka kikumi, kwema omwaka gwa 1900 kugoba 2000 nirushaga emirundi eshatu ey’abantu abafire omwaka gwa 1900 gutakagobire. Tekerezaho obushasi bungi obwo abantu baboine orw’eshonga y’endashana!

⁷ Eifa. Yesu akagamba ati: “Halibaho n’eifa.” (Matayo 24:7) N’orwo abantu abandi balikulima muno kushaga eirai, kyonka abantu abali bangi tibaina kyakulya kyakubaigusa. Kubaki? Orw’enshonga tibaina mahera gakugura byakulya by’okubaigusa nangu tibaina bibanja byakulimamu. Abantu abalikushaga ebilioni emoi banaku muno. Eishirika lye afya niligamba nk’okwo amamilioni g’abana nibafa buli mwaka orw’enshonga ya utapiamlo.

8, 9. Nibintuki ebilikworekya nk’okwo oburangi bwa Yesu obukwete aha ndwara n’emisisi nibugobesherezibwa?

 ⁸ Emisisi y’ensi. Yesu akaranga ati: “Halibaho emisisi y’amani.” (Luka 21:11) Emisisi y’amani neboneka buli mwaka. Kwema omwaka gwa 1900, abantu abalikushaga emilioni ibili bakafa orw’enshonga y’emisisi. N’orwo eteknolojia ejunire abantu kumanya emisisi etakabaireho, kyonka emisisi ekyeita abantu bangi.

⁹ Endwara. Yesu akaranga nk’okwo hakubaireho “ebibundo.” Endwara ezili kutulira bwangu niziita abantu bangi. (Luka 21:11) Kandi akyariho endwara ezitaina mubazi. Elipoti emoi negamba nk’okwo buli mwaka abantu bangi nibafa orw’enshonga y’okurwara orufuba, maleria, na kipindupindu. Kushagaho ezo, abatambi baboine endwara ezihya ezilikushaga 30 n’omulyezo ezindi tizina mubazi.

10. Oburangi bwa 2 Timoteo 3:1-5, NW nibugobesherezibwa butai kany’aka?

¹⁰ Ekihandiiko kya 2 Timoteo 3:1-5, NW nikigamba kiti:  “Omu biro by’amaheleruka alibaho amakiro g’enaku.” Entumwa Paulo ekashoborora okwo entwaza z’abantu zakubaire zili omu biro by’enzindo. Akagamba ati abantu bakubaire.

• Nibeyenda

• nibagonza empiya

• abatorobera bazaire

• abatali mahika omu bwesigwa bwabo

• abatagonza babo

• abatebalira

• abakuutu

• abagonza kweshemereza kushaga kushemereza Katonda

• abaina emishusire y’okwehongera Katonda kyonka tibaina bikorwa

11. Nk’okwo Ezaburi 92:7 elikugamba, abantu ababi nibaija kugwebwahoki?

¹¹ Isi, mbali olikwikara abantu nikwo bali? Nikwokili omu nsi yona. Kyonka omu kanya kagufi Katonda naija kwihyaho abantu ababi. Naragana ati: “N’orwo ababi bamera nk’obunyansi, nabafakare bona bakagoshoka, bainayo ekiro ibonero.”—Ezaburi 92:7.

12, 13. Ni bintuki ebyo Yehova atwegesize omu biro by’enzindo?

¹² Ebibulia ekaranga nk’okwo omu biro by’enzindo, ensi yona yakwijwire okubonabona n’amashasi. Kandi negambaho n’ebintu ebirungi ebyakubaireho.

¹³ Obushobokerwa bw’Ebibulia. Omurangi Danieli akaranga ebikwete aha biro by’enzindo. Akahandiika ati: “Obumanyi bw’amazima buliba bungi.” (Danieli 12:4, NW) Katonda yakujunire abantube babase kushobokerwa Ebibulia kurungi kushaga okwo kyabaire kili orwakarai. Yehova akozire atyo kwema omu mwaka gwa 1914. Yatwegesize ebintu bingi nk’eibaralye, ekigendelerokye ky’okutonda ensi, amazima agakwete aha kichunguzo, okwo abafu bali, n’eshubi y’okuhimburwa. Twegire nk’okwo Obukama bwa Katonda bwonka nibwo bwakubasa kwihyaho okubonabona kwaitu kwona. Kandi twegire okwo twakubasa kugira ebyera n’okwo twakushwemereza Katonda omu mitulire yaitu. Kyonka abajulizi ba Katonda mbakoza batai ebintu ebyobalikwega? Oburangi obundi buratujuna kubona empororo.​—Shoma Ekishoborozo Ekyongeirweho 21 na 25.

14. Amakuru garungi g’obukama nigarangilirwa omu nsi n’endimi zingahai, nibahai abalikugarangilira?

¹⁴ Omulimo gw’okurangilira omu nsi yona. Orwo yabaire nafumoraho ebiro by’enzindo, Yesu akagamba ati: “Evangeli ey’obukama bw’omwiguru elirangilirwa omu nsi yona.” (Matayo 24:3, 14) Amakuru garungi g’obukama nigarangilirwa omu ndimi ezilikushaga 700 omu nsi ezirikushaga 230. Kityo, omu nsi zona, Abajulizi ba Yehova kuruga “buli ihanga, ab’enganda zona” nibajuna abantu kushobokerwa Obukama bwa Katonda  n’ebyo burakolera abantu. (Okushurulirwa 7:9) Omu kukora omulimo ogwo tibalikuhabwa mahera. N’orwo abantu bangi balikubahakanisa n’okubabonabonesa, tihaliho kintu kyona kyona ekyakutanga omulimo gw’okurangilira gutakorwa nk’okwo Yesu yarangire.—Luka 21:17.

15. (a) Isi, noyesiga nk’okwo nitwikara omu biro by’enzindo, kubaki? (b) Balinya abatalikworobera Katonda nibaija kugwebwahoki? (c) Balinya abali kworobera Katonda nibaija kubonaki?

¹⁵ Isi, noyesiga nk’okwo nitwikara omu biro by’enzindo? Oburangi bungi obukwete aha biro by’enzindo bwagobesherezibwe. Omu kanya kagufi Yehova naija kwemereza okurangilira, “n’enzindo” neija kwija. (Matayo 24:14) Enzindo kiki? Enzindo niyo ndashana ya Arimagedoni, Katonda orwo alasiliikya abantu ababi. Yehova naija kutweka Yesu hamoi n’abamalaika kusiliikya abantu bona abatalikworobera Katonda n’omwanawe. (2 Abatesalonika 1:6-9) Aha nzindo, Sitani na amasitanige tibalishuba kubeihya bantu rundi. Balinya abalikworobera Katonda n’okwikiliza Obukamabwe, barabona okugobesherezibwa kw’oburangi bwona bwa Katonda.—Okushurulirwa 20:1-3; 21:3-5.

16. Orw’okuba enzindo eli haihi muno, noyetaga kukoraki?

¹⁶ Omu kanya kagufi, Ensi egi elikutwarwa Sitani neija kusiliikibwa. Kityo, kisaine oyebaze oti, ‘Ninyetaga kukoraki?’ Yehova nayenda ogendelere kwega Ebibulia. Kandi otakujaramuka omu kwega Ebibulia. (Yohana 17:3) Buli wiki, Abajulizi ba Yehova nibaterana omu nkiiko ezilikujuna abantu kushobokerwa Ebibulia. Oyekaze kuterana omu nkiiko ezo. (Shoma Abaheburania 10:24, 25.) Koramanya okwo olikwetaga kuhinduraho  engesho zawe orw’enshonga yabilinya eby’olikwega, otakwanga kukorakwo. Omu kukora otyo noija kuhamisa obunywanyi bwawe na Yehova.​—Yakobo 4:8.

17. Kubaki abantu bangi nibaija kwechura orwo enzindo eragoba?

¹⁷ Entumwa Paulo ekagamba nk’okwo okusiliikibwa kwa abantu ababi kulija batakwetegeire “nk’omushuma omwitumbi.” (1 Abatesalonika 5:2) Yesu akaranga nk’okwo abantu bangi tibakwetaireho bilinya ebilikworekya okwo tuli omu biro by’enzindo. Akagamba ati: “Emiizire y’Omwana w’Omuntu elishusha ebyabaireho omu makiro ga Noa. Manyasi omutunga gutakaizire abantu bakaba nibalya, nibanywa, nibashwera, nibashwerwa, kuhika ekiro ekyo Noa yatahiire omu bwato. Mara tibaina kyobamanyire, omutunga gwalemwa gwaija gwabamira gwabamaraho, nikwo n’emiizire y’Omwana w’Omuntu eliba.”​—Matayo 24:37-39.

18. Yesu akatutatira atai?

¹⁸ Yesu akatutira tutakuhugisibwa “kulya kushagulirana, etamilo n’akahangahango.” Akagamba okwo enzindo yakwizire kibandagara, “nk’omubarashuka.” Kandi akagamba ekiro ekyo “kilizira bona abatura hona hona omu nsi zona.” Kandi akagendelera kugamba ati: “Kityo, mwikare mwetekatekire buli kanya mushangwe nimushaba enshara nirwo mulibona amani g’okuhunga aha bintu ebi ebilibaho, n’okwemelera omu maisho g’omwana w’omuntu.” (Luka 21:34-36) Kubaki nikigasha kuhuliliza ekitatiro kya Yesu? Orw’enshonga obutwazi bwa Sitani nibwija kusiliikibwa, omu kanya kagufi akalikwija. Abalarokorwa n’okutura omu nsi empya nibalinya bonka abo Yehova na Yesu balikwikiliza.​—Yohana 3:16; 2 Petero 3:13.