ORW’OLIKUSHOMA amagazeti, kuleba etelevisheni, anga kuhuliliza eredio nohulira amakuru gangi agakwete aha bushuuga, endashana, n’obugaidi. Rundi naiwe nobonabona orw’enshonga y’oburwaire anga kuferwa omugonzibwa wawe.

Banza oyebazeho:

• Isi, Katonda akaba agendeleire emikalire yange n’eyeka yange eb’eti?

• Nimbasa kubona nkahai obujuni bw’okwemera ebyemba orwo bilikungwaho?

• Isi, nikibasikana kugira emilembe omu nsi?

Ebibulia nehorora ebibazo ebyo omu ngeli elikugasha.

• Tihalibaho kushasha, kuba bagurusi n’okufa.​—Okushurulirwa 21:4

• “Abalema balichoka, baguruke engoma.”​—Isaya 35:​6

• “Empume zilibona.” ​—Isaya 35:5

• Abafu balihimburwa. ​—Yohana 5:​28, 29

•  Taliho muntu alishuba kutaka burwaire. ​—Isaya 33:⁠24

• Ensi eyeze emyaka. ​—Ezaburi 72:⁠16

Otakutekeleza oti ebintu eby’oyegire omu mpapuro ezilabireho ninka ebiroto. Katonda aragaine okwo aragobeshereza ebintu ebyo umu kanya akali haihi, n’Ebibulia neshoborora okwo alakora.

Ebibulia neyegesa ebintu bingi ebilikushagaho ebyo. Netushoborora ebintu ebyo tulikubasa kukora tubase kugira emitulire eina ebyera kany’aka. Banza otekerezeho ebintu ebyakubasa kukukora kogira obutini. Rundi obukwete aha mahera, aha byemba by’eka, aha bubili bwaitu, anga orufu rwa munywanyi wawe. Ebibulia nebasa kukujuna orw’olikugwebwaho ebyemba nk’ebyo, n’okukumaramara omu kuhorora ebibazo nk’ebi:

• Kubaki nitubonabona?

• Nitubasa kwemera tutai amatangwa agalikutugwaho?

• Isi, nikibasikana kugira eka eina ebyera?

• Nikihai ikilikubaho omuntu kalikufa?

• Isi, abagonzibwa baitu abafire tulibabona orundi?

• Kubaki twesige nk’okwo Katonda aragobeshereza byona ebyo aragaine?

 Okushoma ekitabo eki nikworekya nk’okwo noyenda kumanya ebyo Ebibulia elikwegesa. Ekitabo eki kirakujuna. Ahansi y’empapuro aliho ebibazo ebilakujuna kushobokerwage Ebibulia. Amamilioni g’abantu bashemeleirwe kwega Ebibulia n’Abajulizi ba Yehova. Nitushuubira nk’okwo naiwe noija kushemelerwa. Katonda akutunge emigisha orw’olikwekaza kwega ebyo Ebibulia elikwegesa!