1, 2. Abantu nibebaza bibaz’oki?

ABANA babaza ebibazo bingi muno. N’orwo wakubahorora n’okubashoborora, bashuba bakubaza, ‘kubaki?’ Buli mpororo eyo wakubaha bagendelera kukubaza, ‘kyonka, kubaki?’

² Tube tuli bantu bakuru anga tuli bana, chwena twina ebibazo. Rundi twakwebaza ebintu ebyo tulikwetaga nk’ebyakulya n’ebijwaro. Anga twakwebaza ebibazo ebina omugasho ebikwete aha burora bwaitu amoi nakanya kaitu akalikwija. Kyonka, twakureka kubaza ebibazo orw’eshonga yokuburwa empororo ezilikugasha.

3. Kubaki abantu bangi nibatekereza nk’okwo tibakubasa kubona mpororo y’ebibazo byabo ebina omugasho?

³ Isi, Ebibulia eina empororo y’ebibazo ebilikugasha ebyotulikwebaza? Abantu abandi bakutekereza nk’okwo Ebibulia eina empororo, kyonka nibagira bati neguma kugishobokerwa. Nibatekereza nk’okwo ebibazo ebyo nibibasa kuhororwa n’abebembezi b’edini bonka. N’abandi tibali kubaza orw’okuba nibatina kweyorekya okwo batalikumanya bataija bakashekelerwa. Iwe notekelezaho otai?

4, 5. Wakwenzire kumanya empororo yabibaz’oki? Kubaki kisaine ogendelere kuhiga empororo?

⁴ Rundi wakwenzire kumanya empororo y’ebibazo nka: Kubaki nazairwe? Orwo ndifa ndigya nkahai? Katonda aina ngeshoki? Omwegesa mukuru, Yesu, akagamba ati: “Mugendelere kushaba, mulihabwa; mugenderere kuhiga, mulibona; mugendelere kukomakoma, mulikingulirwa.”  (Matayo 7:7, NW) Otakufa mwoyo mpaka mbali orabonera empororo ezilikugasha.

⁵ Mazima, ‘koragendelera kuhiga,’ orabona empororo kuruga omu Bibulia. (Emigani 2:1-5) Tikikuguma kushobokerwa empororo ezo. Ebintu eby’olikwega birakujuna ogire emitulire eina ebyera hamoi n’eshubi nungi ey’akanya akalikwija. Leka tufumoreho ekibazo kimoi ekilikuyayanisa abantu bangi.

6. Kubaki abantu abandi nibatekereza nk’okwo Katonda tabeteireho orwo balikugwebwaho amashasi?

⁶ Aliyo abantu bangi abalikutekereza nk’okwo Katonda tatwetaireho. Mbagamba bati Katonda kayakuba atwetaireho, ensi yakuba etali eti. Nitwelebera endashana, eitima, hamoi n’obushasi buli kichweka. Abantu nibarwara, nibashasha, n’okufa. Orw’ekyo abantu nibebaza, ‘Katonda karaba atwetaireho kubaki atakutanga mashasi?’

7. (a) Abebembezi b’edini abandi nibegesa batai abantu kabatekeleza okwo Katonda aba mubi? (b) Kubaki nitubasa kwesiga nk’okwo Katonda tiwe mbandizo ya bintu bibi?

⁷ Abebembezi b’edini abandi nibakora abantu batekereze okwo Katonda aba mubi. Ekintu ekibi orwo kilikubaho, nibagamba nk’okwo ngonzi za Katonda. Nibagamba nk’okwo katonda niwe yabatekatekeire ekintu ekyo kakibagwaho. Kabalikugamba batyo, mazima nibamubeiyelera. Orw’okuba, Ebibulia neyegesa nk’okwo Katonda tiwe mbandizo ya bintu bibi. Yakobo 1:13, NW negamba nk’okwo Katonda talengesa wena wena omu bintu ebibi. Negamba eti: “Omuntu atalilengesibwa akagamba ati, ‘Katonda nandengesa.’ Kuba Katonda taina kulengesibwa na bintu bibi mara wenene taina  kulengesa muntu.” Ekyo nikyorekya nk’okwo Katonda taleta bintu bibi n’orwo alikureka kabibaho. (Shoma Yobu 34:10-12.) Tekerezaho emfumo egi.

8, 9. Kubaki titusaine kutweka mushango Katonda orw’enshonga y’amashasi agalikutugwaho? Chwa emfumo.

⁸ Tekereza omusigazi alikwikara n’abazairebe. Ishe namwenda muno mara amwegesize okwo yakubasa kukora oburamuzi burungi. Omu kanya kake kuingura omusigazi ogwo nashenga ishe n’okuruga omwabo. Nagya nakora ebintu ebibi n’okugwebwaho ebyemba. Isi, wakugamba oti ishe musigazi niwe yakozile ebyemba kabimugwaho? Mazima chei! (Luka 15:11-13) Nk’okwo kili ahali ishe mwana ogwo, Katonda tiyatangire bantu orwo baramwire kumushenga n’okubanza kukora ebintu ebibi. Kityo, ekintu kyona kyona ekibi kakilabaho, tusaine kwijuka nk’okwo ti Katonda yakireta. Titwina nshonga yona yona yakutweka Katonda mushango.

⁹ Aliho enshonga nungi muno elikukora Katonda areke ebintu bibi kabibaho. Omu Mutwe gwa  11, noijakwega ebyo Ebibulia elikugamba abikwete aha kintu ekyo. Kityo, oyesige nk’okwo Katonda natwenda muno kandi tutamutweka mushango orw’enshonga y’amashasi agalikutugwaho. Mazima, niwenene wenka ayakubasa kugaihyaho.​—Isaya 33:2.

10. Kubaki nitubasa kwesiga nk’okwo Katonda naija kwihyaho amahano gona agalikuretwa abantu ababi?

¹⁰ Katonda aba mutakatifu. (Isaya 6:3) Buli kintu ekyo akora kiba kirungi muno. Kityo twakubasa kumwesiga muno. Abantu tinka Katonda. Omu kanya akandi nibashobya. Nangu n’abatwazi abalikwesigwa tibakubasa kwihyaho amahano agalikuretwa abantu ababi. Taliho muntu agira mani nka aga Katonda. Katonda nabasa mara naijakwihyaho amahano gona agalikuretwa  abantu ababi. Naijakwihyaho obubi bwona eirai lyona.​—Shoma Ezaburi 37:9-11.

11. Katonda nayehulira atai ebikwete aha mashasi agalikukugwaho?

¹¹ Katonda nayehulira atai ebikwete aha mashasi agali omu nsi n’agalikukugwaho omu mitulire yawe? Ebibulia neyegesa nk’okwo Katakonda ‘agonza ehaki.’ (Ezaburi 37:28, NW) Nayenda ebintu ebirungi n’okutamwa ebintu ebibi. Najunahara muno omu mwoyo orwo alikubona abantu nibashasha. Ebibulia negamba eti, “akashasha muno” orwo ensi yaijwire obubi omu kanya akarabireho. (Embandizo 6:5, 6) Katonda takahindukaga. (Malaki 3:6) Ebibulia negamba nk’okwo Katonda akwetaireho muno.​—Shoma 1 Petero 5:7.

12, 13. (a) Kubaki twina engonzi, isi, noyehulira otai orw’olikubona abantu nibashasha? (b) Kubaki tugire omwesigo nk’okwo Katonda naijakwihyaho amashasi gona n’okugarura ehaki?

¹² Kandi, Ebibulia negamba nk’okwo Katonda akatutonda omu kishushani kyawenene. (Embandizo 1:26) Eki nikyorekya nk’okwo Katonda akatutonda twina engesho nk’eza wenene. Kityo, koraba noshasha orw’olikubona abantu abataina mushango nibashasha, ekyo nikyorekya nk’okwo Katonda nashasha muno! Nitumanya tutai?

¹³ Ebibulia netwegesa nk’okwo “Ruhanga aba ngonzi.” (1 Yohana 4:8) Buli kintu ekyo Katonda akora nikisindikwa n’engonzize. Twina engonzi orw’okuba Katonda aba ngonzi. Tekerezaho ekintu eki: Kawakubaire oina obushobora, isi, wakwihireho amashasi n’obuburwa bw’ehaki omu nsi? Mazima wakubihireho, orw’enshonga noyenda abantu. Isi, Katonda? Orw’okuba aina obushobora mara natwenda, naija kumaraho amashasi gona  n’okugarura ehaki. Oyesige nk’okwo Katonda naija kugobeshereza endagano zona ezilikugambwa omu mbandizo y’ekitabo eki! Kyonka obase kubona amagoba g’endagano ezo, noyetaga kwega bingi ebikwete ahali Katonda.

14. Katonda nayetwa owai, na kubaki kintu ky’omugasho kumanya eibaralye?

¹⁴ Kawakwenda kubandisa obunywanyi n’omuntu ondijo, okwo tumanyiire, ekyambere nikumugambira eibara lyawe. Isi, Katonda aina eibara? Edini zingi nizegesa nk’okwo eibara lyawenene ni Katonda anga Mukama. Kyonka, ago timabarage nyabwe, shana mabara g’ekitiinwa nka “rais.” Katonda natugambira nk’okwo eibara lyawenene ni Yehova. Ezaburi 83:18, NW negamba eti: “abantu bamanye nk’okwo iwe niwe oyetwa Yehova, iwe wenka niwe oikara eiguru y’ensi yona.” Abahandiki b’Ebibulia aba karai tibashelekire eibara lya Katonda. Ebyo bahandiikire binamu eibara lya Katonda emirundi elikushaga enkumi mushanju. Yehova nayenda omanye eibaralye mara otaburwa kuligamba. Nakugambira eibaralye obase kuba munywanyiwe.

15. Eibara Yehova lina nshongaki?

¹⁵ Eibara lya Katonda, Yehova, lina enshonga mpango muno. Nilyolekya nk’okwo  nabasa kugobeshereza endaganoze zona n’ekigendelerokye. Taliho yakumtanga kagobeshereza kigendelerokye. Ni Yehova wenkai asaine kwetwa eibara elyo. *

16, 17. Ebitiinwa ebi bina nshongaki: (a) “Rushoborabyona”?(b) “Omukama w’amakiro gona”? (c) “Omutonzi”?

¹⁶ Nk’okwo twashoma, Ezaburi ya 83:18 negamba eti ahali Yehova: “Iwe wenkai niwe oikara eiguru y’ensi yona.” Kandi Okushurulirwa 15:3 negamba eti:  “Waitu Mukama Ruhanga Rushoborabyona, ebikorwa byawe biba by’amani, nibitangaza! Emihango yawe y’obugorogoki kandi y’amazima, Nyakusinga Omukama w’amakiro gona!” Eibara ly’ekitiinwa “Rushoborabyona” lina nshongaki? Nilyolekya nk’okwo Yehova aina amani gangi muno kushaga buli muntu omu nsi. N’eibara “Omukama w’amakiro gona” nilyorekya nk’okwo Yehova tagira mbandizo na ndekelero. Ezaburi 90:2 neshoborora nk’okwo wenene niwe yabaireho kwema eirai lyona kuhika eirai lyona. Ekintu ekyo nikitukora katutangara muno!

¹⁷ Yehova wenka niwe aba Mutonzi. Ekihandiiko ky’Okushurulirwa 4:11 nikigamba kiti: “Mukama Katonda waitu, osaine kuhabwa ekitiinwa n’amakune n’amaani, kuba niwe watonzire byona; bikabaho, byatondwa orw’okwenda kwawe.” Yehova niwe yatonzire abamalaika omwiguru, enyanyinyi, ebiraba omu miti, enfuru omu nyanja amoi nabuli kantu akotwakubasa kutekereza!

18. Kubaki abantu abandi nibatekereza nk’okwo Katonda tiyakuba munywanyi wabo? Ebibulia negambaho etai ekintu ekyo?

¹⁸ Abantu abandi kabalikushoma ebikwete aha ngesho za Yehova, nibatiina n’okutekereza bati, ‘Orw’okuba Katonda aina amani gangi, ekitiinwa kihango muno, kandi ali harai muno, kyakubasika, anyetaho? Kyonka, Katonda nayenda katutekereza tutyo? Chei. Yehova nayenda katumwilira haihi. Ebibulia negamba nk’okwo Katonda “tatuli harai.” (Ebikorwa 17:27) Katonda nayenda komwilira haihi, nawe naraganisa nk’okwo ‘arakwilira haihi.’​—Yakobo 4:8.

19. (a) Wakubasa otai kuba munywanyi wa Katonda? (b) Ningeshoki eza Katonda ez’olikwenda muno?

¹⁹ Wakubasa otai kuba munywanyi wa Katonda? Yesu akagamba ati: “Mara oburora obutalihwao nibw’obu: Bakumanye iwe Ruhanga omumoi ow’amazima, bamanye na Yesu Kirisito owo watumire.” (Yohana 17:3) Koragendelera kwega, noija kumanyage Yehova na Yesu. Aha nzindo wakubasa kuhabwa oburora obutalihwao. Kugoba aha wayegire nk’okwo “Katonda aba ngonzi.” (1 Yohana 4:16) Kyonkai, aina engesho ezindi ezirungi. Ebibulia netwegesa nk’okwo Yehova aba “muganyizi mara omufura, timwangu wa kunigara, aijwire ekisha n’obwesigwa.” (Okuruga 34:6) Yehova aba ‘murungi mara muganyizi’ (Ezaburi 86:5) Katonda aba mwegumisiliza kandi mara mahika. (2 Petero 3:9; Okushurulirwa 15:4 NW) Noija kumanya ebintu bingi ebikwete angesho ezo ezirungi, koragendelera kwega Ebibulia.

20-22. (a) Wakubasa kwilira otai ahali Katonda n’orwo otalikumubona? (b) Osaine kukoraki orwo abandi balakutanga kwega Ebibulia?

²⁰ Wakwilira otai ahali Katonda n’orwo otalikumubona? (Yohana 1:18; 4:24; 1 Timoteo 1:17) Orwo olikushoma ebikwete ahali Yehova omu Bibulia, noija  kumumanya kwokwokwo. (Ezaburi 27:4; Abaroma 1:20) Orwo olikugendelera kwega bingi ebikwete ahali Yehova, oramwenda muno mara orayehulira oli haihi muno na wenene.

‵²¹ Noija kushobokerwa nk’okwo Yehova niwe Isheichwe. (Matayo 6:9) Akatuha oburora, kandi nayenda tugire emikalire mirungi muno. Okwo nikwo ishe bana wena wena aina engonzi ayenda abanabe kababa. (Ezaburi 36:9) Mazima, Ebibulia neyegesa nk’okwo nobasa kuba munywanyi wa Yehova. (Yakobo 2:23) Tekerezaho ekintu ekyo. Yehova Omuntonzi w’eiguru n’ensi nayenda iwe koba munywanyiwe!

²² Rundi abantu abandi bakukutagiliza olekere kwega Ebibulia. Shana nibatina bati wakuindura edini yawe. Kyonka otakujubura muntu wena wena akutange kuba munywanyi wa Yehova. Wenene aba munywanyi murungi kushaga omuntu wena wena.

23, 24. (a) Kubaki tusaine kugendelera kubaza ebibazo? (b) Nitwija kufumorahoki omu mutwe ogulikuhonderaho?

²³ Orwo olikugendelera kwega Ebibulia rundi toshobokerwe buli kantu. Otagira nshoni kubaza ebibazo anga kushaba obujuni bw’okumanya obwizizi. Yesu akagamba ati twetohye, nka abana bato. (Matayo 18:2-4) Abana babaza ebibazo bingi orw’okuba benda kumanya. Katonda nayenda obone empororo y’ebibazo byawe. Kityo, oyege Ebibulia geigeigei obase kumanyuruza ebyo olikwega nka gali mazima.​—Shoma Ebikorwa 17:11.

²⁴ Omuhanda gurungi gwo kumanya Yehova ni kwega Ebibulia. Omutweoguli kuhonderaho, turabona okwo Ebibulia etalikushanangana n’ebitabo ebindi.