1, 2. Abantu bangi nibebaza kibazoki?

EKYARO kyabundwa omusisi gwa sunami. Omushuuga natera amashasi omu kanisa, nautaza n’okwita abantu bangi. Omukazi naitwa kansa n’okusigaho abana batanu bali mfuuzi.

² Ebibundo nk’ebyo kabilikubaho, abantu bangi nibebaza, “Kubaki?” Abantu bangi nibebaza kubaki ensi eijwire eitima n’okubonabona. Isi, iwe orayebalize otyo?

3, 4. (a) Habakuki akabaza bibazoki? (b) Yehova akamuhorora atai?

³ Omu Bibulia, nitwega abikwete aha bashaija abesigwa ababalize Katonda ebibazo nk’ebyo. Obulebero bumoi nibwobu: Omurangi Habakuki akabaza Yehova ati: “Kubaki nombonesa enaku n’obushasi? Nimbona abalikwita banu, nibabakolera obukatili; abantu nibahankana, nibagira empaka.”​—Habakuki 1:3.

⁴ Omu kihandiiko kya Habakuki 2:2, 3, nitushoma okwo Katonda yahoroire Habakuki n’okumuha endagano ey’okuhindura ebintu. Yehova nayenda muno abantu. Ebibulia negamba eti: “Abetaireho.” (1 Petero 5:7) Mazima, Katonda natamwa muno kubona abantu nibabonabona. (Isaya 55:8, 9) Mbwenu, leka tufumoreho ekibazo eki: Kubaki omu nsi alimu okubonabona kungi muno?

5. Abegesa bangi b’edini nibegesaki ebikwete aha kubonabona? Ebibulia neyegesaki?

⁵ Emirundi mingi abebembezi b’edini n’abegesa, nibegesa nk’okwo abantu kabalikubonabona ngonzi za Katonda. Abandi nibagamba nk’okwo ebintu byona ebibi ebilikugwaho abantu bitekatekirwe na Katonda, kandi titwakubasa kushobokerwa nshonga. Abandi nibagamba nk’okwo abantu bona, nangu nabana abato kabalikufa, nibagenda kwikara na Katonda omwiguru. Kyonka, enyegesa egyo ti y’amazima. Yehova tiwe alikukora bintu bibi kabibaho. Ebibulia negamba eti: “Nikikabure Katonda kukora ebitalikuragirwa, Rushoborabyona kukora kubi!”​—Yobu 34:10.

6. Kubaki abantu bangi nibatweka Katonda omushango orw’enshonga y’okubonabona kungi okuli omu nsi?

⁶ Abantu bangi nibatweka Katonda omushango orw’enshonga y’okubonabona kungi okuli omu nsi. Nibatekereza nk’okwo Katonda niwe mutwazi w’ensi egi. Okwo twayegire omu Mutwe gwa 3, omutwazi w’ensi egi ni Sitani Ibilisi.

7, 8. Kubaki ensi eijwire okubonabona kungi?

⁷ Ebibulia negamba nk’okwo “ensi yona eli omu mani g’omubisha.” (1 Yohana 5:19) Omutwazi w’ensi egi Sitani, mukatili. Niwe ‘alikubeihya ensi yona.’ (Okushurulirwa 12:9) Abantu bangi nibamulondora. Egyo niyo nshonga emoiyo elikukora ensi eijure ebishuba, eitima n’obukuutu.

⁸ Aliho enshonga zingi ezilikukora ensi eijure okubonabona. Orwo Adamu na Eva bamazire kushenga Katonda, abana babo bakasika entambara egyo. Kityo, orw’enshonga y’entambara egyo, abantu  nibema kubi batahi babo. Nibefaho bonene bonka. Nibaterangana, nibagya omu ndashana, n’okwema kubi abandi. (Mwegesa 4:1; 8:9) Akanya akandi abantu nibabonabona orw’enshonga ya “akanya n’ekintu ekitetegeirwe.” (Mwegesa 9:11, NW) Orwo balikuba bali omu kichweka n’omu kanya akatalikugasha, eakisidenti n’ebintu ebindi ebibi byakubagwaho.

9. Kubaki nitwesiga nk’okwo Yehova aina enshonga nungi y’okurekaho okubonabona?

⁹ Yehova taleta kubonabona nakati. Titusaine kumutweka mushango orw’enshonga y’endashana, obukuutu, n’okushasa banu. Katonda talikuleta bibundo nk’emisisi, ebimbunga, n’okwijulirwa amaizi. Kyonka aliho orwo wakwebaza, ‘Yehova karaba niwe aina amani gangi kushaga abantu bona, kubaki atakutanga bintu bibi bitabaho?’ Nitumanya nk’okwo Katonda atweteireho muno, ekyo nikyorekya nk’okwo aina enshonga nungi muno y’okureka okubonabona kakugendelera kubaho.​—1 Yohana 4:8.

10. Sitani akahakanisa Yehova atai?

¹⁰ Omu busitani ya Edeni, Ibilisi akabeihyabeihya Adamu na Eva. Sitani akabeihyelera Katonda okwo ali mutwazi mubi. Akagamba okwo akaba naima Adamu na Eva ebintu ebirungi. Akenda besige nk’okwo wenene [Sitani] yakubaire mutwazi murungi kushaga Yehova, na nk’okwo tibabeire nibetaga butwazi bwa Katonda.—Embandizo 3:2-5; shoma Ekishoborozo Ekyongeirweho 27.

11. Nitwetaga kuhororwa kibazoki?

 ¹¹ Adamu na Eva bakanga kworobera Yehova mara bamushenga. Bakaba nibatekereza baina ehaki y’okweramulira ebirungi n’ebibi. Yehova yakworekire atai okwo abashengi abo bakaba bashobya, na nk’okwo wenene niwe alikumanya ebintu ebilikutugasha?

12, 13. (a) Kubaki Yehova tiyasiliikize bashengi abo aho honkai orwo bamazire kumushenga? (b) Kubaki Yehova ajubwire Sitani atware ensi, n’abantu begeleere?

¹² Yehova tiyasiliikize Adamu na Eva aho honkai, Shana akabajubura bazare abana. Kandi, Yehova akakora kibasikane abana ba Adamu na Eva kweramulira ayakubaire mutwazi wabo. Ekigendelero kya Yehova kikaba kili kwijuza ensi abantu abahikiliire, nekyo kyakugobesherezibwe n’orwo habaireho obuhakani bwa Sitani.​—Embandizo 1:28; Isaya 55:10, 11.

¹³ Sitani akahakanisa Yehova omu maisho g’amamilioni g’abamalaika. (Yobu 38:7; Danieli 7:10) Kityo, Yehova akaha Sitani akanya k’okworekya okwo ebyo yabaire agambire nka byabaire bili by’amazima. Kandi akaha abantu akanya k’okubandisa eserikali zabo omu butwazi bwa Sitani n’okubona nka zakugoshokire zitaina bujuni bwa Katonda.

14. Obutwazi bwa abantu nibworekyaki?

¹⁴ Omu myaka mingi, abantu barengire kwetwara kyonka balemirwe. Sitani abonekire kuba mubehi. Abantu nibetaga obujuni bwa Katonda. Omurangi Yeremia akaba nagamba amazima orwo yahandikire ati: “Waitu Mukama nimanya okwo hatabayo muntu amanya ndekeleroye, taliho muntu aina bushobora bwa kugeleera burorabwe.”​—Yeremia 10:23.

15, 16. (a) Kubaki Yehova ajubwire okubonabona kugendelere kubaho omukanya kangi? (b) Kubaki atakaireho byemba ebilikuretwa Sitani?

¹⁵ Kubaki Yehova ajubwire okubonabona kugendelere kubaho omu kanya kangi? Kubaki Yehova atalikutanga bintu bibi bitabaho? Akanya kangi kaketagwa abase kworekya okwo Sitani tashobora kutwara bantu. Abantu balengire obutwazi bw’engeli zingi kyonka tibakabonaga butwazi burungi. Nangu, n’orwo abantu bakozire ebintu bingi ebikwete aha sayansi, n’eteknolojia, akyaliho okuburwa kw’ehaki, obunaku, obukuutu, n’endashana kushaga akanya akandi kona. Abantu tibashobora kubona magoba garungi batahabwirwe Katonda.

¹⁶ Kyonka, Yehova takaireho byemba ebyaresirwe Sitani. Kayakukozire atyo yakubaire naikiliza obutwazi bwa Sitani, tashobora kukora atyo nakati. Kandi, abantu bakwesigire okwo bakuboine amagoba garungi kabakwegeleeire, ekyo kintu ekitalikwo n’ekyo Yehova atakukora. Wenene tagamba bishuba.​—Abaheburania 6:18.

17, 18. Yehova alaiyaho atai ebibi byona ebyaresirwe Sitani?

¹⁷ Isi, Yehova nashobora kumaraho ebintu byona ebibi ebyaresirwe Sitani hamoi n’abantu? Ego. Orw’okuba ahali Katonda ebintu byona nibibasikana. Yehova namanya ni kanyaki ako arahorora byona ebyo Sitani yamuhangiliire. Mara alakora ensi keba paradiso, nk’okwo yabaire agendeleire. Bona abali omu “bituro by’okwijukwa” nibaija kuhimburwa. (Yohana 5:28, 29, NW) Abantu tibalifa anga kurwara rundi. Yesu naija kwihyaho ebintu byona ebibi ebyaresirwe Sitani. Yehova naija kukoza Yesu ‘kuchwa amafu ga Sitani.’ (1 Yohana 3:8) Nitusiima muno Yehova orw’okuba alindilire twagoba akanya k’okumumanya mara nitubasa kuramura  kaba Mutwazi waitu. (Shoma 2 Petero 3:9, 10) N’orwo tulikubonabona, natujuna kwegumisiliza.​—Yohana 4:23; shoma 1 Abakorinto 10:13.

¹⁸ Yehova talikutukaka katumuronka kaba mutwazi waitu. Akatua obwegeleere bw’okweramulira. Leka tufumoreho okwo twakukoza obwegeleere obwo.

19. Yehova atuhaireki? Kubaki tusaine kumusiima?

¹⁹ Obwegeleere bw’okuramura obwo tuhairwe Yehova, nibutukora tutashanangana na bigunju. Ebigunju nibihaburwa amagezi g’obutondwa, kyonka ichwe nitubasa kuramura okwo tulatura nanka tulakolera Yehova. (Emigani 30:24) Ichwe tituli nka mashini ezilikuhaburwa abantu. Twina obwegeleere bw’okuramura owo turanywana nawe, okwo turatura, n’ebintu ebyo tulakora omu mitulire yaitu. Yehova nayenda tugire amashemelerwa omu mikalire yaitu.

20, 21. Nobasa kukora buramuziki kany’aka?

²⁰ Yehova nayenda tumwende. (Matayo 22:37, 38) Wenene ni nk’omuzaire alikushemelerwa kuhulira omwanawe namugambira ati, “Ninkwenda” kuruga omu mwoyo atakakirwe. Yehova atuhaire obwegeleere bw’okuramura kumukolera anga kutamukolera. Sitani, Adamu, na Eva bakaramura batakolera Yehova. Iwe orakoza otai obwegeleere bwawe obw’okuramura?

²¹ Ramura kukolera Yehova. Aliho amamilioni g’abantu abaramwire kushemereza Katonda n’okwanga Sitani. (Emigani 27:11) Nobasa kukoraki kany’aka osane kutaha omu nsi empya mbali araba atalimu kubonabona? Omutwe ogulikuhonderaho nigwija kuhorora ekibazo ekyo.