1, 2. Nibahai ababaire bali banywanyi ba Yehova?

WAKWENZIRE kugira omunywanyi owangeliki? N’orinya ow’olikwenda n’alikwikiliza kwema hamoi naiwe. Aina engonzi z’amazima n’engesho zirungi ez’olikwenda.

² Aliho abantu abo Yehova aronkire kababa banywanyibe. Nka Aburahamu akaba ali munywanyi wa Yehova. (Isaya 41:8; Yakobo 2:23) Kandi Daudi nawe akaba ali munywanyi wa Yehova. Yehova akagamba nk’okwo Daudi akaba ali ‘muntu owo yabaire nagonza.’ (Ebikorwa 13:22) Omurangi Danieli akaba “nagonzibwa muno” Yehova.​—Danieli 9:23.

3. Kubaki Aburahamu, Daudi na Danieli bakaba bali banywanyi ba Yehova?

³ Kubaki Aburahamu, Daudi na Danieli bakaba bali banywanyi ba Yehova? Yehova akagambira Aburahamu ati: “Wahulira ekyo nakuragira.” (Embandizo 22:18) Yehova ni munywanyi wa barinya abalikumukolerage omu bwetohya. Nangu n’abantu ab’eihanga lyona bakubasa kuba banywanyi ba Yehova. Yehova akagambira eihanga lya Israeli ati: “Ebyondagamba mubikwate, nanye ndaba Ruhanga wanyu, kandi inywe muraba bantu bange.” (Yeremia 7:23) Kityo, koraba noyenda kuba munywanyi wa Yehova kisaine omworobere.

4, 5. Yehova nalinda atai banywanyibe?

⁴ Ebibulia negamba nk’okwo Yehova naiga akashango  “kokwoleka abesigwabe obushoborabwe.” (2 Amakuru 16:9) Omu Ezaburi 32:8, NW Yehova naraganira banywanyibe ati: “Ndakuwa amagezi, ndakwolekaga omuhanda ogw’okurabamu, ndakuhanuliraga, elisho lyange likurebire.”

⁵ Omubisha aina amani nayenda kututanga tutaba banywanyi ba Katonda. Kyonka Yehova nayenda kutulinda aha mubisha ogwo. (Shoma Ezaburi 55:22.) Nitukolera Yehova omu mwoyo gwaitu gwona, orw’okuba ni munywanyi waitu. Nitwekwata Yehova n’orwo twakugwebwaho embyemba. Naichwe nitwesiga nk’omuhandiiki w’Ezaburi, ayahandikiire abikwete ahali Yehova ati: “Omukama mwekwata ebiro byona, kuba andi haihi, tinditengeta.” (Ezaburi 16:8; 63:8) Sitani natutanga atai tutaba banywanyi ba Katonda?

6. Sitani nagambaki ebikwete aha bantu?

⁶ Omu Mutwe gwa 11 tukega nk’okwo Sitani akagamba okwo Yehova mubehi mara talikukora haki orw’enshonga akaima Adamu na Eva obwegeleere bw’okweramulira ebirungi n’ebibi. Ekitabo kya Yobu nikitugambira okwo Sitani alikubeihyelera abantu bona abalikwenda kuba banywanyi ba Katonda. Nagamba nk’okwo nibakolera Katonda orw’okuba nabaha emigisha, na ti rwanshonga ya kumwenda. Kandi, Sitani nagamba nk’okwo yakubasa kuhindura omuntu wena wena alekere kukolera Katonda. Leka tulebe ebintu ebyo turikwega kuruga ahali Yobu n’okwo Yehova yamulinzire.

7, 8. (a) Yehova akabona atai Yobu? (b) Sitani akagambaki ebikwete ahali Yobu?

⁷ Yobu akaba aly’ohai? Akaba ali muntu omwesigwa  ayatwire emyaka 3,600 elabireho. Yehova akagamba okwo taliho muntu wena wena omu nsi ayabaire ali nka Yobu. Yobu akakunira muno Katonda, mara yatamwaga ebibi. (Yobu 1:8) Nikwo, Yobu akaba ali munywanyi wa Yehova.

⁸ Sitani akagamba nk’okwo Yobu akaba nakolera Katonda orw’enshonga y’ebintu ebyo Katonda yamutungire. Sitani akagambira Yehova ati: “Buli kanya omulinda n’ekaye n’ebye byona. Ogoshoire emilimoye n’eitungalye lyaijura ensi. Kyonkai omwake eby’ainabyo byona, oije obone okwo arakukeena orubona!”​—Yobu 1:10, 11.

9. Yehova akajubura Sitani akoreki?

⁹ Sitani akagamba nk’okwo Yobu akaba nakolera Yehova orw’enshonga amuhaire emigisha. Kandi Sitani akagamba okwo yakubasa kuhindura Yobu kulekera kukolera Yehova. Yehova akamanya okwo ebigambo ebyo byabaire bili by’ebishuba. Kyonka akajubura Sitani kalengesa Yobu, ayorekye ebyo yabaire agambire nka gali mazima.

10. Sitani akatabalira Yobu atai, na Yobu akakoraki?

¹⁰ Ekya mbere, Sitani akakora ebitunganwa bya Yobu kabiitwa n’ebindi kabiibwa. Yashuba yaita abakozi ba Yobu. Yobu tiyasigaire na kantu kona kona. Aha nzindo, Sitani akatweka ekimbunga kyaita abana ba Yobu ikumi. Kyonka, Yobu akagendelera kwekwata Yehova. “Omuli ebi byona Yobu tiyafakaire anga kukwata Katonda mushango.”—Yobu 1:12-19, 22.

11. (a) Nibintuki ebindi ebyo Sitani yakoleire Yobu? (b) Aho Yobu akakoraki?

¹¹ Sitani tiyarekeleire aho. Akagambira Katonda ati: “Kyonka mbwenu mwake eby’ainabyo byona oije obone okwo arakukeena omu bantu.” (Yobu 2:5, 7) Kyonka,  Yobu akagendelera kwekwata Yehova. Akagamba ati: “Ndiremwa nafa ntarekeire kuba mugorogoki!”​—Yobu 27:5, NW.

12. Yobu akorekya atai okwo Sitani yagambire ebishuba?

¹² Yobu akaba atali kumanya kintu kyona kyona ekyabaire kikwete aha bigambo bya Sitani anga enshonga eyamukozire kabonabona. Akaba natekereza Yehova, niwe amuleteire ebyemba ebimugwireho. (Yobu 6:4; 16:11-14) N’orwo ebyo byamugwireho, Yobu akagendelera kuba mwesigwa ahali Yehova. Aha rw’ekyo Sitani akabona empororo y’ebigambobye. Yobu tiyayenzire Yehova orw’enshonga y’eitunga elyo yabaire ainalyo, shana akaba namwenda kuruga omu mwoyo. Ebigambo byona bya Sitani bikaboneka bili bishuba!

13. Yobu akabona magobaki orw’enshonga y’obwesigwabwe?

¹³ N’orwo Yobu yabaire atalikumanya ebyakozirwe omwiguru, akagendelera kuba mwesigwa ahali Katonda, n’okwo’rekya okwo Sitani ali mubi. Yehova akamuha emigisha mingi orw’enshonga y’obwesigwabwe.​—Yobu 42:12-17.

14, 15. Sitani nagambaki ebikwete aha bakozi ba Yehova?

¹⁴ Nobasa kwega ebintu by’omugasho kuruga omu bilengeso ebyagwireho Yobu. Sitani akagamba nk’okwo nitukolera Yehova orw’enshonga natuha emigisha. Omuli Yobu 2:4, Sitani akagamba okwo: “Omuntu aragiraga buli kantu kwechungura ayekuure obwoya aha murundi.” Kityo, Sitani nabeiyelera abakozi bona ba Yehova okwo balikwenda Yehova orw’enshonga y’ebintu ebirungi ebyalikubaha. Emyaka mingi kayalabireho Yobu afire, Sitani akagendelera kujuma Yehova n’okubeiyelera abakozibe. Emigani 27:11 negamba  eti: “Mwana wange obe mumanyi, omutima gwange gushemelerwe, nyije mbone agahorora atura nanjuma.”

¹⁵ Wakubasa kworekya okwo Sitani alikugamba ebishuba omu kworobera Yehova n’okuba munywanyiwe. Kuba munywanyi wa Katonda buramuzi burungi muno n’orwo oraba n’oyetaga kuhinduraho emitulire yawe! Oburamuzi obwo kintu kisikire. Sitani nagamba nk’okwo koragwebwaho ebyemba, toinakubasa kuba mwesigwa ahali Katonda. Nalenga kutuhabisa tulekere kwekwata Katonda. Nakoza mihandaki?

16. (a) Nimihandaki eyo Sitani alikukoza kutanga abantu batakolera Yehova? (b) Sitani nakoza mihandaki kukutanga otakolera Yehova?

¹⁶ Sitani nakoza emihanda eya buri ngeli kubasa kututanga tutaba bakozi ba Katonda. Natwema kubi “nk’entare elikusinda nehigiliza ow’eralya.” (1 Petero 5:8) Otakushoberwa banywanyi bawe, abantu b’eka yawe, anga abantu abandi orwo barakutanga kwega Ebibulia n’okukora ebintu ebirungi. Aliho orwo wakwehulira oti nibakwema kubi. * (Yohana 15:19, 20) Kandi, Sitani nabasa kwehindura “mumalaika w’omushana.” Kityo, nabasa kutuhabisa tutorobera Yehova. (2 Abakorinto 11:14) Omuhanda ogundi ogwo Sitani alikukoza kututanga tutakolera Yehova, ni kutukora twebone titusaine kukolera Katonda.​—Emigani 24:10.

17. Kubaki nitworobera Yehova?

¹⁷ Katulikworobera Yehova nitworekya nk’okwo Sitani n’omubehi. Nikiha ekiratujuna kworobera Katonda?  Ebibulia negamba eti: “Ogonze Yehova Katonda wawe n’omutima gwawe gwona, n’oburora bwawe bwona, n’amani gawe gona.” (Obwijukiro bw’Ebiragiro 6:5, NW) Nitworobera Yehova orw’enshonga nitumwenda. Engonzi zaitu ahali Yehova kazirayeyongera, nizija kutusindika kukora kyona kyona ekyo alikuturagira. Entumwa Yohana ekahandiika eti: “Ezi nizo ngonzi za Katonda: Kwekomya emihangoye. Nobona emihangoye tesikilira muno muntu.”​—1 Yohana 5:3.

18, 19. (a) Nibintuki ebyo Yehova alikutamwa? (b) Nitumanya tutai nk’okwo Yehova tabasa kutulagira katukora kintu ekyo tutalikubasa?

¹⁸ Nibintuki ebyo Yehova atamwa? Bike omu lyebyo, leba omu kisanduku “ Otamwe ebintu ebyo Yehova alikutamwa.” Wakubanza otekeleize oti ebintu ebyo tibibi muno. Kyonka, kolikushoma enjuru z’Ebibulia n’okuzekonja, noija kushobokerwa amagoba g’okukwata emiku ya Yehova. Kandi, noija kumanya nk’okwo n’oyetaga  kuhinduraho ebintu nanka omu mikalire yawe. Aliho orwo kyakuguma kuhinduka, kyonka korakor’otyo noija kubona emilembe n’ebyera orw’enshonga y’obwesingwa bwawe ahali Katonda. (Isaya 48:17, 18) Isi, wakubasa kuhindura emitulire yawe?

¹⁹ Yehova tabasa kutulagira katukora kintu ekyotutalikubasa. (Obwijukiro bw’ebiragiro 30:11-14) Orw’okuba ni munywanyi waitu natumanyuruza kurungi kushaga okwo tulikwemanya. Namanya obushobora n’obujege bwaitu. (Ezaburi 103:14) Entumwa Paulo ekatutekamu omwoyo eti: “Ruhanga aba mwesigwa, talikwija kubanagirana kurengesibwa kushaga okwo amani ganyu gali. Omu birengeso arabaha omuhanda gw’okubirugamu, mushobore kubyegumisiliza.” (1 Abakorinto 10:13) Nitwesiga nk’okwo Yehova naija kutuha amani g’okukora ebintu ebili kugasha. Naija kukuha “Obushobora obushaguliraine” obase kwegumisiliza omu mashasi.  (2 Abakorinto 4:7) Entumwa Paulo, eyahairwe obujuni bwa Katonda orwo yagwirweho ebyemba ekagamba eti: “Omu bintu byona nyina amani kulabira alyogwo alikumpa amani.”​—Abafilipi 4:13, NW.

20. Nitwetaga kulondora ngeshoki eza Katonda, na kubaki?

²⁰ Katulayenda kuba banywanyi ba Yehova, nitwetaga kukora ebintu ebindi bingi kushaga kutamwa busha ebintu ebibi. (Abaroma 12:9) Abanywanyi ba Yehova nibenda ebintu ebili kumushemelera. Ebintu ebyo nibigambwa omu Ezaburi 15:1-5. (Shoma.) Abanywanyi ba Yehova nibarondora engeshoze nka, “engonzi, ebyera, emilembe, obwegumisiliza, obufura, oburungi bw’omwoyo, obwesigwa, obuchulezi, okwetanga.”​—Abagalasia 5:22, 23.

21. Wakubasa kwega otai engesho ezili kushemelera Katonda?

²¹ Wakubasa kulondora otai engensho za Katonda? Wakubasa kumanya ebintu ebyo Yehova alikwenda omu kwega n’okushoma Ebibulia bulikiro. (Isaya 30:20, 21) Omu kukora otyo, engonzi zawe ahali Yehova nizija kweyongera, naiwe noija kugira ekihika ky’okumworobera muno.

22. Kolayorobera Yehova noija kubona migishaki?

²² Kuhinduraho emitulire yawe nikyo kimoi n’okuhindura emyendo etafuzire n’okujwara emyendo efuzire. Ebibulia negamba nk’okwo “Tube bantu bahya tuleke okwo twabaire tuli.” (Abakolosai 3:9, 10) N’orwo kitalikurahuka, kuhinduraho emitulire yeitu n’okworobera Yehova, wenene naragana kutuha “emperwa mpango.” (Ezaburi 19:11) Ramura kworobera Yehova n’okworekya okwo Sitani mubehi. Okolere Yehova omu mwoyo gwawe gwona na ti rw’anshonga ya migisha eyakanya akalikwija. Aha nzindo noija kuba munywanyi wa Katonda!