1, 2. Nitubasa kubona nkahai obwirukiro?

TEKEREZA ory’omurugendo, akanya ak’omuyaga gungi. Enjura nehika, endabyo nizirabya n’enkuba nizisharuka. Enjura nebanza kugwa. Nohiga obwegamo. Noshemelerwa kubona obwegamo burungi!

² Nitutura omu kanya akalikushana katyo. Kandi n’obukiro nibugendelera kutama. Rundi wakwebaza, ‘Nakwihya nkahai obwirukiro?’ Omuhandiki w’Ezaburi akahandika ati: “Aligambira Omukama ati, ‘Ruhanga wange obwirukiro bwange: boma yange, n’iwe nyesiga.’” (Ezaburi 91:2) Yehova nabasa kutuha obwikizo bw’ebyemba ebilikutugwaho kany’aka n’eshubi y’akanya akaraija.

3. Yehova yakuba atai bwirukiro bwaitu?

³ Yehova nabasa kutulinda atai? Nabasa kutujuna kwegumisiliza omu byemba, kuba aina amani kushagaho omuntu wena wena ayakwenda kutwema kubi. N’orwo tulikugwebwaho ebintu bibi kany’aka, nitumanya geigeigei okwo Yehova alahindura ebintu ebyo omu kanya akalikwija. Ebibulia netugambira eti: “Mugume mugonze Ruhanga.” (Yuda 21) Nitwetaga kwikara haihi na Yehova abase kutujuna ebyemba ebyo. Kyonka, twakukora tutyo tutai?

4, 5. Yehova ayorekize atai okwo ali kutugonza?

⁴ Tubase kwikara haihi na Yehova, nitwetagwa kumanya okwo alikutwenda. Tekerezaho ebintu birungi  ebyo atukoleire. Atuhaire ensi nungi, yatuteramu ebimera, n’ebigunju. Kandi atuteleiremu ebyakulya birungi n’amaizi g’okunywa. Kulabira omu Bibulia, Yehova atwegesize eibaralye n’eshongaze ezirungi. Kushagaho, akorekya okwo alikutugonza orwo yatwekire Omwanawe omugonzibwa, Yesu, aije omu nsi kutuchungura. (Yohana 3:16) Orw’enshonga y’ekitambo ekyo, twina eshubi nungi y’akanya akalikwija.

⁵ Yehova ataireho Obukama bw’Ekimasiha, nibwo butwazi bw’omwiguru oburaihyaho okubonabona kwona. Obukama obwo nibwijakuhindura ensi ebe paradiso, mbali buli muntu alitura omu milembe n’ebyera eirai lyona. (Ezaburi 37:29) Engeli endijo eyo Yehova ayorekize okwo alikutugonza, nikutwegesa okwo twakugira emikalire mirungi kany’aka. Kandi nayenda tushabe ahali wenene, mara ebiro byona alimwangu kutuhuliliza. Mazimakwo, Yehova nayorekya okwo alikugonza buly’omoi.

6. Twakwikiliza tutai engonzi za Yehova?

⁶ Twakwikiliza tutai engonzi za Yehova? Kisaine tumusiime omuli byona ebyo atukoleire. Nikijunahaza muno kubona abantu bangi kany’aka tibaina siimi. Nangu kikaba kili kityo orwo Yesu yabaire ali omu nsi. Aliho abantu ikumi abo Yesu yatambiire ebibembe, kyonka omoi wenka niwe yashubireyo kumusiima. (Luka 17:12-17) Nitwenda kuba nk’omuntu ogwo ayasiimile Yesu. Ebiro byona tworekye esiimi ahali Yehova.

7. Nikihai ekyakworekya okwo tulikugonza muno Yehova?

⁷ Kandi nitwetaga kugonza Yehova. Yesu akagambira abegesibwabe okwo kisaine bagonze Yehova n’omutima gwabo, n’omwoyo gwona, n’amagezi gabo gona. (Shoma Matayo 22:37.) Nikimanyisa ki?

8, 9. Nitubasa kworekya tutai okwo tulikugonza Yehova?

 ⁸ Isi, nikimara kugamba kushai oti ningonza Yehova? Chei. Katulaba nitugonza Yehova n’omwoyo gwaitu, n’amagezi gaitu gona, tulayorekya tutyo omu bikorwa. (Matayo 7:16-20) Ebibulia neyegesa nk’okwo katulaba nitugonza Katonda, tulayorobera emihangoye. Isi, nikiguma kukora otyo? Chei, orw’enshonga “emihangoye [Yehova] tesikiilira muno muntu.”​—Shoma 1 Yohana 5:3.

⁹ Katuli kworobera Yehova, nitugira ebyera n’emikalire mirungi. (Isaya 48:17, 18) Kyonka, nikihai ekilatujuna kwikara haihi na Yehova? Leka tulebe.

10. Kubaki noyetaga kugendelera kwega ebikwete ahali Yehova?

¹⁰ Okabanza otai kuba munywanyi wa Yehova? Omu kwega Ebibulia, omanyirege Yehova n’okushemeza obunywanyi bwawe nawe. Obunywanyi obwo nink’omuliro ogw’olikwenda gugendelera kwaka. Nk’okwo omuliro gwetaga enkwi gugendelere kwaka, noyetaga kugendelera kwega ebikwete ahali Yehova obase kukora obunywanyi bwawe nawe bugume muno.​—Emigani 2:1-5.

11. Orabona magobaki kulabira omu kwega Ebibulia?

¹¹ K’olikugendelera kwega Ebibulia, noija kumanya ebintu bingi ebyokukugoba aha mwoyo. Leba okwo abegesibwa ba Yesu babili bayehulire orwo yabaire nabashoborora oburangi bw’Ebibulia. Bakagamba bati: “Emitima yaitu tiyaba nebengeya orwo yaba natufumolera omu kihanda natukyanura omu bihandiiko bitakatifu?”​—Luka 24:32.

12, 13. (a) Nikihai ekyakwongera obunywanyi bwaitu ahali Yehova? (b) Twakukoraki engonzi zaitu ahali Yehova zitachwija?

¹² Nk’okwo abegesibwa ba Yesu bagobirwe aha  myoyo orwo bashobokeirwe ebihandiiko, ndenga okehulira otyo orwo wayegire Ebibulia. Ekyo kikakujuna kumanya Yehova n’okumugonza. Tiwakwenzire engonzi zawe ahali Katonda kazichwija.—Matayo 24:12.

¹³ K’olikumara kuba munywanyi wa Katonda, noyetaga kukora okw’olikubasa obunywanyi bwanyu bugendelere kuguma. Noyetaga kugendelera kwega ebikwete ahali Yehova na Yesu, n’okwekonja eby’olikwega n’okwo wakubikoza omu mitulire yawe. (Yohana 17:3) Orw’olikushoma anga kwega Ebibulia, yebaze oti: ‘Ekintu eki nikinyegesaki ahali Yehova? Kubaki ninyetaga kugonza Yehova omu mwoyo gwange, n’oburora bwange bwona?’​—1 Timoteo 4:15.

14. Enshara nebasa kutujuna etai kugumisa obunywanyi bwaitu ahali Yehova?

¹⁴ K’olikuba oina omunywanyi, noyekaza kufumora nawe obutosha, mara ekyo nikigumisa obunywanyi bwanyu. Kwakwo, katurafumora na Yehova obutosha omu nshara, engonzi  zaitu ahali wenene ziragendelera. (Shoma 1 Abatesalonika 5:17.) Enshara gabo nungi kuruga ahali Isheichwe ali omwiguru. Nitwetaga kufumora nawe kuruga aha mwoyo. (Ezaburi 62:8) Titulikwetaga kugarukamu nshara zaitu, nitwetagwa kushaba kuruga aha mwoyo. Katulagendelera kwega Ebibulia n’okushaba kuruga aha mwoyo, engonzi zaitu ahali Yehova nizija kuguma.

15, 16. Nobona otai omulimo gw’okurangilira?

¹⁵ Kandi, katuraba nitwenda kugendelera kuba haihi na Yehova, nitwetaga kugambira abandi ebikwete aha mwesigo gwaitu. Okugambira abandi ebikwete ahali Yehova ekyo kintu ky’amakune. (Luka 1:74) Ogwo muruka ogwo Yesu yahaire Abakirisito bona abamazima. Chwena nitwegwa kurangilira amakuru garungi g’Obukama bwa Katonda. Isi, iwe nokor’otyo?​—Matayo 24:14; 28:19, 20.

¹⁶ Entumwa Paulo ekabona omulimo gw’okurangilira kuba “itunga.” (2 Abakorinto 4:7) Kurangilira abandi ebikwete ahali Yehova n’omugendelerogwe, nigwo mulimo ogulikugasha ogwo wakubasa kukora. Egyo n’engeli endijo ey’okukolera Yehova, mara nashemelerwa muno k’olikukora otyo. (Abaheburania 6:10) Orw’olikurangilira orabona amagoba na balinya abali kukuhuliliza, orw’okuba okukor’otyo nikubajuna nywena kamwilira Yehova haihi n’okubona oburora obutalihwaho. (Shoma 1 Abakorinto 15:58.) Tihaliho mulimo gwina omugasho nk’okurangilira.

17. Kubaki omulimo gw’okurangilira nigwetagwa kukorwa bwangu?

¹⁷ Omulimo gw’okurangilira nigwetaga kukorwa bwangu muno. Nitwetagwa ‘kuranga ekigambo mara  nitwetagwa kukora tutyo omu kihika.’ (2 Timoteo 4:2) Abantu nibetaga kuhulira ebikwete aha Bukama bwa Katonda. Ebibulia negamba eti: “Ekiro kibi ekyo ky’Omukama kili haihi, kili haihi mara nikija bwangu!” Enzindo ‘telikelererwa!’ (Zefania 1:14; Habakuki 2:3) Mazima, akanya kali haihi Yehova naija kusilikya ensi egi embi eli omu mani ga Sitani. Ekyo kitakabaireho, abantu nibetagwa kutatirwa babase kuramura kukolera Yehova.

18. Kubaki Yehova nayenda tweme hamoi n’Abakirisito ab’amazima omu kumufukamira?

¹⁸ Yehova nayenda tweme hamoi n’Abakirisito ab’amazima omu kumufukamira. Ebibulia negamba eti: “Tumanyangane, tutekanganemu ekihika ky’okugonzangana n’okugira ebigiro birungi. Tutalekera kuterana nk’okwo abandi bamanyiire kuterana, shanasi tutekanganemu ekihika tugendelere kugira tutyo. Nimubona n’okwo ekiro ky’Omukama kili haihi.” (Abaheburania 10:24, 25) Nitwetagwa kukora byona ebyo tulikubasa kuterana aha nkiiko zona. Omu nkiiko ezo nitubona akanya kokutekanganamu ekihika n’okugumisilizangana.

19. Nikihai ekyakutujuna kwenda barumuna baitu na banyanyaichwe Abakirisito?

¹⁹ K’olikuterana omu nkiiko zaitu, noijakugira abanywanyi abarakujuna kufukamira Yehova. Oratanganwa abarumuna na banyanyazi abalikukora byona ebyo balikubasa omu kufukamira Yehova nka iwe. Kyonka nabonene tibahikiilire bakubasa kukukosheza. Orwa balakukosheza obe mwangu kubaganyira. (Shoma Abakolosai 3:13.) Ebiro byona olebe engesho zabo ezirungi ezo balikworekya, ekyo kilakujuna kobenda mara oraba haihi muno na Yehova.

20, 21. “Oburora obuli burora kwo” kiki?

²⁰ Yehova nayenda banywanyibe bagire emikalire mirungi. Ebibulia neyegesa okwo akanya akalikwija emikalire yaitu neija kuba mirungi muno kushaga kany’aka.

²¹ Kityo, titulitura myaka 70 anga 80 yonkai, shana tulitura eirai lyona. Tulishemelerwa “oburora obutalihwaho” n’obubili burungi, emilembe n’ebyera omu nsi eliba eli paradiso. Obwo nibwo “burora obuli burora kwo” obulikugambwa omu Bibulia. Yehova naragana kutuha oburora obwo, Ekiratujuna kububona, nikukora byona ebyo tulikubasa ‘kuguma omu burora obwo.’​—1 Timoteo 6:12, 19.

22. (a) Nitubasa ‘kuguma omu burora obuli burora kwo’ tutai? (b) Kubaki oburora obutalihwaho gabo nungi kuruga ahali Katonda?

²² Nitubasa ‘kuguma omu burora obuli burora kwo’ tutai? Nitwetaga ‘kukora ebirungi’, kandi kuba ‘batungi b’ebikorwa birungi.’ (1 Timoteo 6:18) Ekyo nikyorekya okwo tulikwetaga kukoza bilinya ebyo tulikwega omu Bibulia. Kyonka, oburora obuli burora kwo titwakububona rwabushobora bwaitu. Shana, oburora obutalihwaho, gabo nungi muno eyo Yehova alikuha abesigwabe, ekyo “nikyo kisha kya Ruhanga.” (Abaroma 5:15) Mazimakwo, Ishe ichwe ali omwiguru nayenda kuha abakozibe abesigwa egabo egyo.

23. Kubaki noyetaga kukora oburamuzi burungi kany’aka?

²³ Yebaze oti, ‘Isi, inye nimfukamira Katonda omu ngeli eyo alikwikiliza?’ Koramanya okwo olikwetaga kuhinduraho emikalire yawe, kora otyo bwangu. Katulikukora byona ebyo tulikubasa omu kworobera Yehova n’okumwesiga, araba bwirukiro bwaitu. Naija kulinda abesigwabe omu biro by’amaheleruka by’obutwazi  bwa Sitani. Kityo Yehova natumanyisa okwo tulaikara omu nsi eli paradiso nk’okwo yaragaine. Nikwo, nobasa kugira oburora obuli burora kwo kolakora oburamuzi burungi kany’aka.