1. Orw’olikumara kwega ekitabo eki wakwebaza kibazoki?

OYEGIRE amazima g’Ebibulia kuruga omu kitabo eki nk’endagano ya Katonda ey’oburora obutalihwaho, okwo abafu bali, n’eshubi y’okuhimburwa. (Mwegesa 9:5; Luka 23:43; Yohana 5:28, 29; Okushurulirwa 21:3, 4) Rundi wabandize kuterana omu nkiiko za  Abajulizi ba Yehova n’okwesiga okwo niyo dini y’amazima. (Yohana 13:35) Wakuba wabandisize obunywanyi na Yehova n’okulamura kumukolera. Kityo, wakwebaza oti, ‘Ninyetaga kukoraki mbase kukolera Katonda?’

2. Nikihai ekyatairemu ekihika omushaija Omwetiopia kugoba aha kwenda kubatizibwa?

² Okwo nikwo yayehulire omushaija Omwetiopia ayatwire omu kanya kamoi na Yesu. Omu kanya nanka Yesu ahimbwirwe, Filipo, omwegesibwa wa Yesu niwe yarangilire omushaija ogwo. Filipo akamushoborora obwizizi okwo Yesu niwe Masiha. Ebintu eby’omushaija ogwo yayegire bikamutamu ekihika muno, yagoba aha kubaza ati: “Leba aha haliho amaizi! Eky’okuntanga kubatizibwa kiki?”​—Ebikorwa 8:26-36.

3. (a) Yesu akaragilira Abegesibwabe bakoreki? (b) Omuntu nayetagwa kubatizibwa atai?

³ Ebibulia neyegesa nk’okwo koraba noyenda kukolera Yehova, noragirwa kubatizibwa. Yesu akaragilira abegesibwabe ‘bagende omu mahanga gona bagahindure kuba begesibwabe n’okubabatiza.’ (Matayo 28:19) Yesu orwo yabatizibwe akatuteraho obulebero. Yesu tibamushesheire maizi omu mutwe shana akaibikwa wena omu maizi. (Matayo 3:16) Kany’aka Omukirisito orwo alikubatizibwa, kisaine aibikwe omu maizi wena.

4. Isi, noyorekyaki abandi orw’olikubatizibwa?

⁴ Orwo olikubatizibwa, noyorekya abandi okw’olikwenda kuba munywanyi wa Katonda n’okumukolera. (Ezaburi 40:7, 8) Rundi wakwebazaho oti: ‘Ninyetaga kukoraki mbase kubatizibwa?’

5. (a) Otakabatizibwe, noyetagwa kukoraki? (b) kubaki kintu ky’omugasho kuterana obutosha omu nkiiko z’ekikirisito?

⁵ Otakabatizibwe noyetagwa kumanya Yehova na Yesu. Wabandize kugira obumanyi obwo omu kwega Ebibulia. (Shoma Yohana 17:3.) Obumanyi bwonka tibukumara. Ebibulia negamba nk’okwo nitwetaga kugira ‘obumanyi obuli obw’amazima’ obukwete aha byo Yehova alikugonza. (Abakolosai 1:9, NW) Enkiiko z’Abajulizi ba Yehova zirakujuna kugira obunywanyi na Yehova. Egyo nshonga y’omugasho ey’okuterana obutosha.​—Abaheburania 10:24, 25.

6. Noyetagwa kugira obumanyi butai obw’Ebibulia obase kubatizibwa?

⁶ Yehova talikutegereza omanye buli kantu akali omu Bibulia obase kubatizibwa. Tiyalinzire Mwetiopia amanye buli kantu asane kubatizibwa. (Ebikorwa 8:30, 31) Nitwija kugendelera kwega ebikwete ahali Yehova eirai lyona. (Mwegesa 3:11) Kityo kwija kubatizibwa, kisaine omanye n’okwikiliza emyegeso y’Ebibulia ey’omusingi.​—Abaheburania 5:12.

7. Okwega Ebibulia kukujunire kutai?

⁷ Ebibulia negamba eti: “Obuzira mwesigo tikishoboka kumushemeleza.” (Abaheburania 11:6, NW) Kityo, kwija kubatizibwa noyetagwa kugira omwesigo. Ebibulia negamba nk’okwo abantu abandi omu kigo kya karai ekya Korinto, bakahulira emyegeso y’abahondezi ba Yesu, ‘baikiliza babatizibwa.’ (Ebikorwa 18:8) Kwakwo, okwega Ebibulia kukujunire kwesiga endagano za Katonda, n’amani g’ekichunguzo kya Yesu agakubasa kuturokora kuruga omu ntambara n’orufu.​—Yoshua 23:14; Ebikorwa 4:12; 2 Timoteo 3:16, 17.

8. Nikihai ekirakuha ekihika ky’okushoborora abantu abandi ebikwete aha by’oyegire?

⁸ Omu kwega Ebibulia n’okubona amagoba gayo omu mitulire yawe, nikwo omwesigo gwawe guraguma. Oragira ekihika eky’okugambira abandi ebintu ebyolikwega. (Yeremia 20:9; 2 Abakorinto 4:13) Kyonka, orarangilira bahai?

9, 10. (a) Nobasa kubanza kurangilira bahai ebintu eby’oyegire? (b) Noyetagwa kukoraki koraba noyenda kubanza kurangilira n’enteko?

⁹ Nobasa kufumora ebintu eby’olikwega n’abantu ab’eka yawe, banywanyi bawe,batani bawe, anga abolikukora nabo emirimo. kityo, ogire obufura n’engonzi orw’olikufumora nabo. Akanya akalahonderaho, nobasa kwema hamoi n’enteko omu kurangilira. Korayenda kurangilira hamoi n’enteeko, omanyise alikukwegesa Ebibulia. Aho, alikukwegesa Ebibulia alareba nk’osaine na nka n’otura kwigana n’ebyo Ebibulia elikwegesa, entegeka erakorwa iwe n’alikukwegesa Ebibulia mubase kufumora n’abagurusi babili b’enteko.

¹⁰ Nibintuki ebyomurafumora omu rukiiko orwo? Abagurusi barafumora naiwe babase kumanya nka noshobokerwa n’okwesiga emyegeso y’omusingi y’Ebibulia, n’otura kwigana n’emiku y’Ebibulia, na nka noyenda kuba Mujulizi wa Yehova. Oijuke nk’okwo abagurusi nibashumba enteko, naiwe obulimu, kityo otatina kufumora nabo. (Ebikorwa 20:28; 1 Petero 5:2, 3) Orwo muramara orukiiko orwo, abagurusi barakumanyisa nk’osaine kubanza kurangilira n’enteko.

11. Kubaki kisaine ohindureho emitulire yawe otakabandize kurangilira n’enteko?

¹¹ Aliho orwo abagurusi bakukuhanulira kohinduraho  emitulire yawe, otakabandize kurangilira n’enteko. Kubaki kintu ky’omugasho kukora otyo? Orw’okuba katulikufumora n’abandi ebikwete ahali Katonda, nituba twemereleire eibara lya Yehova, naichwe nitwetagwa kutura omu mitulire elikumuha ekitiinwa.—1 Abakorinto 6:9, 10; Abagalasia 5: 19-21.

12. Kubaki chwena nitwetagwa kwechuza?

¹² Aliho ekindi eky’olikwetaga kukora otakabatizibwe. Entumwa Petero ekagamba eti: “Aha rw’ekyo, mwechuze, muhinduke mugarulirwe amafu ganyu.” (Ebikorwa 3:19) Kwechuza nikwo kukoraki? Nikwo kwefuuhya n’okutamwa amafu g’okozire. Tugambe, koraba wabaire nosiyana, noyetagwa kwechuza. N’orwo wabaire noyekaza kwikara omu mikalire mirungi, noyetaga kwechuza orw’enshonga chwena tuli bafakare, nitwetagwa kushaba obuganyizi ahali Katonda.—Abaroma 3:23; 5:12.

13. ‘Okuhinduka’ nikwo kukoraki?

¹³ Okwefuuhya n’okutamwa amafu gokozire, isi, ekyo nikimara? Chei. Entumwa Petero ekagamba okwo tulikwetagwa ‘kuhinduka.’ Ekyo nikyorekya nk’okwo noyetaga kulekera ebintu ebibi ebyo wabaire nokora karai n’okubanza kukora ebirungi. Tekereza nogenda omu kichweka eky’otakagyamuga. Omu kanya kake, nohaba omuhanda. Olakoraki? Noija kubanza kutambuka mpora mpora, oyemelere n’okureba enyuma, oshube ohondere omuhanda ogurakugobya mbali oli kugya. Kwakwo, k’olikugendelera kwega Ebibulia, nomanya nk’okwo aliho emize n’emimanyilire ey’olikwetaga kulekera. Obe mwangu  ‘w’okuhinduka,’ olekere emize mibi, n’okubanza kukora ebintu ebirungi.

14. Noyehongera Yehova otai?

¹⁴ Okwehongera Yehova n’ekintu ekindi ekilikugasha muno eky’olikwetwega kukora otakabatizibwe. Orwo olikwehongera Yehova omu nshara, n’oragana okwo olikwija kufukamira wenene wenkai, n’okwebembeza engonzize omu mikalire yawe.​—Obwijukiro bw’ebiragiro 6:15.

15, 16. Nikihai ekilikukora omuntu ayehongere Yehova?

¹⁵ Orwo olikuraganira Yehova okwo oramukolera, ni nk’okwo wakuraganira omuntu ow’olikwenda okwo olaikara nawe omu burora bwawe bwona. Tekereza omusigazi n’omwisiki nibabandisa obuywanyi. Omusigazi orwo alikugendelera kumanyage omwisiki ogwo, aramwenda muno mara arayenda kumushwera kaba mukaziwe. N’orwo buli buramuzi obusikiire, omusigazi araikiliza obulagirwa obwo orw’okuba namwenda.

¹⁶ Orwo olikugendelera kwega ebikwete ahali Yehova, oramwenda mara orayenda kumukolera. Ekyo kirakutamu ekihika kushaba ahali wenene n’okuragana kumukolera. Ebibulia negamba okwo buli muntu arayenda kuhondera Yesu kisaine “ayeyange wenene.” (Mariko 8:34) Ekyo nikyorekyaki? Nikyorekya okwo okworobera Yehova nikyo kintu kikuru omu burora bwawe. Kwebembeza engonzi za Yehova kiraba kintu ky’omugasho, kushaga ebintu byona eby’olikwenda.​—Shoma 1 Petero 4:2.

17. Kubaki abantu abandi nibatina kwehongera Yehova?

¹⁷ Abantu abandi nibanga kwehongera Yehova orw’enshonga nibatekeleza nk’okwo nibaija kuremwa kugendelera kukolera Yehova. Oshange nibatina kumukosheza anga nibatekeleza nk’okwo kabaraba batehongeire Yehova talibenza rubara.

18. Nikihai ekirakujuna otatina kukosheza Yehova?

¹⁸ Engonzi zawe ahali Yehova zirakujuna otatina kumukosheza. Orw’okuba nomwenda, orayekaza kugobesheleza endagano yawe. (Mwegesa 5:4; Abakolosai 1:10) Tikikugumire kukora engonzi za Yehova. Entumwa Yohana ekahandika eti: “Manyasi ezi nizo ngonzi za Ruhanga: kwekomya emihangoye. Nobona emihangoye tesikilira muno muntu.”​—1 Yohana 5:3.

19. Kubaki otalikwetaga kutina kwehongera Yehova?

¹⁹ Ti mpaka obe ohikiilire obase kwehongera Yehova. Takutegereza katukora ebintu ebyotutaina bushobora nabyo. (Ezaburi 103:14) Arakujuna kukora ebirungi. (Isaya 41:10) Oyesige Yehova, “arakwolekaga omuhanda ogw’amazima.”—Emigani 3:5, 6.

20. Korayehongera Yehova oragobera muruka ki ogundi?

²⁰ Isi, wayetekatekire kwehongera Yehova? Korayehongera Yehova, oraba osaine kugobera omuruka gw’okubatizibwa.

21, 22. Noyorekya otai omwesigo gwawe ‘omu kweyanjura omu mbaga’?

²¹ Manyisa omutegeki w’abagurusi b’enteko yawe okwo wayehongeire Yehova n’okwo olikwenda kubatizibwa. Ogwo aratekateka abagurusi mufumore hamoi emyegeso y’omusingi y’Eibulia. Kabarabona  osaine, barakumanyisa okwo orabatizibwa omu nterano elikwija ey’Abajulizi ba Yehova. Omu nterano, omwegeso ogulikushoborora enshonga y’okubatizibwa gurayegesibwa. Kandi omwegesa orwo aramara naija kushaba balinya abetekatekire kubatizibwa bahorore ebibazo bibili ebitalikuguma. Omu kuhorora ebibazo ebyo, noija kuba ‘orangire omwesigo gwawe omu mbaga’.​—Abaroma 10:10, NW.

 ²² Orabatizibwa. Oraibikwa omu maizi. Omu kubatizibwa orayorekya embaga okwo wayehongera Yehova n’okwo waba Mujulizi wa Yehova.

23. Okubatizibwa “omwibara lya Tata n’Omwana n’Omwoyo ogutakatifu” nikwo kukoraki?

²³ Yesu akagamba okwo abegesibwabe bakubatizibwe “omwibara lya Tata n’Omwana n’Omwoyo gutakatifu.” (Shoma Matayo 28:19, NW.) Ekyo nikimanyisaki? Nikyorekya kumanya obushobora bwa Yehova n’omuruka gwa Yesu omu kugobeshereza ekigendelero kya Katonda n’okwo alikukoza omwoyogwe ogutakatifu kugobeshereza engonzize.​—Ezaburi 83:18; Matayo 28:18; Abagalasia 5:22, 23; 2 Petero 1:21.

24, 25. (a) Okubatizibwa nikwo kukoraki? (b) Turafumorahoki omu mutwe gw’enzindo gw’ekitabo eki?

²⁴ Okubatizibwa nikwemelerera ekintu ky’omugasho muno. Kwibikwa omu maizi, nikworekya okwo walekera emitulire yawe eya karai. Orw’olikwiburuguka kuruga omu maizi, nobanza emitulire miya ey’okukora engonzi za Katonda. Nomanyisa okwo kubandiza kany’ako n’okugendelera waba mukozi wa Yehova. Oijuke okwo tiwayehongera muntu, eishirika anga mulimo nanka shana wayehongera Yehova.

²⁵ Okwehongera Yehova kurakujuna kugumisa obunywanyi hamoi nawe. (Ezaburi 25:14) Ekyo tikilikworekya nk’okwo omuntu alarokorwa orw’enshonga abatiziibwe. Entumwa Paulo ekahandiika eti: “Muteho amani mubone kurokoka, nimutina nimuchundwa.” (Abafilipi 2:12) Okubatizibwa niyo mbandizo. Kityo wakubasa otai kwikara haihi na Yehova? Omu twe gw’enzindo gw’ekitabo eki gulahorora ekibazo ekyo.