1, 2. Yehova nayenda amaka gabe gatai?

YEHOVA niwe yabandisize omuruka gw’obushwere bwambere. Ebibulia negamba okwo niwe yatonzire omukazi wa mbere, yashuba yamureta aha mushaija ogwo. Adamu akashemelerwa muno, ashuba agamba ati: “Mbwenu aha eli igufa elyaruga omu magufa gange, mara mubili ogwaruga aha mubili gwange.” (Embandizo 2:22, 23) Ekyo nikyorekya okwo Yehova alikwenda balinya abali omu bushwere, bagire ebyera.

² Nikijunahaza muno kany’aka kubona eka zingi tizina byera. Kyonka Ebibulia eina emiku eyakubasa kujuna buli muntu ali omu maka, agobeshereze omurukagwe n’okushemelerwa kuba hamoi nabo.​—Luka 11:28.

3, 4. (a) Omushaija nayetaga kukoleratai Mukaziwe? (b) Kubaki kisaine Omushaija n’omukazi baganyirangane omu bweyendezi?

³ Ebibulia negamba okwo omushaija murungi n’olinya alikwenda mukaziwe n’okumukunira. Shoma Abaefeso 5:25-29. Akanya kona kisaine omushaija akolere mukaziwe omu ngonzi, amulinde, amwikaz’ege, n’okutamukolera kintu kyona kyona ekyakumuletera amajune.

⁴ Kisaine omushaija akoreki, orwo mukaziwe aramukosheza? Ebibulia netegekera abashaija eti: “Inywe bashaija mugonze bakazi banyu mara mutabagilira bukatili.” (Abakolosai 3:19) Nainywe bashaija mwijuke  nk’okwo mukosheza bakazi banyu. Koraba noyenda Katonda akuganyire, kisaine oganyire mukazi wawe. (Matayo 6:12, 14, 15) Omushaija n’omukazi barashemelerwa obushwere bwabo kabakuganyirangana omu bweyendezi.

5. Kubaki omushaija nayetagwa kukunira muno mukaziwe?

⁵ Yehova nayenda omushaija akunire, n’okumanyage ametage ga mukaziwe. Ekyo kintu ky’omugasho muno. Orw’okuba omushaija alikukolera kubi mukaziwe, Yehova taina kuhuliliza nsharaze. (1 Petero 3:7) Yehova ayetaireho abantu bona abalikumwenda. Aha rw’ekyo talikubona bashaija kuba nibagasha kushaga abakazi.

6. Omushaija na mukaziwe bakuba mubili gumoi batai?

⁶ Yesu akagamba nk’okwo omusahija na mukaziwe “tibakili babili babaire mubili gumoi.” (Matayo 19:6) Kisaine buli omoi abe mwesigwa ahali munywanyiwe. (Emigani 5:15-21; Abaheburania 13:4) Omushaija n’omukazi nibetagwa kugobesherezangana ametage gabo agakwete aha ngono. (1 Abakorinto 7:3-5) Omushaija aijuke nk’okwo “taliho muntu nomoi anoba omubiligwe, shana agulisa n’okuguhyahyanira.” Kityo, kisaine agonze n’okwikazage mukaziwe. Okushaga byona, omukazi nayetaga mushaijawe amugonze muno n’okumugilira obufura.—Abaefeso 5:29.

7. Kubaki eka kisaine egire omutwe gw’okugyebembera?

⁷ Buli ka, neyetaga kugira omutwe gw’okugyebembera, nirwo buli kimoi kilakoreka omu ntegeka nungi. Omu 1 Abakorinto 11:3; Ebibulia negamba eti: “Kirisito niwe aba mutwe gwa buli mushaija. Omutwe gw’omukazi aba mushaijawe, n’omutwe gwa Kirisito aba Katonda.”

8. Omukazi yakwolekya atai mushaijawe amakune?

 ⁸ Nangu orundi, abashaija nabo bakosheza bakazi babo. Kyonka omukazi orwo arahondera oburamuzi bwa mushaijawe n’okwema nawe omu bweyendezi, eka yona eragoshoka. (1 Petero 3:1-6) Nangu Ebibulia negamba eti: “Omukazi wenene akunire mushaijawe.” (Abaefeso 5:33) Isi, kirabakitai orwo omushaija araba ataina mwesigo gumoi na mukaziwe? Kisaine omukazi agendelere kumukunira. Ebibulia negamba eti: “Inywe bakazi muhulire [mworobere] bashaija banyu. Kaharaba haliho abatalikwikiliza kigambo kya Katonda, bashobore kuhindurwa emirolere ya bakazi babo bataina kigambo kyona kyona ekyo babagambire, orwo barabona emirolere yanyu emirungi eshemeire.” (1 Petero 3:1, 2) Emyegendeshereze mirungi y’omukazi, nebasa kukora mushaijawe aikirize n’okukunira omwesigogwe.

9. (a) Omukazi yakukoraki, kayakuba atalikwikiliza buramuzi bwa mushaijawe? (b) Abakazi nibahanulirwaki omwihandiiko lya Tito 2:4, 5?

⁹ Omukazi yakukoraki kayakuba atalikwikiliza buramuzi bwa mushaijawe? Nabasa kushoborora  ebitekerezo bya wenene, amumakune. Obulebero bumoi nibwobu, aliho akanya ako Aburahamu atahulilize bitekerezo bya mukaziwe Sara, kyonka Yehova akamugambira ati: “Huliliza eiraka lya mukazi wawe.” (Embandizo 21:9-12, NW) Omukazi kisaine ahondele oburamuzi bwa mushaijawe kaburaba butalikwita miku ya Katonda (Ebikorwa 5:29; Abaefeso 5:24) Omukazi murungi aikazage ekaye. (Shoma Tito 2:4, 5.) Omushaija n’abana, orwo balikubona nakora emilimo n’ekihika baramugonza n’okumukunira muno.—Emigani 31:10, 28.

10. Ebibulia negambaho etai ekikwete aha kwangana n’etalaka?

¹⁰ Akanya akandi aliho ebintu ebyakukora omushaja n’omukazi bangane anga kuhangana etalaka. Kyonka Ebibulia negamba eti “Omukazi atateishurana na mushaijawe n’omushaija kwakwo.” (1 Abakorinto 7:10, 11, NW) Okwangana okulikujuburwa nihalinya orwo omushaija n’omukazi balikuba bakolerangaine kubi muno, kyonka obwo nibuba buli buramuzi obusikiile. Isi, okuhangana etalaka kulikutai? Ebibulia negamba nk’okwo enshonga eyakukora omushaija n’omukazi bahangane etalaka n’obusiyani.—Matayo 19:9.

11. Abana nibetagaki kuruga aha bazaire babo?

¹¹ Abazaire, nimwetagwa kukoza akanya kangi n’abana banyu. Abana nibetaga muno abazaire babo kushaga ekintu kyona kyona, nibenda mubegese ebikwete ahali Yehova.—Obwijukiro bw’ebiragiro 6: 4-9.

12. Abazaire nibetaga kukoraki babase kulinda abana babo?

¹² Ensi egi elikutwarwa Sitani ebaire mbi muno, elimu abantu abalikwenda kukora kubi abana baitu, n’okubasiyanisa. Nikiguma muno abazaire abandi kwegesa  abana babo ebikwete aha ngono. Kyonka, abazaire nibetagwa kuhana abana babo n’okubegesa okwo bakubasa kwelinda n’abantu abo ababi. Inywe bazaire, nimwetagwa kulindage abana banyu. *​—1 Petero 5:8.

13. Abazaire nibetagwa kwegesa abana babo batai?

¹³ Abazaire baina omuruka gw’okwegesa abana babo engesho zirungi. Isi, nobasa kwegesa otai abana bawe engesho zirungi? Abana bawe nibetaga omuhano, kyonka omuhano ogwo ogubahe omu ngeli etali yabukatili.  (Yeremia 30:11) Kityo, otakuhana mwana wawe oina kiniga. Otakumugambira bigambo byakumushasa “ebilikuchumita nk’embanda.” (Emigani 12:18) Oyegese abana bawe babase kumanya okwo bakukworobera.—Abaefeso 6:4; Abaheburania 12:9-11; Shoma Ekishoborozo Ekyongeirweho 30.

14, 15. Kubaki abana nibetaga kukunira abazaire babo?

¹⁴ Yesu akorobera ishe ebiro byona, n’orwo akanya akandi kyabaire nikiguma kukora atyo. (Luka 22:42; Yohana 8:28, 29) Kityo, Yehova nayenda abana borobere abazaire babo.​—Abaefeso 6:1-3.

¹⁵ Abana n’orwo akanya akandi muragumirwa kworobera abazaire banyu, mwijuke nk’okwo orwo muragendelera kuborobera murashemeleza Yehova n’abazaire banyu. *​—Emigani 1:8; 6:20; 23:22-25.

16. (a) Sitani nabasa atai kuhabisa abasigazi n’abaisiki? (b) Kubaki nikigasha muno kuronka abanywanyi abalikugonza Yehova?

¹⁶ Sitani nabasa kukoza banywanyi bawe anga abasigazi n’abaisiki babase kukwohya okore ebintu ebibi. Orw’okuba namanya orabaikiliza. Obulebero bumoi ni Dina muhara wa Yakobo, akaba aina abanywanyi abatalikugonza Yehova. Kyonka obunywanyi obwo bukaleta amashasi gangi ahali wenene n’ekaye. (Embandizo 34:1, 2) Orwo banywanyi bawe balaba batalikugonza Yehova nibabasa kukwohya okore ebyo Yehova atalikwenda, mara ekyo kyakushasa iwe, eka yawe, hamoi na Katonda. (Emigani 17:21, 25) Nikigasha muno kuhiga abanywanyi abalikugonza Yehova.​—1 Abakorinto 15:33.

17. Buli omoi aly’omumaka aina murukaki?

¹⁷ Eka yona orwo elikuhondera enyorekelera za Katonda ekyo nikibakora belinde n’amashasi gangi. Kityo iwe koraba oli mushaija ogonze mukazi wawe. Omukazi nawe nayetaga kworobera n’okukunira mushaijawe, kandi nayetagwa kurondora omukazi alikugambwa omwihandiiko ly’ Emigani 31:10-31. Iwe koraba oli muzaire, yegesa abana bawe bagonze Katonda. (Emigani 22:6) Iwe koraba oli ishe bana, habura eka yawe ehondere “omuhanda gurungi.” (1 Timoteo 3:4, 5; 5:8) Inywe bana mworobere bazaire banyu. (Abakolosai 3:20) Mwijuke nk’okwo buli muntu aly’omumaka nabasa kukosheza mutahiwe, aha rw’ekyo noyetaga obe mwetohya n’okushaba abandi obuganyizi. Nikwo, Ebibulia eina entwaza za Yehova ezakubasa kujuna buli muntu ali omu maka.