1, 2. Kubaki notekeleza enshara kuba gabo nungi muno, kubaki nitwetaga kumanya ebyo Ebibulia elikwegesa ebikwete aha nshara?

ENSI ninke muno orwo elikwiganisibwa n’esayari ezo Yehova yatonzire. Orwo Yehova alikureba omu nsi, abantu b’omumahanga gona niba boneka nk’eitonyia ly’amaizi omu ndoo. (Ezaburi 115:15; Isaya 40:15) N’orwo ichwe tulikuboneka kuba bake muno orwo tulikwiganisibwa n’esayari ezo Yehova yatonzire, Ezaburi 145:18, 19 negamba eti: “Omukama abakamutakira bona abali haihi, bona abamutakira nibamwesiga. Abamutina bona abatunga ebyo balikwenda, kandi ahulira okutaka kwabo, mara abarokora.” Ekyo kitiinwa kihango muno! Yehova, Omutonzi Rushoborabyona nayenda tumwilire haihi, mara nayenda kuhuliliza enshara zaitu. Mazima, enshara gabo nungi muno eyo Yehova atuhaire.

² Kityo, Yehova alatuhuliliza katurashaba omu ngeli eyo alikwikiliza. Nitubasa tutai kushaba omu ngeli egyo? Leka tulebeho ebyo Ebibulia elikugamba.

3. Kubaki nitwetagwa kushaba ahali Yehova?

³ Yehova nayenda oshabe ahali wenene. Nitumanya tutai? Oshome Abafilipi 4:6, 7. Tekelezaho omuraliko ogwo. Omutwazi w’eiguru n’ensi nakwetaho muno, nakushaba omubarulire ebyemba byawe n’okwo olikwehulira.

4. Kushaba obutosha, nikugumisa kutai obunywanyi bwawe na Yehova?

⁴ Enshara netujuna kugira obunywanyi na Yehova  Abanywanyi b’amazima orwo balikugendelera kufumoraho ebitekerezo byabo, amahangahangwa n’okwo bali kwehulira, kabali kukora batyo, obunywanyi bwabo nibugoshoka. Nikwo kili aha bunywanyi bwaitu na Yehova. Kulabira omu Bibulia nakumanyisa ebitekerezobye, n’ebintu byona ebyalakora omu kanya akalikwija. Wakubasa kumushoborora okwoli kwehulira omu kushaba obutosha, kolakora otyo obunywanyi bwawe na Yehava nibwija kuguma muno.—Yakobo 4:8.

5. Nitumanya tutai okwo Yehova tahuliliza nshara zona?

⁵ Isi, Yehova nahuliliza enshara zona? Chei. Omu makiro ag’omurangi Isaya, Yehova akagambira Abaisiraeli ati: “N’orwo murashoma muno enshara timbahulilize, ahakuba mwisire muno abantu.” (Isaya 1:15) Aha rw’ekyo, katutalebirege nitubasa kukora ebintu ebyakutwihya ahali Yehova, n’ekyo kyakumukora atahuliliza nshara zaitu.

6. Kubaki nikigasha kugira omwesigo? Wakworekya otai okwo oina omwesigo?

 ⁶ Katurayenda kahuliliza enshara zaitu, kisaine tugire omwesigo ahali wenene. (Mariko 11:24) Entumwa Paulo ekashoborora eti: “Obuzira mwesigo tikishoboka kumushemeleza. Kuba wenene ailira haihi na Katonda kimusaniire kwesiga Katonda okwo aliho, kandi okwo aha emperwa abamuhiga omu kihika.” (Abaheburania 11:6, NW) Aha rw’ekyo, tikilikumara kugira omwesigo kushai. Nitwetaga kworekya omwesigo gwaitu omu kworobera Yehova buli kiro.​—Shoma Yakobo 2:26.

7. (a) Orwo tulikushaba ahali Yehova, kubaki nitwetagwa kugira amakune n’obwetohya? (b) Twakworekya tutai okwo tulibagorogoki omu kushaba kwaitu?

⁷ Orwo tulikushaba ahali Yehova, nitwetagwa kugira amakune n’obwetohya. Kubaki? Katwakwetaga kufumora n’omukama anga raisi, twakukora tutyo omu makune. Yehova niwe Katonda Rushoborabyona, kityo, nitwetagwa kugira obwetohya n’amakune omu kufumora nawe. (Embandizo 17:1; Ezaburi 138:6) Kandi, nitwetagwa kuba bagorogoki n’okushaba ahali Yehova kuruga omu mwoyo, tikushaba nshara za kugaruka garukamu.​—Matayo 6:7, 8.

8. Orwo tulikushaba ekintu nanka, nitwetagwa kukora kintuki ekindi?

⁸ Orwo tulikushaba ekintu nanka, nitwetagwa kukora byona ebyo tulikubasa, kwigana n’enshara zaitu. Tugambe, twashaba ahali Yehova atujune kubona ekyakulya, katuraba twina amani g’okukora emilimo tutakuba banafu tutegereze Yehova atuwe buli kantu. Kisaine kukora n’ekihika kingi muno omulimo gwona gwona ogwo tulikubasa. (Matayo 6:11; 2 Abatesalonika 3:10) Orwo tulikushaba Yehova atujune kulekera omuze gubi, kitusaine kweshumba ekintu kyona kyona ekyakutugarura omu kilengeso ekyo. (Abakolosai 3:5) Leka tuhenjuzeho  ebibazo ebyo abantu bangi balikwebaza, ebikwete aha nshara.

9. Nitwetagwa kushaba ahali ohai? Eihandiiko lya Yohana 14:6 nilitwegesaki ebikwete aha nshara?

⁹ Nitwetagwa kushaba ahali ohai? Yesu akegesa abahondezibe bashabe bati: “Isheichwe asingiire omwiguru.” (Matayo 6:9) Ashuba agamba ati: “N’inye muhanda, n’amazima, n’oburora. Taliho muntu agoba Tata atarabire ahali inye.” (Yohana 14:6) Kityo, nitwetagwa kushaba ahali Yehova wenkai kulabira ahali Yesu. Ekyo nikyorekyaki kushaba enshara kulabira ahali Yesu? Katurayenda Yehova ahulilize enshara zaitu, nitwetagwa kukunira omwoga ogwo Yehova ahaire Yesu. Nk’okwo twayegire, Yesu akaija omu nsi, kutuchungura kuruga omu ntambara n’orufu. (Yohana 3:16; Abaroma 5:12) Kandi Yehova ataireho Yesu kaba mweza mukuru n’omuramuzi.​—Yohana 5:22; Abaheburania 6:20.

10. Isi, nitwetagwa kugira emichonchozo omu kushaba kwaitu?.Shoborora.

¹⁰ Isi, nitwetagwa kugira emichonchozo omu kushaba? Chei, Yehova talikwetaga katuteka majwi, kunshuntama, anga kwemelera orwo tulikushaba. Ebibulia netwegesa nk’okwo nitubasa kufumora na Yehova omu ngeli yona yona, kyonka omu makune. (1 Amakuru 17:16; Nehemia 8:6; Danieli 6:10; Mariko 11:25) Ekintu ky’omugasho ahali Yehova, tikugira michonchozo omu kushaba shana n’okushaba twina ekigendelero kirungi. Twakubasa kushaba omwiraka anga omu biwi, tuli hona hona, n’omu kanya kona kona gube guli mushana anga omu kiro. Orwo tulikushaba ahali Yehova, nitwetagwa kwesiga nk’okwo naija kutuhuliliza.​—Nehemia 2:1-6.

11. Nitubasa kushaba bintuki ahali Yehova?

 ¹¹ Nitubasa kushabaki? Nitubasa kushaba ekintu kyona kyona kwigana n’engonzi za Yehova. Ebibulia negamb’eti: “Kyona kyona ekyo turamushaba kuhondera okwo alikwenda aratuhulira.” (1 Yohana 5:14) Isi, twakubasa kushaba ebintu ebitukweteho? Ego. Nitwetagwa kufumora na Yehova nk’okwo tufumora na munywanyi waitu. Nitubasa kufumolera Yehova buli kantu akali omu mwoyo gwaitu. (Ezaburi 62:8) Nitubasa kumushaba omwoyogwe ogutakatifu gubase kutujuna kukora ebirungi. (Luka 11:13) Twakushaba Yehova katuha obumanyi oburatujuna kukora oburamuzi burungi, kandi twakumushaba katuha amani agakutujuna kwemera enaku n’ebirengeso. (Yakobo 1:5) Nitwetagwa kumushaba atuganyire entambara zaitu. (Abaefeso 1:3, 7) Kityo, nitwetaga kushabira abandi omu nshara zaitu, nk’eka zaitu, barumuna na banyanyazi abali omu nteko.​—Ebikorwa 12:5; Abakolosai 4:12.

12. Nibintuki eby’omugasho ebyo twakugamba omu nshara zaitu?

¹² Nitwetagwa kwebembezaki omu nshara zaitu? Nitwetagwa kwebembeza Yehova n’ebyalikwenda. Kandi nitwetagwa kumusiima kuruga omu mwoyo orw’enshonga y’ebintu byona eby’alikutukolera. (1 Amakuru 29:10-13) Nitumanya ekintu ekyo orw’enshonga Yesu orwo yabaire ali omu nsi, akegesa abegesibwabe okwo bakushabire. (Shoma Matayo 6:9-13.) Ekyambere akagamba okwo balikwetagwa kushaba okwezibwa kw’eibara lya Katonda, okwo nikwo kulikunira n’okulibona lili litakatifu. Akashuba yagamba okwo tulikwetagwa kushaba obukama bwa Katondabwije n’engozize zikorwe omu nsi. Orwo tulamara kushaba tutyo aho tushabe ebintu ebikwete ametage gaitu. Nitworekya okwo tulikwebebeza ebintu by’omugasho muno omu mikalire yaitu  orwo tulikwebembeza Yehova n’ebyagonza omu nshara zaitu.

13. Enshara zaitu nizetagwa kutwara ibangaki?

¹³ Enshara zaitu nizetagwa kutwara ibangaki? Ekyo tikilikugambwa omu Bibulia. Enshara zaitu zakuraiya anga zigufuhara kwigana n’ametage gaitu. Katulikuba nitwenda kulya twakushaba enshara ngufi, kyonka omu kumusiima anga kumutakira enaku zaitu,  nitubasa kushaba enshara ndai. (1 Samweli 1:12, 15) Titulikwetagwa kushaba nshara ndai omu kweyorekya, nk’abantu abandi omu biro bya Yesu okwo bakozire. (Luka 20:46, 47) Enshara nk’ezo, Yehova tizikumushemelera. Kushaba ahali Yehova kuruga omu mwoyo nikyo kintu ky’omugasho.

14. Nitwetagwa kushaba emirundi engahai, ekintu ekyo nikitwegesaki ahali Yehova?

¹⁴ Nitwetagwa kushaba emirundi engahai? Yehova naturaliza tufumore nawe obutosha. Ebibulia negamba okwo tulikwetaga ‘kushoma enshara,’ “mushome enshara obutosha” ‘n’okushoma buli kanya.’ (Matayo 26:41; Abaroma 12:12; 1 Abatesalonika 5:17) Yehova mwangu kutuhuliliza omu kaya konakona. Nitubasa kumusiima buli kiro orw’eshonga y’engonzize. Kandi, nitubasa kumushaba atuhabure, atutunge amani n’okutuhumuliza.  Katulaba nitwetaho egabo egi ey’enshara tulakoza buli kanya akotulikubona kushaba ahali wenene.

15. Kubaki nitwetagwa kugamba “amina” omu nzindo y’enshara?

¹⁵ Kubaki tugambe “amina” omu nzindo y’enshara? Ekigambo “amina” nikwo kugamba “nikwo” anga “bibe bityo.” Ekyo nikyorekya nk’okwo tulikwikiliza ebyagambwa omu nshara, n’okwo ichwe tulibagorogoki. (Ezaburi 41:13) Ebibulia neyegasa nk’okwo nikirungi kugamba “amina” omu biwi anga omukwatura eiraka, aha nzindo y’enshara orw’enshonga y’abantu bona, kworekya okwo tulikwikiliza ebyashabwa.​—1 Amakuru 16:36; 1 Abakorinto 14:16.

16. Isi, Yehova nahuliliza enshara zaitu kwo? Shoborora.

¹⁶ Isi, Yehova nahorora enshara zaitu kwo? Ego. Ebibulia negamba okwo “Ahulira enshara zaitu.” (Ezaburi 65:2) Yehova nahuliliza n’okuhorora enshara ezilikushabwa abantu bona omu bugorogoki, Nawe nazihorora omu ngeli etali emoi.

17. Yehova nakoza atai abamalaika hamoi n’Abakirisito abali omu nsi kuhorora enshara zaitu?

¹⁷ Yehova nakoza abamalaika n’abakozibe kuhorora enshara zaitu. (Abaheburania 1:13, 14) Aliho obulebero bungi obw’abantu abashabire obujuni bw’okushobokerwa Ebibulia, omu kanya kagufi Abajulizi ba Yehova babakyalira. Ebibulia neyorekya nk’okwo abamalaika nabo nibakora omulimo gw’okurangilira “evangeli” omu nsi yona. (Shoma Okushurulirwa 14:6.) Wakushanga turashabire ahali Yehova ebikwete aha matangwa nanka twashuba twahabwa obujuni obwo twabaire nitwetaga kuruga omu Bakirisito batahi baitu.​—Emigani 12:25; Yakobo 2:16.

18. Yehova nakoza atai omwoyo ogutakatifu n’Ebibulia kuhorora enshara zaitu?

 ¹⁸ Yehova nakoza omwoyo ogutakatifu kuhorora enshara zaitu. Katulikushaba obujuni bw’okwemera ekyemba nanka, nabasa kukoza omwoyogwe kutuhabura n’okutugumisiliza. (2 Abakorinto 4:7) Kandi, Yehova nakoza Ebibulia kuhorora enshara zaitu n’okutujuna kukora oburamuzi omu bushobokerwa. Katuli kushoma Ebibulia, twakubona amahandiiko agakutujuna. Yehova nabasa kusindika omuntu nanka kuhorora empororo omu nkiiko zaitu eya kubasa kutujuna, anga kukoza omugurusi w’enteko atushomere eihandiiko kuruga omu Bibulia elyakututamu ekihika.​—Abagalasia 6:1.

19. Kubaki omu kanya akandi kyakuzoka nk’okwo Yehova talikuhorora nshara zaitu?

¹⁹ Akanya akandi twakwebaza tuti: ‘Kubaki Yehova takahoroire nshara zange?’ Oijuke nk’okwo namanya akanya n’omuhanda ogulikugasha ogw’okuhoroleramu enshara zaitu. Namanya ekyo tulikwetaga. Kityo, Katulikugendelera kushaba ekintu ekyo, nitworekya okwo twina obwetage n’okwo tulikumwesiga. (Luka 11:5-10) Akanya akandi Yehova nahorora enshara zaitu kulabira omu mihanda eyo tutetegeire. Nitubasa kushaba Yehova katujuna enaku ezilikutugwaho, n’orwo yakuba atatwihireho naku ezo, natuha amani g’okuzemera.—Shoma Abafilipi 4:13.

20. Kubaki kitusaine kushaba ahali Yehova emirundi mingi?

²⁰ N’ekitiinwa kihango muno kufumora na Yehova omu nshara! Aha rw’ekyo nitwesiga okwo alatuhuliliza. (Ezaburi 145:18) Katulikugendelera kushaba Yehova kuruga omu mwoyo obunywanyi bwaitu nawe bulagoshoka.