EISOMO LYA 11

Okwo Wakubasa Kugoshoka Muno Orw’olikushoma Ebibulia

ZANISA

Isi, orayehulire nogumirwa kubanza omulimo nanka oguli guhango? Orwo wabaire otakabandize omulim’ogwo, rundi okagugaba omu bichweka ebikei bike kibe kyangu kugumara. Nikwo kili n’okushoma Ebibulia. Rundi noyebaza oti, ‘Mbandize nkahai?’ Omwisomo eli, turahenjuza ebintu ebili kushoboka bwangu ebyo wakukora obase kushemelerwa kushoma n’okwega Ebibulia.

1. Kubaki nitwetagwa kushoma Ebibulia obutosha?

Omuntu alikushoma Ebibulia anga “eiteka ly’Omukama obutosha” aragira ebyera kandi aragoshoka. (Shoma Ezaburi 1:1-3.) Nobasa kubanza kushoma Ebibulia omu dakika zike buli kiro. Okw’olikugendelera kushobokerwa ekigambo kya Katonda, nikwo orashemelerwa muno kushoma Ebibulia.

2. Nikihai ekirakujuna kugoshoka orw’olikushoma Ebibulia?

Obase kugoshoka muno orw’olikushoma Ebibulia, noyetagwa kwikyaho n’okwekonja ebintu eby’olikushoma. Noyetagwa kugishoma ‘n’okwekuuma.’ (Yoshua 1:8) Orw’olikugishoma, yebaze ebibazo ebi: ‘Amakuru aga niganyegesaki ekikwete ahali Katonda waitu Yehova? Nakubasa kugakozesa ntai omu mikalire yange? Enjuru ezi nakuzikozesa ntai kujuna abandi?’

3. Nobasa kuhiga otai akanya ak’okushoma Ebibulia?

Isi, iwe nogumirwa kukwasa akanya ak’okushoma Ebibulia? Bangi omu lichwe nikiba kityo. Yekaze kukozesa ‘kurungi omwanya gwawe.’ (Abaefeso 5:16) Nobasa kukora otyo omu kuhiga akanya akali kugasha kushoma Ebibulia buli kiro. Abantu abandi nibashoma Ebibulia omu bwankya karai. Abandi nibenda kugishoma bwamushana, rundi omu kanya kokulya ekyakulya kya bwamushana. Nabandi nibashoma Ebibulia omu kiro batakabyamire. Isi iwe nikanyaki akalikukugasha?

MANYURUZA

Yega omanye okwo wakubasa kushemelerwa kushoma Ebibulia. Kandi, obone okwo wakubasa kwetekateka kurungi obase kugoshoka muno orwo olikwega Ebibulia.

Nk’okwo twakubasa kwega kwenda ebyakulya ebya buli ngeli, nikwo twakubasa kwega kushemelerwa kushoma Ebibulia

4. Yega okwo wakushemelerwa kushoma Ebibulia

Rundi tikyakukwanguira kubanza kushoma Bibulia. Kyonkai nitubasa kukuza orwoyoyo rw’okukora tutyo, nk’omuntu alikwega kulya ekyakulya eky’atamanyire. Shoma 1 Petero 2:2, mushube mufumoreho ekibazo eki:

Isi, notekeleza korashoma Ebibulia buli kiro, orashemelerwa n’okwegomba kugendelera kugishoma?

Yolekya EVIDEO obase kubona okwo abantu abandi babasize kwenda kushoma Ebibulia. Mushube mufumoreho ebibazo ebili kuhonderaho.

EVIDEO: Abasigazi na Abaisiki Nibega Kwenda Ekigambo kya Katonda (5:33)

Omu video egi abasigazi na abaisiki bakasinga changamotoki?
Nikihai ekyabajunire kugendelera kwekomeleza omugendelero gwabo ogw’okushoma Ebibulia?
Bakakoraki ili babase kushemelerwa muno kushoma Ebibulia?

Enyolekelera elikyolekya okwo wakubanza:

Rondaho etafsiri elikwesigwa kandi elikushoboka bwangu. Kozesa Tafsiri ya Ulimwengu Mpya keraba nezoka omu rulimi rwanyu.
Banza omukushoma ebichweka eby’olikwenda muno. Ili obase kubona amapendekezo, leba chati “Banza Kushoma Ebibulia.”
Handika eoroza ey’emitwe y’Ebibulia eyo wamara kushoma “Kozesa Echati y’Erekodi Yawe ey’Okushoma Ebibulia” eli omwichapisho eli.
Kozesa eporogoramu ya JW Library^®. Nobasa kukozesa eporogoramu egyo kushoma n’okuhuliliza Ebibulia oli omu kichweka kyona kyona, omu kukozesa esimu anga ekikwato ekindi eky’ekielektroni.
Kozesa enyongeza ezili omuli Tafsiri ya Ulimwengu Mpya. Alimu eramani, echati, n’ekamusi ezakubasa kukujuna oshemelerwe muno okushoma Ebibulia.

5. Yetekateke otakabandize kushoma Bibulia

Shoma Ezaburi 119:34, mushube mufumoreho ekibazo eki:

Kubaki kirungi kushaba otakabandize kushoma Bibulia anga orw’oli kwetekateka kwega Ebibulia?

Nobasa kugoshoka muno otai buli kanya k’okwega? Orw’olikutekateka eisomo nanka omu kitabo eki, lengesa kukozesa emihanda egi:

Shoma ebichweka ebyambere eby’eisomo elyo.
Shoma amahandiko agali kwolekibwa, kandi ohenjuze okwo gali kugendanwa na amakuru ago.
Tera omusitari aha kigambo anga abichweka ebili kuhorora buli kibazo; okukora otyo kurakujuna orwo oraba noyega eisomo elyo na mwalimu wawe.

Isi, nomanya?

Abajulizi ba Yehova nitukozesa etafsiri eza buli ngeli ez’Ebibulia. Kyonkai, eyotulikwenda kukozesa muno ni Biblia Takatifu Tafsiri ya Ulimwengu Mpya Aha rw’enshonga y’amazima, neshoboka bwangu kandi nekozesa eibara lya Katonda.—Leba emakala eli omutandao, “Isi, Abajulizi ba Yehova Baina Ebibulia Yabo?”

ABANTU ABANDI NIBAGAMBA BATI: “Okwega Ebibulia mulimo oguli kuguma muno. Omu mirundi mingi nimba ndemirwe kandi tinyina kanya ka kwega.”

Iwe oina bitekelezoki?

OMUBIGUFI

Obase kugoshorwa Ebibulia, tekateka akanya k’okugishoma, shaba obase kushobokerwa ebintu eby’olikushoma, kandi otakabandize kwega buli kipindi ky’Ebibulia noyetagwa kwetekateka.