EISOMO LYA 08
Nobasa Kuba Munywanyi wa Yehova
Yehova nayenda omu manye kurungi. Kubaki? Nategeleza nk’okwo orw’olikugendelera kwega ebikwete aha ngeshoze, emihandaye n’omu gendelerogwe, nikwo orayegomba kuba munywanyiwe. Isi, iwe nobasa kuba munywanyi wa Katonda? (Shoma Ezaburi 25:14.) Noyetagwa kukoraki obase kuba munywanyiwe? Ebibulia nehorora ebibazo ebyo kandi neshoborora kubaki kuba munywanyi wa Yehova nibwo bunywanyi obuli burungi muno kushaaga obunywanyi obundi bwona bwona.
1. Yehova nakuraliza okoleki?
‘Ohilire ahali Ruhanga, nawe arakwilira haihi.’ (Yakobo 4:8) Ekyo nikimanyisaki? Yehova nakuraliza obe munywanyiwe. Rundi abantu abandi bakutekeleza nk’okwo nikiguma kuba munywanyi wa Katonda aha rw’enshonga tibali kumubona. Kyonkai, okuraba omu kigambokye Ebibulia, Yehova natugambira ebintu byona ebyo tulikwetaga kumanya ebikwete aha ngeshoze ili tubase kukuza obunywanyi bwaitu ahali wenene. Orwo tulikushoma amakuru ga Katonda agali omu Bibulia, obunywanyi bwaitu ahali wenene nibugendelera kukura, n’orwo tutakamubonaga.
2. Kubaki Yehova niwe Munywanyi waitu ali murungi muno kushaaga ondijo wenawena?
Yehova nakwenda kushaaga omuntu ondijo wenawena. Nayenda ogire ebyera kandi ofumore nawe omu kanya kona kona ak’olikwetaga obujuni. ‘Ebili kukushobeza byona (nobasa) kubikwasa wenene, aha rw’okuba akwetaireho.’ (1 Petero 5:7) Ebiro byona Yehova ali tayari kuhuliliza banywanyibe, kubajuna, n’okubamaramara.—Shoma Ezaburi 94:18, 19.
3. Yehova nategeleza banywanyibe bakoleki?
Yehova nayenda abantu bona, “kyonkai aina obunywanyi katiga nabalinya abali bagorogoki.” (Emigani 3:32, NWT) Yehova nategeleza banywanyibe bakore ebintu ebyalikubona kuba birungi kandi betange ebintu ebibi. Abantu abandi nibatekeleza nk’okwo tibakubasa kuhondera kurungi mateka ga Yehova agakwete aha birungi n’ebibi. Kyonkai, Yehova natushobokerwa kurungi. Naikiliza buli omoi alikumwenda kwo kwo kwo nalikukora okwo alikubasa kumushemeleza.—Ezaburi 147:11; Ebikorwa 10:34, 35.
MANYURUZA
Yega bingi ebikwete okwo wakubasa kuba munywanyi wa Yehova, kandi oshobokerwe kubaki wenene niwe munywanyi ali murungi muno kushaaga Omunywanyi ondijo wena wena.
4. Aburahamu akaba ali munywanyi wa Yehova
Ebaruro y’Ebibulia ekwete ahali Aburahamu (kandi alikwetwa Aburamu) netujuna kushobokerwa okwo twakubasa kuba banywanyi ba Katonda. Shoma ekikwete ahali Aburahamu omu kitabo ky’Embandizo 12:1-4. Mushube mufumoreho ebibazo ebi:
-
Yehova akagambira Aburahamu akoleki?
-
Yehova akamushubizaki?
-
Aburahamu akakoraki orwo yamazire kuhabwa ebiragiro bya Yehova?
5. Ebintu ebyo Yehova alikutegeleza kuruga ahali banywanyibe
Emirundi mingi ichwe nitushubira ebintu nanka kuruga ahali banywanyi baitu.
-
Nibintuki ebyo wakwenda kukolerwa banywanyi bawe?
Shoma 1 Yohana 5:3, mushube mufumoreho ekibazo eki:
-
Yehova nategelezaki kuruga ahali banywanyibe?
Kugya kukunira Yehova, nitwetagwa kuhindura ebikorwa n’engesho zaitu. Shoma Isaya 48:17, 18, mushube mufumoreho ekibazo eki:
-
Kubaki Yehova nayenda banywanyibe bahindure ebikorwa n’engesho zabo?
Omunywanyi murungi natwijukya ebintu ebyakubasa kutulinda n’okutugoshora. Kwakwo Yehova nakora atyo ahali banywanyibe
6. Okwo Yehova alikujuna banywanyibe
Yehova najuna banywanyibe kwemera ebyemba. Yolekya EVIDEO, mushube mufumoreho ebibazo ebili kuhonderaho.
-
Omu video egi Yehova akajuna atai omukazi kwemera ebitekelezo n’ehisia ezitalikugasha?
Shoma Isaya 41:10, 13, mushube mufumoreho ebibazo ebi:
-
Yehova nashubiza banywanyibe bona kuba koleraki?
-
Isi, notekeleza Yehova Munywanyi murungi? Isi kubaki?
Abanywanyi bawe abali katiga barakujuna orw’olikwetaga obujuni. Kwakwo Yehova nawe arakujuna
7. Katuraba nitwenda kuba banywanyi ba Yehova nitwetagwa kufumora nawe
Okufumora nikugumisa obunywanyi. Shoma Ezaburi 86:6, 11, mushube mufumoreho ebibazo ebi:
-
Twakubasa kukozesa mihandaki kufumora na Yehova?
-
Nimuhandaki ogwo Yehova alikukozesa kufumora naichwe?
Nitufumora na Yehova kuraba omu nshara; nawe nafumora naichwe kuraba omu Bibulia
ABANTU ABANDI NIBAGAMBA BATI: “Tikina kubasikana kuba munywanyi wa Katonda.”
-
Nobasa kukozesa ihandikoki kwolekya nk’okwo nikibasikana kuba munywanyi wa Yehova?
OMUBIGUFI
Yehova nayenda kuba Munywanyi wawe, kandi arakujuna ogire obukwatane burungi na wenene.
Isi ebi wakubihorora otai?
-
Yehova najuna atai banywanyibe?
-
Kubaki Yehova nagambira banywanyibe bahindure ebikorwa n’engesho zabo?
-
Isi, notekeleza nikiguma kuba munywanyi wa Yehova? Isi kubaki?
ENJUZA MUNO
Obunywanyi bwawe ahali Katonda nibubasa butai kurengya emikalire yawe?
“Yehova—Katonda Owo Tulikwetagwa Kumanya” (Mnara wa Mlinzi, Omwezi gwa Kabili 15, 2003)
Yega omanye okwo wakubasa kukuza obunywanyi bwawe ahali Katonda.
Yega omanye kubaki omukazi ogu nayehulira nk’okwo obunywanyibwe ahali Yehova bukahindura emikalireye.
Uliliza abasigazi na abaisiki orwo balikugamba okwo bali kwehulira aha kikwete ahali Yehova.
