EISOMO LYA 16
Yesu Akakoraki Orwo Yabaire Ali omu Nsi?
Abantu bangi orwo bali kutekeleza ekikwete ahali Yesu, nibamubona ali mwana muto, murangi aina obumanyi, anga muntu alihai kufa. Kyonkai nitubasa kwega bingi ebimukweteho omu kuhenjuza emikalireye orwo yabaire ali omu nsi. Omwisomo eli, nitwija kuhenjuza ebintu nanka ebili by’omugasho ebyo Yesu yakozire nokwo byakubasa kutujuna.
1. Omulimo gwabaire guli gw’omugasho muno omu mikalire ya Yesu niguhai?
Omulimo gw’omugasho omu mikalire ya Yesu gukaba guli “[kurangilira] evangeli y’Obukama bwa Katonda.” (Shoma Luka 4:43.) Yesu akarangilira amakuru garungi nk’okwo Katonda naija kutaho Obukama, anga eserikali eramaraho ebyemba byona eby’abantu. * Yesu akarangilira omu kihika amakuru ago agali kutamu omwoyo omu myaka eshatu n’enusu.—Matayo 9:35.
2. Kubaki Yesu yakozire emiujiza?
Ebibulia neshoborora “ebikorwa [bingi] eby’amani n’ebintu by’okutangaza n’obubonero obwo Katonda yakozire kuraba ahali [Yesu].” (Ebikorwa 2:22, NWT) Katonda akaha Yesu amani agokuchuleza omuyaga gw’amani, kulisa embaga y’abantu, kukiza abarwaire, nangu n’okuhimbura abafu. (Matayo 8:23-27; 14:15-21; Mariko 6:56; Luka 7:11-17) Emiujiza ya Yesu ekolekya kabutekire nk’okwo akaba atumirwe Katonda. Kandi ekolekya nk’okwo Yehova aina amani ag’okumaraho ebyemba byaitu byona.
3. Nitwegaki kuruga aha mikalire ya Yesu?
Ebiro byona Yesu akagira omuhuliro ali Yehova. (Shoma Yohana 8:29.) Okwihamu okugingizibwa, Yesu akakora omu bwesigwa ebintu byona ebyo Ishe yabaire nayenda kakora omu kanya kona ako yabaire ali omu nsi. Yesu akolekya nk’okwo nikibasikana abantu kukolera Katonda norwo bakuba nibemera ehali ezilikuguma. Kityo, Yesu akatusigira “obulebero [tushobore] kumurondora.”—1 Petero 2:21.
MANYURUZA
Enjuza omanye okwo Yesu yarangilire amakuru garungi n’okukora emiujiza.
4. Yesu akarangilira amakuru garungi
Yesu akarangilira amakuru garungi abantu bangi okwo alikubasa omu kutambuka ekilometa zingi omu mbarabara ezina echuchu. Shoma Luka 8:1, mushube mufumoreho ebibazo ebi:
-
Isi, Yesu akaba narangilira abantu abaijaga kumuuliliza bonkai?
-
Yesu akakozesa ekihika ekilikwigana kitai abase kuhiga abantu?
Katonda akaranga nk’okwo Masiha yakurangilire amakuru garungi. Shoma Isaya 61:1, 2, mushube mufumoreho ebibazo ebi:
-
Yesu akagobesheleza atai oburangi obu?
-
Isi, notekeleza omu kany’aka abantu nibetaga kuhulira amakuru garungi?
5. Yesu akegesa amasomo g’omugasho
Okushaaga kurangilira amakuru garungi ag’Obukama bwa Katonda, Yesu akegesa ebintu ebindi ebili by’omugasho. Tekelezaho obuleberobwe buke obw’ okurangilira okulikumanyika muno okwa aha Ibanga. Shoma Matayo 6:14, 34; na 7:12, mushube mufumoreho ebibazo ebi:
-
Yesu akatuha buhanuziki omunjuru ezo?
-
Isi, netekeleza obuhanuzi obwo nibubasa kujuna abantu kany’aka?
6. Yesu akakora emiujiza
Yehova akaha Yesu obushobora bw’okukora emiujiza mingi. Obase kubona obulebero bumoiho, shoma Mariko 5:25-34 anga Yolekya EVIDEO. Mushube mufumoreho ebibazo ebili kuhonderaho.
-
Omu video egi, olinya omukazi omurwaire akaba aina bwesigeki?
-
Nikintuki ekya kushemelera ekikwete aha muujiza ogwo?
Shoma Yohana 5:36, mushube mufumoreho ekibazo eki:
-
Emiujiza ya Yesu ‘ekajuliraki’ anga ekolekyaki ekimukweteho?
Isi, nomanya?
Ebintu bingi ebyo tulikumanya ebikwete ahali Yesu nibizoka omu bitabo binai eby’Ebibulia ebilikwetwa evangeli, nibyo, Matayo, Mariko, Luka, na Yohana. Buli kitabo ky’evangeli kina amakuru nanka agakwete ahali Yesu agatalikuzoka omu bitabo ebindi. Amakuru ago orwo galikuteranisibwa hamoi nigazora ebaruro eli nungi muno ekweteho emikalire ya Yesu.
-
MATAYO
akabali muntu wambere kuhandika ekitabo ky’evangeli. Akakomeleza emyegeso ya Yesu, okushagaho ebintu ebyo Yesu yayegesize ebikwete aha Bukama bwa Katonda.
-
MARIKO
akahandika ekitabo ekili kigufi muno eky’evangeli. Kina amakuru gangi agali kushemera muno.
-
LUKA
nafumoraho omugasho gw’enshara n’engeli okwo Yesu yakoleire abakazi.
-
YOHANA
akashurura bingi ebikwete aha ngesho za Yesu omu kubarura efumoro zingi eza Yesu na banywanyibe abali katiga kandi na bantu abandi.
ABANTU ABANDI NIBAGAMBA BATI: “Yesu akaba ali muntu murungi bushai, kyonkai akaba atali Masiha.”
-
Iwe oina bitekelezoki?
OMUBIGUFI
Yesu akarangilira ekikwete aha Bukama bwa Katonda, akakora emiujiza, n’okugira omuhuliro ahali Yehova omu kanya kona.
Isi ebi wakubihorora otai?
-
Omulimo ogwabaire kuligw’omugasho muno omu mikalire ya Yesu orwo yabaire ali omu nsi niguhai?
-
Emiujiza ya Yesu ekolekyaki?
-
Yesu akegesa masomoki agali g’omugasho?
ENJUZA MUNO
Ni kintuki ekyo Yesu yafumoireho muno orwo yabaire nakora obuherezabwe omu si?
“Obukama bwa Katonda—Bwina Mugashoki Ahali Yesu?” (Mnara wa Mlinzi, Omwezi gwa Ikumi 1, 2014)
Enjuza omanye ebintu ebili kwolekya kabutekire nk’okwo emiujiza ya Yesu ekabaho kwo.
“Nobasa Kwegaki Kuruga aha Miujiza ya Yesu?” (Mnara wa Mlinzi, Omwezi gwa Mushanju 15, 2004)
Shoma omanye okwo obulebero bwa Yesu obw’okwehayo okwo bwainegeize omushaija nanka.
“Nkaba Nintura Emikalire y’Okweyenda” (Mnara wa Mlinzi, Omwezi gwa Ikumi 1, 2014)
Leba amatukio g’omugasho omu buhereza bwa Yesu okwo gabaireho n’engeli okwo gahonderaine.
^ Eisomo lya 31-33 lirafumora omu bwizizi ebikwete aha Bukama bwa Katonda.
