EISOMO LYA 17

Yesu Aina Ngeshoki?

ZANISA

Yesu Aina Ngeshoki?

Orwo tulikwega ebikwete aha byo Yesu yagambire n’okukora orwo yabaire ali omu nsi, nitwega engesho ezakubasa kutujuna kwilira hai ali wenene na ahali Ishe Yehova. Engesho ezilikushemera omuli ezo nizihai? Kandi nitubasa kurondora Yesu tutai omu mikalire yaitu?

1. Yesu nashanangana na Ishe omuli ngeliki?

Orwo yabaire ali omwiguru Yesu akareba Ishe ow’engonzi n’okwega kuruga ahali wenene omu mabilioni g’emyaka. Aha rwekyo, natekeleza, nayehulira, n’okukora nka Ishe. (Shoma Yohana 5:19.) Yesu nayolekya engesho za Ishe kabutekire niyonshonga akagamba ati: “Ayamboine yaboine Tata.” (Yohana 14:9) Orw’olikwega ekikwete aha ngesho za Yesu, kirakujuna omanye Yehova kurungi muno. Obulebero nibwobu, obuganyizi bwa Yesu kwolekera abantu nibwolekya okwo Yehova atwetaileho.

2. Yesu akolekya atai okwo alikugonza Yehova?

Yesu akagamba ati: “Kyonkai ninkora nk’okwo Tata andagiire, ensi emanye okwo ngonza Tata.” (Yohana 14:31) Orwo yabaire ali omu nsi, Yesu akolekya nk’okwo nagonza Ishe muno omu kumukunira norwo kyabaire nikiguma kukora atyo. Kandi, Yesu yagonzaga kufumora ebikwete ahali Ishe nokujuna abandi babe banywanyi abali katiga ahali Yehova.—Yohana 14:23.

3. Yesu akolekya atai okwo alikugonza abantu?

Ebibulia negamba nk’okwo Yesu ‘nagonza muno abantu.’ (Emigani 8:31, NWT) Akolekya nk’okwo nagonza abantu omu kubatamu omwoyo n’omukubajuna atainamu kakweyenda. Akakora emiujiza elikwolekya okwo aina amani n’okwo alikuganyizibwa abantu. (Mariko 1:40-42) Akakolera abantu omukisha ombutagira kigonzi. Ebigambo bya wenene bikamaramara n’okuha eshubi abantu bona abali bagorogoki ababaire nibamuhuliliza. Yesu akeihayo kuteseka n’okufa aha rw’enshonga akaba nagonza abantu bona. Kyonkai okushaaga, nagonza balinya abali kuhondera emyegesoye.—Shoma Yohana 15:13, 14.

MANYURUZA

Yega ekikwete angesho za Yesu. Kandi ohenjuze omanye okwo wakubasa kurondora engonzi n’ekishakye.

4. Yesu nagonza Ishe

Yesu akatuteraho obulebero okwo twakwolekya nk’okwo nitugonza Katonda. Shoma Luka 6:12 na Yohana 15:10; 17:26. Orwo muramara kufumoraho buli ihandiko, mufumoreho ekibazo eki:

Nitubasa kurondora Yesu tutai n’okwolekya nk’okwo nitugonza Yehova?

Yesu akagonza Ishe ow’omwiguru kandi akafumora nawe emirundi mingi kuraba omu nshara

5. Yesu nayetaho abantu bona abaina obwetage

Yesu akebembeza ametage g’abantu abandi. Norwo yabaire alemirwe akakozesa akanya n’amanige kujuna abantu. Shoma Mariko 6:30-44, mushube mufumoreho ebibazo ebi:

Omubaruro egi, Yesu akolekya atai okwo alikwetaho abandi?—Leba orujuru rwa 31, 34, 41, na 42.
Nikihai ekyainegeize Yesu kujuna abantu?—Leba orujuru rwa 34.
Aha rw’enshonga Yesu akolekya engesho za Yehova, ekyo nikikwegesaki ekikwete ahali Yehova?
Nobasa kurondora Yesu omuli ngeliki obase kwolekya nk’okwo noyetaho abantu abandi?

6. Yesu aina ekisha

Yesu akaba aina ekisha norwo yabaire ataina itunga, kityo akatutamu omwoyo tugire ekisha. Shoma Ebikorwa 20:35, mushube mufumoreho ekibazo eki:

Omu kuhonderana n’ebigambo ebyo ebya Yesu, nitubasa tutai kugira ebyera?

Yolekya EVIDEO, mushube mufumoreho ekibazo ekili kuhoderaho.

EVIDEO: “Okuha Nikuhaisa Omugisha Kushaaga Okuhabwa”—Ekichweka (4:00)

Nitubasa kuha omuli ngeliki, norwo turaba tutaina itunga?

Isi, nomanya?

Ebibulia netwegesa tushabe ahali Yehova kuraba omwibara lya Yesu. (Shoma Yohana 16:23, 24.) Orwo tulikushaba omu ngeli egyo, nitwolekya nk’okwo nitushobokerwa ekintu ekyo Yesu abase kutujuna kuba banywanyi ba Yehova.

ABANTU ABANDI NIBAGAMBA BATI: “Katonda talikutwetaho orwo tulikuteseka.”

Aha rw’enshonga Yesu akolekya engesho nk’eza Ishe, ebikorwabye nibyolekya bitai nk’okwo Yehova atwetaireho?

OMUBIGUFI

Yesu nagonza Yehova, na kandi nagonza abantu. Aha rw’enshonga Yesu nayolekya engesho za Ishe, orw’olikugendelera kumanya Yesu nikwo oragendelera kumanya Yehova.