EISOMO LYA 19

Isi, Abajulizi ba Yehova Bakirisito b’Amazima?

ZANISA

Ichwe Abajulizi ba Yehova nitwesiga nk’okwo tuli Bakirisito b’amazima. Isi, kubaki? Enjuza obone omusingi gw’ebintu ebyo tulikwesiga, eibara lyaitu elili kwalyo, n’engonzi ezotwinazo omuli ichwe.

1. Omusingi gw’omwesigo ogwa Abajulizi aba Yehova niguhai?

Yesu akagamba ati “ekigambo [kya Katonda] gaba mazima.” (Yohana 17:17) Nka Yesu, ebiro byona Abajulizi ba Yehova nibesiga ekigambo kya Katonda kuba nigwo musingi gw’omwesigo gwabo. Tekeleza ehisitoria ya Abajulizi ba Yehova. Anzindo y’ekarine ya 19, ekikundi kya abegesibwa b’Ebibulia kikabanza kuhenjuza kurungi Ebibulia. Ebintu ebyo babaire nibesiga bikaba nibyebemberwa ekigambo kya Katonda, norwo bya kwahuraine n’emyegeso eya amakanisa agandi. Kandi bakabanza kufumora na abandi ekikwete amazima ago ag’Ebibulia. *

2. Kubaki nitwetwa Abajulizi ba Yehova?

Yehova akagamba nk’okwo balinya abali kumwegashanizaho Bajulizibe aha rw’enshonga nibarangilira amakuru aga mukweteho. (Abaheburania 11:4–12:1) Obulebero nibwobu, omu kanya keirai Katonda akagambira abantube ati: “Inywe muli Bajulizi bange.” (Shoma Isaya 43:10, NWT) Yesu nayetwa “Omujulizi omwesigwa.” (Okushurulirwa 1:5) Kityo, kubandiza omwaka gwa 1931, tukaramura kwetwa bajulizi ba Yehova. Nitwebuga muno kwetwa omwibara elyo.

3. Abajulizi ba Yehova nibarondora batai engonzi za Yesu?

Yesu akaba nagonza muno abegesibwabe akaba nababona nk’ekaye. (Shoma Mariko 3:35.) Kwakwo, n’Abajulizi ba Yehova ka y’omu nsi yona eina obumoi. Niyo nshonga nitwetangana barumuna na banyanyanzi. (Filemoni 1, 2) Kandi nitukunira eiteka eli: “Mugonze baatahi banyu abalikwesiga.” (1 Petero 2:17) Abajulizi ba Yehova nibolekya engonzi omu ngeli etali emoi, obulebero nibwobu, nitweihayo kujuna barumuna baitu abo omu nsi yona orwo balikwetaga obujuni.

MANYURUZA

Yega omanye ebikwete ahisitoria y’Abajulizi aba Yehova, kandi obone ebili kwolekya nk’okwo ichwe tuli Bakirisito ab’amazima.

Omwesigo gwa Abakirisito b’amazima nigwebemberwa Ebibulia nabo nibegesa abandi ebintu ebyo balikwega

4. Ebibulia nigwo musingi gw’omwesigo gwaitu

Yehova akaranga nk’okwo amazima g’Ebibulia gakushuruirwe. Shoma Danieli 12:4 n’ebishoborozo ebili aha nsi, mushube mufumoreho ekibazo eki:

Abantu ba Katonda bakukweseki ebili “bingi” omu kugendelera kuhenjuza Ebibulia?

Enjuza omanye okwo ekikundi ky’abegesibwa b’Ebibulia, kutamu Charles Russell, okwo bayegire ekigambo kya Katonda. Yolekya EVIDEO, mushube mufumoreho ekibazo ekili kuhonderaho.

EVIDEO: Amazima g’Ebibulia Nigashulurwa Buhya (7:46)

Omu video egi, Charles Russell na abegesibwa batahibe ab’Ebibulia bakakozesa muhandaki kwega Ebibulia?

Isi, nomanya?

Omu kanya akandi, niturekebisha ebintu nanka ebyo tulikwesiga. Kubaki? Nk’okwo ebintu bizokage muno orwo eizoba lituruka n’okushamura, nikwo Katonda alikutushurulira ekigambokye mpora mpora. (Shoma Emigani 4:18.) Kityo, norwo Ebibulia etalikuhinduka, niturekebisha ebintu ebyo tuli kwesiga kwigana okwo tuli kugendelera kushobokerwa Ebibulia.

5. Nitutura omu kwigana n’eibara lyaitu

Kubaki twaronkire kwetwa Bajulizi ba Yehova? Yolekya EVIDEO, mushube mufumoreho ekibazo ekili kuhonderaho.

EVIDEO: Eibara Elilikutumanyisa (2:56)

Kubaki eibara Abajulizi ba Yehova niligasha?

Kubaki Yehova aronkire abantu babe bajulizibe? Aha rw’enshonga y’ebishuba bingi ebili kugambwa ebimukweteho, kityo nayetaga abantu bamumanyise okwo niwe Katonda ow’amazima. Tekeleza emyegeso ebili ey’ebishuba emu kweteho.

Edini ezindi nizegesa abahondezi bazo nk’okwo Katonda nayenda bakozese ebishushane omu mwegashanizo gwabo. Isi, omwegeso ogwo gw’amazima? Shoma Abalevita 26:1, mushube mufumoreho ebibazo ebi:

Isi, amazima nigahai? Yehova aina bitekelezoki ebikwete akukozesa ebishushane?

Abebembezi b’edini abandi nibegesa nk’okwo Yesu ni Katonda. Isi, omwegeso ogwo gw’amazima? Shoma Yohana 20:17, mushube mufumoreho ebibazo ebi:

Isi, amazima nigahai? Isi, Yesu na Katonda muntu omoi?
Iwe noyehulira otai orw’olikumanya nk’okwo Yehova nakozesa abajulizibe babase kurangilira amazima aga kweteho wenene n’omwanawe?

6. Nitugonzangana

Ebibulia negamba nk’okwo Abakirisito nibetagwa kujwangana nke engingo eza buli ngeli omubili gw’abantu. Shoma 1 Abakorinto 12:25, 26, mushube mufumoreho ebibazo ebi:

Abakirisito b’amazima nibetagwa kukoraki orwo Abakirisito batahi babo orwo bali kugwebwaho ebyemba?
Washobokerwa kintuki ekikwete aha ngonzi ezili omu Abajulizi ba Yehova?

Abajulizi ba Yehova orwo bali orwo bali kugwebwaho ebyemba omu kichweka kimoiho omu nsi, Abajulizi baatahi babo omu nsi yona nibakora omu bwangu bwangu babase kubajuna. Obase kubona obulebero bumoiho, Yolekya EVIDEO. Mushube mufumoreho ekibazo ekili kuhonderaho.

EVIDEO: Abatuzi ba Haiti Bakemera Ekimbunga Matayo (5:30)

Ekihika kya Abajulizi ba Yehova ekyokujuna nikyolekya kitai okwo bali kugozangana?

Abakirisito b’amazima nibolekya engonzi abantu abaina obwetage

ABANTU ABANDI NIBAGAMBA BATI: “Abajulizi ba Yehova dini eizire juba.”

Nimaki orwo Yehova yabandize kweta abali kumwegashanizaho Bajulizibe?

OMUBIGUFI

Abajulizi ba Yehova Bakirisito b’amazima. Ichwe tuli ka emoi eya bali kumwegashanizaho omu nsi yona. Omusingi gw’omwegashanizo gwaitu Bibulia kandi niturangilira amazima agakwete ahali Yehova.