EISOMO LYA 21
Okwo Amakuru Garungi Galikurangilirwa
Omu kanya akali haihi, Yehova naija kukozesa Obukamabwe kwiyaho ebyemba byaitu byona. Ago makuru garungi ago buli homoi alikwetaga kuhulira. Yesu akaragira abegesibwabe barangilire abantu amakuru ago! (Matayo 28:19, 20) Abajulizi ba Yehova nibakunira batai omuku ogwo ogwa Yesu?
1. Eihandiko lya Matayo 24:14 niligobeshelezibwa litai kany’aka?
Yesu akaranga ati: “Kandi evangeli egi ey’Obukama bw’omwiguru elirangilirwa omu nsi yona.” (Matayo 24:14) Abajulizi ba Yehova nibashemelerwa kukora omulimo ogwo oguli gw’omugasho. Niturangilira amakuru garungi omu nsi yona omu ndimi ezilikushaaga rukumi! Omulimo ogwo oguli gungi nigwetaga entekateka nyingi n’ekihika kingi. Titwina kukora mulimo ogwo tutaina bujuni bwa Yehova.
2. Nitukora tutai tubase kurangilira abantu?
Niturangilira buli antu mbali abantu balikuzoka. Nka Abakirisito b’ekarine ya mbere, niturangilira “buli nju.” (Ebikorwa 5:42) Omu kuraba omuhanda ogwo, niturangilira kabutekire amamilioni g’abantu buli mwaka. Aha rw’enshonga omu kanya akandi tikyangu kushanga abantu omu maju gabo, kityo niturangilira omu bichweka ebindi ebinamu abantu bangi. Ebiro byona nituhiga akashango ak’okugambira abantu ebintu ebikwete ahali Yehova n’omugendelerogwe.
3. Nibahai abaina omuruka ogw’okurangilira amakuru garungi?
Abakirisito bona ab’amazima nibetagwa kurangilira abantu amakuru garungi, kandi nitwetaho muno omuruka ogwo. Niturangilira omu kihika aha rw’okuba nitumanya nk’okwo oburora bw’abantu buli omu rushengo. (Shoma 1 Timoteo 4:16.) Titukulipwa mushahara orwo tulikukora omulimo ogu, aha rw’enshonga Ebibulia negamba eti: “Mukahabwa mutashashwire, nainywe muhe mutashashwize.” (Matayo 10:7, 8) Tibuli muntu alikwikiliza makuru gaitu. Kyonkai nitugendelera kurangilira aha rw’enshonga ekyo kichweka kimoiho omu mwegashanizo gwaitu, kandi nitushemeleza Yehova.
MANYURUZA
Yega omanye ekikwete aha kihika kya Abajulizi ba Yehova ekyo kurangilira omu nsi yona, kandi omanye okwo Yehova alikutujuna.
Kurangilira omu nsi yona: (A) Kosta Rika, (B) Marekani, (C) Benin, (D) Thailand, (E) Yap, (F) Sweden
4. Nitwekaza muno tubase kurangilira abantu bona
Abajulizi ba Yehova nibataho ekihika kingi muno babase kurangilira abantu amakuru garungi buli hantu. Yolekya EVIDEO, mushube mufumoreho ekibazo ekili kuhonderaho.
-
Nikihai ekili kukushemelera ekikwete aha kihika kya Abajulizi ba Yehova eky’okurangilira?
Shoma Matayo 22:39 n’Abaroma 10:13-15, mushube mufumoreho ebibazo ebi:
-
Omulimo gwaitu ogw’okurangilira nigwolekya gutai okwo tulikugonza batani baitu?
-
Yehova nayehulira atai aha kikwete alibalinya abali kurangilira amakuru garungi?—Leba orujuru rwa 15.
5. Ichwe nitukora emilimo twemire hamoi na Katonda
Ebintu bingi ebiboinwe nibyolekya nk’okwo Yehova nayebembera omulimo gwaitu. Obulebero nibwobu, omwihanga lya New Zealand, murumuna waitu alikwetwa Paul orwo yabire narangilira buli nju, omu bwamushana bumoi akatanganwa omukazi nanka. Omu kiro ekyo bwankya, omukazi ogwo akaba ashabire ahali Katonda omu kukozesa eibaralye Yehova, n’okumushaba atume omuntu ow’okumukyalira. Paul akagamba ati: “Omu masaa gashatu agahondeireho, nkatera hodi aha rwihigirwe.”
Shoma 1 Abakorinto 3:9, mushube mufumoreho ekibazo eki:
-
Ebintu ebiboinwe, nk’ekyo ekyabaireho New Zealand, nibyolekya bitai nk’okwo Yehova nayebembera omulimo gw’okurangilira?
Shoma Ebikorwa 1:8, mushube mufumoreho ekibazo eki:
-
Kubaki nitwetaga obujuni bwa Yehova tubase kugobesheleza obuhereza bwaitu?
Isi, nomanya?
Buli rukiiko orwo tulikukora omugati y’eilimansi, nitumanyizibwa okwo twakubasa kurangilira. Koraba orakikire orukiiko orwo, oina bitekelezoki ebikwete aha kumanyizibwa okwo?
6. Nitukunira omuku gwa Katonda ogw’okurangilira
Omu karine ya mbere, ababisha bakalengesa kutanga abegesibwa ba Yesu kurangilira. Abakirisito abakara bakatonganira ehaki yabo ey’okurangilira “omu kwolekya esheria ezikwete amakuru garungi.” (Abafilipi 1:7) Abajulizi ba Yehova kwakwo nibakora batyo kany’aka. *
Shoma Ebikorwa 5:27-42, mushube mufumoreho ekibazo eki:
-
Kubaki titwina kulekera kurangilira?—Leba orujuru rwa 29, 38, na 39.
RUNDI OMUNTU YAKUKUBAZA ATI: “Kubaki Abajulizi ba Yehova nibarangilira buli nju?”
-
Iwe wakuhorora otai ekibazo ekyo?
OMUBIGUFI
Yesu akaragira abegesibwabe barangilire amakuru garungi omu mahanga gona. Yehova najuna abantube kukora omulimo ogwo.
Isi ebi wakubihorora otai?
-
Omulimo ogw’okurangilira amakuru garungi nigukorwa gutai omu nsi yona?
-
Omulimo gwaitu ogw’okurangilira nigwolekya gutai okwo tulikugonza batani baitu?
-
Isi, notekeleza omulimo gw’okurangilira nigubasa kutuletera ebyera? Isi kubaki?
ENJUZA MUNO
Leba Abajulizi ba Yehova okwo balikurangilira abantu omu majiji agali gahango.
Okurangilira Okuli Hakwo okw’Omumbaga Omuji gwa Paris (5:11)
Abajulizi ba Yehova bajunire batai abakimbizi?
Uliliza ebaruro ya munyanyaichwe nanka ayashemeleirwe kukozesa emikalireye omu bukozi bw’akanya kona.
Yega omanye ekikwete aha mishango eyotusingire omu mahakama n’okwo kujunire kugendeleza omulimo ogw’okurangilira amakuru garungi.
^ Katonda niwe atuhaire omuku ogw’okurangilira. Kityo, Abajulizi ba Yehova tibalikwetaga juburo kuruga omu serikali z’abantu babase kurangilira amakuru garungi.
