EISOMO LYA 22

Nobasa Otai Kurangilira Abandi Amakuru Garungi?

ZANISA

Orwo olikwega amazima g’Ebibulia, rundi wakutekeleza oti, ‘Buli muntu nayetagwa kumanya amakuru aga!’ Ekyo nikwo, buli muntu nayetagwa kuhulira amakuru aga! Kyonkai rundi wakutina kugambira abandi ekikwete aha bintu eby’olikwega. Turafumoraho okwo wakubasa kusinga obutini obwo n’okwo wakubasa kubanza kushemelerwa kugambira abandi amakuru garungi ag’Ebibulia.

1. Wakubasa kugambira otai abantu ab’olikumanya ebintu eby’olikwega?

Abegesibwa ba Yesu bakagamba bati: “Ichwe titwakulekera kugamba byo twayeboneire n’ebyo twahuliire.” (Ebikorwa 4:20) Bakaba nibenda muno ebintu ebyo babaire nibega kugoba aha kwegomba kugambira abantu bangi okwo kilikubasikana ebintu ebyo. Isi, naiwe noyehulira otyo? Kakiraba kilikityo, higa akashango ak’okugambira abantu ab’eka yawe na banywanyi bawe omu makune ebintu eby’olikwega.—Shoma Abakolosai 4:6.

Okwo wakubasa kubanza

Orw’olikufumora n’abantu ab’eka yawe, bandisa efumoro y’Ebibulia omu kugamba oti: “Omwilimansi eli nyegire ekintu ekinshemeleire.”
Fumoraho eihandiko eliratamu omwoyo munywanyi wawe arwaire anga aina akahangahango.
Ow’olikukora nawe emilimo karakubaza nogendelera otai, mugambire ekintu eky’oyegire omu mwegeso gw’Ebibulia anga omu rukiiko rw’enteko.
Yoleka batahi bawe etovuti ya jw.org/hay.
Nyegeza abandi aha mwegeso gwawe ogw’Ebibulia, anga oboleke okwo bakubasa kushaba omwegeso gw’Ebibulia kuraba omu tovuti ya jw.org/hay.

2. Kubaki kintu ky’omugasho kweteraho omugendelero ogw’okurangilira oyemire amoi n’enteko?

Abegesibwa ba Yesu tibarangiliraga makuru garungi omu bantu abo babaire nibamanya bonkai Yesu akatuma “babili babili . . . buli kigo” babase kurangilira. (Luka 10:1) Obutaratibu obu obw’okurangilira bukaha abantu bangi muno akashango ak’okuhulira amakuru garungi. Kandi, abagesibwa bakagira ebyera bingi aha rw’okwema hamoi kurangilira. (Luka 10:17) Isi, iwe naiwe nobasa kweteraho omugendelero ogw’okurangilira oyemire hamoi n’enteko?

MANYURUZA

Enjuza omanye okwo wakubasa kusinga obutini n’okwo wakugira ebyera orw’olikurangilira amakuru garungi.

3. Yehova araba hamoi naiwe

Abegesibwa nanka ab’Ebibulia abalikwenda kubanza kurangilira, bakutina okwo abantu barababona, anga okwo baratora amakuru ago.

Isi, iwe notina kugambira abandi ebintu eby’olikwega? Isi kubaki?

Yolekya EVIDEO, mushube mufumoreho ekibazo ekili kuhonderaho.

EVIDEO: Nkashaba Yehova Ampe Obumanzi (4:05)

Abasigazi n’abaisiki abo bakasinga batai obutini bwabo?

Shoma Isaya 41:10, mushube mufumoreho ekibazo eki:

Koraba notina okurangilira enshara nebasa kukujuna etai?

Isi, nomanya?

Abajulizi ba Yehova bangi orwo babaire batakabandize kurangilira makuru garungi, bakaba nibatekeleza nk’okwo tibaina kubasa kukora mulimo ogwo nakati. Obulebero nibwobu, Sergey akaba nayehulira nk’okwo talikugasha kandi kikaba nikiguma omuli wenene kufumora n’abantu. Kyonkai orwo yabandize kwega Ebibulia akagamba ati: “N’orwo nabaire nintina, nkabanza kugambira abandi ebintu ebyo nabaire ninyega. Ekyanshobeize, orwo nafumoire n’abandi ebikwete aha Bibulia nkagira obumanzi bungi muno. Kandi, omwesigo gwange gukagumisibwa muno.”

4. Ogire amakune

Orwo olikugambira abandi ekikwete aha makuru garungi, tekeleza ekintu eky’oragamba n’okwo wakukigamba. Shoma 2 Timoteo 2:24 na 1 Petero 3:15, mushube mufumoreho ebibazo ebi:

Nobasa kukoza otai obuhanuzi obuli omu bihandiko ebi orw’olikufumora nabandi ebikwete aha Bibulia?
Rundi abantu abandi ab’eka yawe na banywanyi bawe tibaikilize bintu eby’olikubagambira. Nobasa kukoraki? Orayelinda kukoraki?
Kubaki kintu kirungi kukoza ebibazo omu bushobokerwa kushaaga kubakaka besige ebintu eby’olikubagambira?

5. Okurangilira amakuru garungi nikuleta ebyera

Yehova akaha Yesu omulimo ogw’okurangilira amakuru garungi. Yesu akaba nabona atai omulimo ogwo? Shoma Yohana 4:34, mushube mufumoreho ebibazo ebi:

Orwo tulikulya ekyakulya kirungi nitugendeleza oburora bwaitu kandi nitugira ebyera. Kubaki Yesu yaiganisize okulya ekyakulya n’okukora engonzi za Katonda, kutamu okurangilira amakuru garungi?
Notekeleza orashemelerwa bintuki orw’orarangilira amakuru garungi?

Amapendekezo

Omu kanya k’orukiiko rw’omugati y’eilimansi, uliliza okwo wakubasa kubandisa efumoro.
Fumora na mwalimu wawe ekikwete akwo wakwehandikisa, obase kuba mwegesibwa omurukiiko orulikukorwa omugati y’eilimansi. Emiruka ey’orahabwa omu rukiiko orwo erakujuna kubasa kugambira abantu abandi ebintu eby’olikwega.
Kozesa ekichweka ekya “Abantu Abandi Nibagamba Bati” anga “Rundi Omuntu Yakukubaza Ati” ebili omu masomo aga, obase kwemanyiza kuhorora empororo z’ebibazo eby’abantu balikubaza anga orw’olikugingizibwa.

RUNDI OMUNTU YAKUKUBAZA ATI: “Oina makuruki agahya?”