Orwo ekintu ekibi kilikubaho abantu nibebaza bati, “Kubaki ekintu eki kyabaho?” Nitushemelerwa muno kumanya nk’okwo Ebibulia nehorora kabutekire ekibazo ekyo!

1. Sitani akabandisa atai obubi omu nsi?

Sitani Ibilisi akashenga Katonda. Sitani akagonza kugelera ebitondwa ebindi, kityo akabeiya abantu ba mbere Adamu na Eva beme nawe omu bushengi obwo. Sitani akakora atyo orwo yabeire Eva. (Embandizo 3:1-5) Akamukora atekeleze nk’okwo Yehova akaba namwima ekintu nanka ekili kirungi. Akagamba nk’okwo abantu bakugizire ebyera bingi kabatakukunire Katonda. Sitani akagamba ebishubabye ebyambere omu kubeihya Eva nk’okwo talikwija kufa. Egyo niyonshonga Ebibulia neyeta Sitani kuba “aba w’ebishuba mara aba ishe wabona abagamba ebishuba.”​—Yohana 8:44.

2. Adamu na Eva bakaramura kukoraki?

Yehova akolekya Adamu na Eva ekisha kingi muno. Akabagambira nk’okwo nibabasa kulya ebiraba ebya buli muti omu busitani ya Edeni shana aha muti gumoi gwonkai. (Embandizo 2:15-17) Kyonkai, bakaramura kulya ebiraba eby’omuti ogwo yabatangire. Eva “abanza kutongora ekiraba kyagwo alya.” Ashuba ebindi atwalira iba “nawe alya.” (Embandizo 3:6) Bombili, tibahulilize Katonda. Aha rwokuba Adamu na Eva bakaba bahikilire, bakaba baina obushobora obw’obuhangwa (kiasili) obw’okukora ebirungi. Kyonkai omu kwanga kuhuliliza Katonda omu kyekundo, bakakora entambara n’okwanga obutwazibwe. Oburamuzi obwo bukatuletera amateso gangi.—Embandizo 3:16-19.

3. Oburamuzi bwa Adamu na Eva butuleteireki?

Orwo Adamu na Eva bamazire kukora entambara tibagendeleire kuhikilira, kityo batulira okutahikilira kwabo omuruzaro rwabo rwona. Ebibulia negamba eti ekikwete ahali Adamu: “Kityo nk’okwo bufu bwaizire omu nsi aha rw’okufakara kw’omuntu omoi, nikwo n’orufu rwakaranzire rukaba rw’abantu bona.”—Abaroma 5:12.

Aliyo enshonga zingi ezilikutukora kuteseka. Omu kanya akandi nituteseka aha rw’enshonga y’oburamuzi bubi obwo tukozire, anga aha rw’enshonga y’oburamuzi bubi obw’abantu abandi bakozire. N’omu kanya akandi nituteseka aha rw’eshonga y’okuba omu kichweka omu kanya akatali kugasha.​—Shoma Omwegesa 9:11.

 MANYURUZA

4. N’ohai alikukora abantu kabateseka?

Abantu bangi nibesiga nk’okwo Katonda niwe alikutwara ensi yona. Isi, ago nigo mazima? Yolekya EVIDEO.

Shoma Yakobo 1:13 na 1 Yohana 5:19, mushube mufumoreho ekibazo eki:

• Isi, Katonda niwe alikuleta ebibi n’obushasi?

5. Obutwazi bwa Sitani bulesire rushengoki?

1. Adamu na Eva bakaba bahikilire na kandi bakaba nibatura omu Paradiso. Kyonkai bakahuliliza Sitani bashenga Yehova

2.   Orwo Adamu na Eva bashengire, ensi ekaijura entambara, okuteseka, n’orufu

3. Yehova naija kumaraho entambara, okuteseka, n’orufu. Omu murundi ogundi, abantu barahikilira n’okutura omu Paradiso

6. N’orwo tulikuteseka Yehova atwetaileho

Isi, n’orwo tulikuteseka Katonda atwetaireho? Leba ebintu eby’Omukama Daudi n’entumwa Petero bahandikire. Shoma Ezaburi 31:7 na 1 Petero 5:7, mushube mufumoreho ekibazo eki:

• Iwe noyehulira otai orw’olikumanya okwo Yehova natubona n’okutwetaho orwo tulikuteseka?

 OMUBIGUFI

Sitani Ibilisi n’abantu babili abambere nibo balesire obubi omu nsi. Yehova natwetaho muno orwo tulikuteseka n’omu kanya akali haihi aramaraho obushasi.

Isi ebi wakubihorora otai?

• Nibishubaki ebyo Sitani yagambire Eva?

• Ichwe ichwena obushengi bwa Adamu na Eva butuleteireki?

• Nitumanya tutai nk’okwo Yehova natwetaho orwo tulikuteseka?