Isi, orafereirwe omuntu ow’olikwenda? Omu kanya ako akali kujunaza rundi wakwebaza oti: ‘Nikihai ekili kutubaho orwo tulikufa? Isi, omu kanya akali kwija turashuba kubona abagonzibwa baitu?’ Omwisomo eli n’elili kuhonderaho turahenjuza empororo ezili kumara mara ezili omu Bibulia.

1. Nikihai ekilikubaho orwo tulikufa?

Yesu akashananganisa orufu n’oturo tw’amani. Omuntu anagiire oturo tw’amani naba atalikumanya kantu kona kona. Kubaki orufu nirushananganisibwa n’oturo? Orw’omuntu alikumara kufa naba atakyehulira bushasi. Tabasa kwehulira bushuhya n’orwo yabaire nagonza muno banywanyibe n’abantu ab’ekaye. Ebibulia negamba nk’okwo “abafire tibakimanya.”​—Shoma Omwegesa 9:5.

2. Kubaki kintu ky’omugasho kumanya amazima agakwete aha rufu?

Abantu bangi nibatina orufu, kandi nibatina n’abantu abafire! Kyonkai ebintu eby’Ebibulia elikugamba ebikwete aha rufu nibibasa kukumara mara. Yesu akagamba ati: “Amazima ago garabaha obwegeleere.” (Yohana 8:32) Edini ezindi nizegesa nk’okwo omuntu kali kumara kufa omwoyogwe nigugendelera kurora, kyonkai Ebibulia telikwegesa etyo. Kityo, taliho muntu alikuteseka orwo ali kufa. Orw’okuba abafire tibalikumanya kantu kona kona, tibabasa kutushasa. Aha rw’ekyo, titulikwetaga kubahumuliza anga kubegashanizaho, nangu n’okubashabira chei.

Abantu abandi nibagamba nk’okwo baina obushobora bw’okufumora n’abantu abafire. Kyonkai ebyo bishuba bishai. Nk’okwo twayega, “abafire tibakimanya.” Balinya abali kutekeleza nk’okwo nibafumora n’abagonzibwa babo abafire, nikizoka nibafumora n’amasitani agali kwekora kuba bantu abafire. Kityo, katuli kumanya amazima agakwete aha rufu nigatulinda tutahabisibwa masitani. Yehova natutatira nk’okwo tutalengesa n’akati kufumora n’abantu abafire aha rw’enshonga namanya katurafumora n’amasitani nigaija kutwema kubi.​—Shoma Obwijukiro Bw’ebiragiro 18:10-12.

3. Yega amazima agakwete aha bantu abafire

Omu nsi yona, abantu nibesiga ebintu ebya buli ngeli ebikwete aha kintu ekili kubaho orwo tulikufa. Ombu tarengeshanyia, tikina kubasikana emyesigo egyo yona kuba y’amazima.

• Isi omu kichweka kyanyu abantu nibesigaki aha kikwete ehali y’abantu abafire?

 4. Kintu ky’omugasho kumanya amazima agakwete aha rufu

Orwo tulikumanya amazima agakwete aha rufu, nigatujuna tutatina bantu bafire. Shoma Omwegesa 9:10, mushube mufumoreho ekibazo eki:

• Isi, abantu abafire nibabasa kutukora kubi?

Korayega amazima agali omu Bibulia agakwete aha bantu abafire, toyesige bishuba ebya nk’okwo nitwetagwa kuhumuliza anga kwegashaniza aha abantu abafire. Shoma Isaya 8:19 n’Okushurulirwa 4:11, mushube mufumoreho ekibazo eki:

• Notekeleza Yehova nayehulira atai ekikwete amuntu alikwegashaniza anga kuhiga obujuni kuruga aha bantu abafire?

5. Nitumarwa marwa orwo tulikwega amazima agakwete aha rufu

Abantu bangi begesibwe nk’okwo kabarafa nibaija kuhabwa ekibonabonyo aha rw’enshonga y’entambara ezo bakozir’eirai. Kyonkai nitumarwa marwa orwo tulikumanya nk’okwo taliho muntu alikuteseka orwo alikufa, nangu n’omuntu ayakozire ebintu ebili bibi muno. Shoma Abaroma 6:7, mushube mufumoreho ekibazo eki:

• Nk’okwo twashoma omu Bibulia, omuntu orwo alikufa nachungurwa anga naganyirwa entambaraze. Isi iwe, notekeleza aliho omuntu ayafire alikugendelera kuteseka aha rw’eshonga y’amafu ago yakozire?

Orwo tulikugendelera kwega bingi ebikwete ahali Yehova, nikwo tulikugendelera kumanya nk’okwo tabasa nakati kutesa abantu abafire. Shoma Obwijukiro Bw’ebiragiro 32:4 na 1 Yohana 4:8, mushube mufumoreho ebibazo ebi:

• Isi, Katonda aina engesho ezili kugambwa omu bihandiko ebi, nabasa kutesa abantu abafire?

• Isi, amazima ago wamanya agakwete aha rufu gakumara mara? Isi kubaki?

 OMUBIGUFI

Omuntu orwo alikufa, oburorabwe nibuchweka. Abafire tibali kuteseka kandi tibabasa kukora kubi abantu abali kurora.

Isi ebi wakubihorora otai?

• Nikihai ekilikubaho orwo tulikufa?

• Kubaki kintu ekina omugasho kumanya amazima agakwete aha rufu?

• Kubaki okwega amazima agakwete aha rufu nikumara mara?