EISOMO LYA 37
Ekye Ebibulia Elikugamba Ekikwete Amahela n’Emilimo
Isi, oragizire akahangahango akakwete amahera anga emilimo? Rundi kyakuguma kuhiga ametage gaitu n’omu kanya ako konene konene kuha Yehova omwegashanizo ogusaine. Ebibulia netuha obuhanuzi obwakubasa kutugasha.
1. Ebibulia negambaki ekikwete aha milimo?
Katonda nayenda tushemelerwe emilimo. Ebibulia negamba eti: “Taliho kishemelera muntu kushaaga . . . Okushemelerwa eby’akakoleire.” (Omwegesa 2:24) Yehova mukozi w’emilimo aina ekihika. Orwo tulikumurondora omu kukora emilimo omu kihika, nitumushemeleza kandi nitusanirwa.
Okukora emilimo kintu ky’omugasho muno. Kyonkai tituli kwetagwa nakati kubona okukora emilimo kuba kw’omugasho muno kushaaga omwegashanizo gwaitu ahali Yehova. (Yohana 6:27) Yehova natushubiza nk’okwo katuramwebembeza, aratutekatekera ametage gaitu ag’omubili.
2. Ebibulia negambaki ekikwete aha mahela?
Ebibulia negamba eti ‘amahela gamara ebyemba,’ kandi netutatira eti amahela gonkai tigaina kuleta byera. (Omwegesa 7:12) Kyonkai netutamu omwoyo tutagonza mahela shana ‘tusanirwe nabilinya ebyo twinabyo.’ (Shoma Abaheburania 13:5.) Orwo tulikusanirwa nabilinya ebyo twinabyo, nitwelinda akahangahango akokuhigiliza ebintu. Turayelinda amabanja agatali kwetagwa. (Emigani 22:7) Kandi turayelinda akabi akalikuruga omukuzana kamari anga kukwatwa omutego ogw’okwenda eitunga ly’obwangu.
3. Nitubasa kukozesa tutai amahela gaitu kujuna abandi?
Yehova ni Katonda aina ekisha kandi nitumurondora orwo tulikugira “ekisha eky’okugabira banu.” (1 Timoteo 6:18) Nitubasa kukozesa amahela gaitu omu kisha omukugira emichango omu nteko n’okujuna abantu abandi orwo balikwetaga obujuni, kushaagaho abotuli kwegashaniza nabo. Yehova nashemelerwa omugendelero gwaitu ogw’okuha, na tikilinya ekyo tulikuha abandi. Orwo tulikuha abandi omukisha kuruga omu mwoyo, nitugira ebyera kandi nitukora Yehova ashemelerwe.—Shoma Ebikorwa 20:35.
MANYURUZA
Yega omanye okwo wakugira emilebere elikugasha ekwete aha milimo, n’okwo wakusanirwa.
4. Okunire Yehova kuraba omu mimanyilire yawe ey’okukora emilimo
Obunywanyi bwaitu ahali Yehova nibwetaga kutwinegeza kugira emilebere elikugasha ekwete aha milimo. Yolekya EVIDEO, mushube mufumore ebibazo ebili kuhonderaho.
-
Omu video egi, washemelerwaki ekikwete amilebere ya Jason n’ebikorwabye aha milimo?
-
Jason akakoraki abase kugira emilebere mirungi ekwete aha milimo?
Shoma Abakolosai 3:23, 24, mushube mufumoreho ekibazo eki:
-
Kubaki kintu ky’omugasho kugira emilebere elikugasha ekwete aha milimo?
Okukora emilimo kintu ky’omugasho. Kyonkai titulikwetagwa nakati kujubura milimo yaitu ebe y’omugasho kushaaga omwegashanizo gwaitu ahali Yehova
5. Orwo tulikusanirwa nitugoshoka
Abantu bangi nibakora kwona kwona okwo balikubasa kuhiga amahela gangi. Kyonkai Ebibulia netuha obuhanuzi obutali kushanangana n’obwo. Shoma 1 Timoteo 6:6-8, mushube mufumoreho ekibazo eki:
-
Ebibulia netutamu omwoyo tukoleki?
Nitubasa kugira ebyera n’orwo tulikuba twina ebintu ebili bike muno. Yolekya EVIDEO, mushube mufumoreho ebibazo ebili kuhonderaho.
-
N’orwo eka ezo zitaina mahela gangi, kubaki baina ebyera?
Kili kitai katuraba twina ebintu bingi kyonkai tukya yegomba kubona bingi ebishagireho? Yesu akachwa enfumo elikwolekya orushengo orw’okukora tutyo. Shoma Luka 12:15-21, mushube mufumoreho ekibazo eki:
-
Wayegaki kuruga aha nfumo ya Yesu?—Leba orujuru rwa 15.
Shoma kandi oiganise Emigani 10:22 na 1 Timoteo 6:10. Mushube mufumoreho ebibazo ebi:
-
Notekeleza nikintuki ekili ky’omugasho muno? Kuba munywanyi wa Yehova anga kugira amahela gangi muno? Isi kubaki?
-
Okuhiga amahela kushagulirana kwakutuletera byembaki?
6. Yehova natutekatekera ametage gaitu
Orwo kilikuguma kukwasa emilimo anga amahela, omu mazima nitubona akashango kokwolekya nk’okwo nitwesiga Yehova. Yolekya EVIDEO obone okwo twakubasa kwemera ebyemba ebikwete aha mahela, mushube mufumoreho ebibazo ebili kuhonderaho.
-
Omu video egi, murumuna waitu akemera changamotoki?
-
Akakoraki abase kwemera echangamoto ezo?
Shoma Matayo 6:25-34, mushube mufumoreho ekibazo eki:
-
Yehova nashubizaki balinya abali kumwebembeza?
ABANTU ABANDI NIBAGAMBA BATI: “Kisaine nkole emilimo omu kihika mbase kutekatekera eka yange ametage. Kityo tinakubasa kugya ankiiko buli wiki.”
-
Ni ihandikoki elili kukwolekya nk’okwo okwebembeza omwegashanizo gwawe ahali Yehova nibwo buramuzi obuli burungi muno?
OMUBUGUFI
Nitwetaga emilimo n’amahela, kyonkai ebintu ebyo bitatutanga nakati kukolera Yehova.
Isi ebi wakubihorora otai?
-
Nikihai ekyakubasa kukujuna kugira emilebere mirungi ekwete aha milimo?
-
Okusanirwa nikubasa kukugoshora kutai?
-
Nobasa kwolekya otai okwo olikwesiga endagano ya Yehova ey’okutekatekera abantube ametage?
ENJUZA MUNO
Enjuza omanye nk’Ebibulia neyegesa nk’okwo okugira amahela kintu kibi anga chei.
“Isi, Amahela Niyo Ntabuko y’Ebibi Byona?” (Emakala eli omutandao)
Yega omanye okwo twakubasa kukozesa amahela gaitu omu ngeli elikushemelera Katonda.
“Ebibulia Negambaki Ekikwete Akuha Banu?” (Emakala eli omutandao)
Isi, okuzana kamari kwinamu akabi kona kona?
“Ebitekelezo by’Ebibulia—Okuzana Kamari” (Amkeni!, Omwezi gwa Kashatu 2015)
Leba ekintu ekyainegeize omuntu ayabaire ali mushuma mara muzani wa kamari kuhindura emikalireye
“Nkaba Ninyenda Muno Amashindano g’Efarasi” (Mnara wa Mlinzi, Omwezi gwa Ikumi na gumoi 1, 2011)
