EISOMO LYA 38
Okunire Egabo y’Oburora
Nitubasa kushemelerwa kukora ebintu bingi aha rw’enshonga niturora. N’orwo tulikwemera ebyemba, kyonkai akyaliho ebintu ebyo twakubasa kushemelerwa omu mikalire. Nitubasa kwolekya tutai Yehova okwo tulikukunira egabo y’oburora? Ninshongaki eli y’omugasho muno elikutwinegeza kukora tutyo?
1. Kubaki nitwetagwa kukunira oburora?
Nitwetagwa kukunira oburora aha rw’okuba gabo nungi kuruga ahali isheichwe aina engonzi, Yehova. Aha rw’okuba wenene “niwe aba nchuro y’oburora,” yaani, niwe yatonzire buli kintu ekili kurora. (Ezaburi 36:9) “Kuba wenene niwe aha abantu oburora na buli kantu.” (Ebikorwa 17:25, 28) Yehova natuha ebintu ebyo tulikwetaga tubase kugedelera kurora. Ekishaagireho ekyo, ayekomeleize nk’okwo nitubasa kushemelerwa emikalire.—Shoma Ebikorwa 14:17.
2. Nitubasa kwolekya tutai Yehova okwo tulikukunira egabo y’oburora?
Kwema orwo wabaire oli omu rubunda otakazairwe, Yehova akakwemamu. Omu Bibulia, Daudi omukozi wa Yehova akashaba ati: “Okambona kwema nkyalinda.” (Ezaburi 139:16, NWT) Oburora bwawe bwina eiguzi lihango muno omu maisho ga Yehova. (Shoma Matayo 10:29-31.) Yehova najunara muno orwo alikubona omuntu naita mutahiwe agendeleire, anga orwo alikweita. * (Okuruga 20:13) Kandi Yehova najunara orwo alikubona nituta oburora bwaitu omurushengo tutaina nshonga ya mugasho anga katulikuburwa kwegendesheleza kulinda oburora bw’abandi. Orwo tulikulinda oburora bwaitu n’okukunira oburora bw’abandi, nitwolekya okwo tulikukunira egabo y’oburora.
MANYURUZA
Yega omanye ebintu nanka ebyo wakukora obase kwolekya okwo olikukunira egabo y’oburora.
3. Ikazage omubili gwawe
Abakirisito abehongeire Katonda nibakozesa emikalire yabo yona kukolera Yehova. Nibahayo emibili yabo ebe kitambo ahali Katonda. Shoma Abaroma 12:1, 2, mushube mufumoreho ebibazo ebi:
-
Nikihai ekili kwetaga kukwinegeza oikazege omubili gwawe?
-
Nobasa kukora otyo omuli ngeliki?
4. Oyegendesheleze obase kulinda abandi batahutara anga kufa
Ebibulia netutamu omwoyo twelinde kukora ebintu ebyakubasa kuturetera orushengo. Yolekya EVIDEO obase kwega ebintu ebirakujuna kwegendesheleza.
Shoma Emigani 22:3, mushube mufumoreho okwo wakubasa kwelinda n’okwo wakulinda abandi . . .
-
orw’oli omu ka.
-
orw’oli aha milimo.
-
orw’oli kuzana emizano.
-
orw’olikubuga anga orw’olikuba okubire ekyombo ky’obusafiri.
5. Noyetagwa kukunira oburora obw’omwana atakazairwe
Daudi akashoborora okwo Yehova alikushemelerwa okukura kw’omwana akyali omurubunda rwa nyina. Shoma Ezaburi 139:13-17, mushube mufumoreho ekibazo eki:
-
Omu kuhonderana n’ebitekelezo bya Yehova, isi, oburora bw’omuntu nibubanza orwo enda elikutwekwa anga orw’omwana alikuzarwa?
Amateka ago Yehova yahaire Abaisiraeli abakarai gakaba nigalinda nyina n’omwana atakazairwe. Shoma Okuruga 21:22, 23, mushube mufumoreho ebibazo ebi:
-
Yehova akaba nabona atai omuntu ayakwisire omwana atakazairwe?
-
Yehova nayehulira atai orw’omuntu alikukora ekintu ekyo akigendeleire? *
-
Iwe nobon’otai ebitekelezo bya Katonda ebikwete aha kintu ekyo?
Nangu n’omukazi alikukunira oburora rundi yakwehulira nk’okwo aliho ehali ezakumukora kwihamu enda. Shoma Isaya 41:10, mushube mufumoreho ebibazo ebi:
-
K’omukazi araba nayemera ehali ezakumukora kwihamu enda nayetaga kuhiga obujuni ali ohai? Isi kubaki?
ABANTU ABANDI NIBAGAMBA BATI: “Omukazi aina ehaki y’okwihamu enda arwenshonga mubiligwe.”
-
Nikihai ekili kukwolekya nk’okwo Yehova nayetaho oburora bwa nyina n’omwana atakazairwe?
OMUBIGUFI
Ebibulia netwegesa nk’okwo nitwetagwa kwenda, kukunira, n’okulinda egabo y’oburora eyo Yehova atuhaire. Ekyo kikweteho oburora bwaitu n’obw’abantu abandi.
Isi ebi wakubihorora otai?
-
Kubaki oburora bw’omuntu bwina eiguzi lingi muno omu maisho ga Yehova?
-
Yehova nayehulira atai orw’omuntu alikwita mutahiwe agendeleire?
-
Nikihai eky’olikusiima ekikwete agabo y’oburora?
ENJUZA MUNO
Nitubasa kusiima Yehova tutai aha rw’okutuha egabo y’oburora?
Leba empororo ey’ekibazo eki, Isi, Katonda nabasa kuganyira omukazi arailemu enda?
“Ebibulia Negambaki Ekikwete Okwihamu Enda?” (Emakala eli omutandao)
Yega ebitekelezo bya Katonda ebikwete aha burora okwo bili kwetagwa kutuhabura orwo tulikuronda emizano.
“‘Emizano Eli Mibi’—Isi, Noyetaga Kweteka Omurushengo?” (Amkeni!, Omwezi gwa Ikumi 8, 2000)
Kili kitai omuntu karaba natekeleza kweita? Leba okwo Ebibulia yakubasa kumujuna.
“Ninyenda Kufa—Isi, Ebibulia Nebasa Kunjuna Kandaba Nitekeleza Kweita?” (Emakala eli omutandao)
^ Yehova nayetaho muno abantu abahendekire omwoyo. (Ezaburi 34:18) Nashobokerwage ebitekelezo ebili kukora abantu nanka bagonze kweita, kityo nagonza kubajuna. Kugya kumanya okwo alikujuna abantu kusinga ebitekelezo ebyo, shoma emakala “Ninyenda Kufa—Isi, Ebibulia Nebasa Kunjuna Kandaba Nintekeleza Kweita?” eli omukichweka ekya Enjuza Muno omwisomo eli.
^ Balinya abarairemu enda tibalikwetaga kwebona baina mushango, Yehova nabasa kubaganyira. Obase kubona amakuru agashagireho, shoma emakala “Ebibulia Negambaki aha Kikwete Okwihamu Enda?” eli omu kichweka ekya Enjuza Muno omwisomo eli.
