Tekeleza nyina mwana alikutekateka omwanawe omuto kugya aha shule. Nayekomeleza nka yayoga anga emyendoye nk’elimirungi. Okukora atyo nikujuna omwanawe agire obubili burungi na abantu abandi nibabona okwo abazairebe bali kumwikazage. Kwakwo, isheichwe aina engonzi Yehova, nayenda tulengye emibili yaitu n’ebikorwa byaitu. Orwo tulikwelengya, nitugoshoka n’okumuletera ekitinwa.

1. Nitubasa tutai kulengya emibili yaitu?

Yehova natugambira ati: “Mube batakatifu.” (1 Petero 1:16) Okuba batakatifu ekyo kikweteho okulengya emibili yaitu n’ebikorwa byaitu. Nitubasa kulengya emibili yaitu omu kugira emimanyilire y’okwoga, okufura emyendo, n’okwikazage enju zaitu n’emotoka zaitu. Kandi, nitubasa kujuna kulengya enju yaitu ey’Obukama. Orwo tulikugendelera kulengya emibili yaitu nituretera Yehova ekitinwa.​—2 Abakorinto 6:3, 4.

2. Tubase kuba batakatifu nitwetagwa kulekera mimanyilireki?

Ebibulia netugambira eti “tweyogye buli kahagare ak’omubili n’omwoyo.” (2 Abakorinto 7:1, NWT) Kityo, nitwekaza kwetanga ekintu kyona kyona ekyakubasa kuhagaza omubili n’amagezi gaitu. Ebitekelezo byaitu nibyetagwa kushemelera Yehova, kityo nitwekaza kwetanga ebitekelezo ebitalikugasha. (Ezaburi 104:34) Kandi, nitwekaza kwetanga okugamba kubi.​—Shoma Abakolosai 3:8.

Nikihai ekindi ekyakubasa kuhagaza omubili n’ebikorwa byaitu? Aliho ebintu ebyakubasa kuhagaza omubili gwaitu. Kityo, nitwetanga kunywa esigara, kunywa etaba, kulya obugoro, kulya emirungi n’emiraa, n’okunywa madawa ya kulevya. Orwo tulikwetanga ebintu ebyo, nitugira obubili burungi, kandi nitwolekya okwo tulikukunira egabo y’oburora. Mara nitwekaza kugira emyegendesheleze mirungi, omu kwelinda emimanyilire mibi nk’okutera epunyeto n’okuleba eponogorafia. (Ezaburi 119:37; Abaefeso 5:5) Nikibasa kuguma kusinga emimanyilire egyo, kyonkai Yehova nabasa kutujuna kugisinga.​—Shoma Isaya 41:13.

 MANYURUZA

3. Katulikulengya emibili yaitu nituhaisiliza Yehova

Nitubasa kushobokerwa ebitekelezo bya Yehova ebikwete aha kwelengya omu kuhenjuza emihango eyo yahaire Abaisiraeli abakara. Shoma Okuruga 19:10 n’ogwa 30:17-19, mushube mufumoreho ebibazo ebi:

• Omu kuhonderana n’enjuru ezi, Yehova aina bitekelezoki ebikwete aha kulengya emibili yaitu?

• Ni mimanyilireki eratujuna kugendelera kulengya emibili yaitu?

Nitwetaga akanya n’amani tubase kugendelera kulengya emibili yaitu. Kandi, nitubasa kugendelera kulengya hona hona mbali tulikutura tube tulibanaku anga tuli batungi. Yolekya EVIDEO, mushube mufumoreho ekibazo ekili kuhonderaho.

• Abantu abo tulikurangilira nibabasa batai kukunira Yehova katuraba nitukozesa ebikwato ebilengize n’ebikazibwege?

4. Singa emimanyilire eli mibi

Koraba oli muraibu w’okunywa esigara anga madawa ya kulevya, rundi noshobokerwage okwo kilikuguma kusinga emimanyilire egyo. Nikihai ekyakubasa kukujuna? Tekeleza ebibi ebya kubasa kukugwaho aha rw’enshonga y’emimanyilire egyo. Shoma Matayo 22:37-39, mushube mufumoreho okw’okunywa esigara anga madawa ya kulevya okwo kwakwita . . .

• obunywanyibwe ahali Yehova.

• ekaye n’abantu abamwataine.

Twara ehatua ezirakujuna kusinga emimanyilire mibi. * Yolekya EVIDEO.

Shoma Abafilipi 4:13, mushube mufumoreho ekibazo eki:

• Okugira emimanyilire mirungi ey’okushaba, okwega Ebibulia, n’okukika enkiiko nikubasa kujuna kutai omuntu agire amani ag’okusinga emimanyilire mibi?

 5. Yekaze kusinga ebitekelezo n’emimanyilire mibi

Shoma Abakolosai 3:5, mushube mufumoreho ebibazo ebi:

• Nitumanya tutai nk’okwo kuleba eponogorafia, kutuma amakuru anga epicha z’engono, n’okutera epunyeto mimanyilire elimibi muno omu maisho ga Yehova?

• Isi, nikibasikana kuhondera amateka ga Yehova agakwete okugira emyegendesheleze mirungi? Isi kubaki?

Yega omanye okwo wakubasa kusinga ebitekelezo bibi. Yolekya EVIDEO.

Yesu akachwa enfumo elikwolekya okwo tulikwetaga kugendelera kutamu amani tubase kugira emyegendesheleze eli mirungi. Shoma Matayo 5:29, 30, mushube mufumoreho ekibazo eki:

• N’orwo Yesu yabaire atalikumanyisa nk’okwo nitwetaga kuhutaza omubili gwaitu, akolekya okwo tulikwetagwa kukora ebintu nanka. Omuntu nayetagwa kukoraki abase kwetanga ebitekelezo bibi? *

Koraba norashana obase kusinga ebitekelezo bibi, Yehova nabona ekihika kyawe. Shoma Ezaburi 103:13, 14, mushube mufumoreho ekibazo eki:

• Koraba norashana kulekera emimanyilire mibi, eihandiko eli nilibasa kukujuna litai ogendelere kurashana?

 OMUBIGUFI

Nitushemeleza Yehova orwo tulikugendelera kulengya emibili yaitu, ebitekelezo, n’ebikorwa.

Isi ebi wakubihorora otai?

• Kubaki kintu ky’omugasho kugendelera kuba batakatifu?

• Nobasa kugendelera otai kulengya omubili gwawe?

• Nobasa otai kugendelera kulengya ebitekelezo, n’ebikorwa byawe?