Yesu akegesa abegesibwabe nk’okwo tibalikwetagwa “kuba ba nsi.” (Yohana 15:19) Ekyo kitweteho okutaunga mukono orubaju rwona rwona omu ndashana n’omu siasa ze nsi. Amazima ni nk’okwo tikyangu ebiro byona kutaunga mukono orubaju rwona rwona. Rundi abantu bakutugingiza aha rw’enshonga y’omusimamo gwaitu. Nitubasa tutai kwelinda kuunga omukono orubaju rwona rwona n’okugendelera kuba mahika ahali Katonda waitu Yehova?

1. Abakirisito b’amazima baina bitekelezoki ebikwete aserikali z’abantu?

Abakirisito nibakunira serikali. Nibaikiliza ebigambo ebi ebya Yesu: “Ebya Kaisari mubihe Kaisari.” Ekyo nikimanyisa nk’okwo nitukunira amateka g’eihanga, nk’okulipa ekodi. (Mariko 12:17) Ebibulia neyegesa nk’okwo eserikali z’abantu nizitwara aha rw’enshonga Yehova niwe ajubwire kazibaho. (Abaroma 13:1) Kityo nitushobokerwa nk’okwo eserikali z’abantu, zina obushobora buke kandi obwina emipaka. Nitwesiga nk’okwo Katonda arakozesa Obukamabwe obw’omwiguru kwiyaho amashasi g’abantu.

2. Nitubasa kwolekya tutai okwo titulikuunga mukono rubaju rwona rwona?

Nka Yesu, ichwe titulikwetaya musiasa. Abantu orwo baboine omuujiza gumoi ogwa Yesu, bakenda kumukora kaba mukama wabo omu nsi, kyonkai akanga. (Yohana 6:15) Kubaki yayangire? Aha rw’enshonga akanya akahondeireho akagamba ati: “Obukama bwange ti bwa nsi egi.” (Yohana 18:36) Aha rw’okuba tuli begesibwa ba Yesu, nitwolekya omu mihanda eya buli ngeli okwo tutalikuunga mukono rubaju rwona rwona. Obulebero nibwobu, titulikwetaya mundashana. (Shoma Mika 4:3.) Nitukunira enembo za mahanga nk’ebendera, kyonkai tituli kuzifukamira. (1 Yohana 5:21) Kandi titulikuunga mukono anga kwanga alikwenda kuba mtwazi kuruga omu kyama kyona kyona eky’esiasa. Omu kukora tutyo, nitwolekya okwo ichwe tuli mahika aha serikali ya Katonda, yaani, Obukamabwe.

 MANYURUZA

3. Abakirisito b’amazima tibalikuunga mukono rubaju rwona rwona

Yesu n’abegesibwabe bakatuteraho obulebero. Shoma Abaroma 13:1, 5-7 na 1 Petero 2:13, 14. Kandi, yolekya EVIDEO n’okufumoraho ebibazo ebili kuhonderaho.

• Kubaki nitwetagwa kukunira eserikali z’abantu?

• Nitubasa kwolekya tutai nk’okwo nitukunira eserikali ezo?

Omu kanya k’endashana, rundi amahanga nanka gakugamba gati tigalikuunga mukono rubaju rwona rwona, kyonkai nigajuna embaju zona ezili omundwano. Okutaunga mukono rubaju rwona rwona nikumanyisaki? Shoma Yohana 17:16. Kandi, yolekya EVIDEO n’okufumoraho ebibazo ebili kuhonderaho.

• Okutaunga mukono rubaju rwona rwona ekyo nikimanyisaki?

Nitwetaga kukoraki k’eserikali z’abantu ziraturagira kukora ekintu ekitali kugendanwa n’amateka ga Katonda? Shoma Ebikorwa 5:28, 29. Kandi, yolekya EVIDEO n’okufumoraho ebibazo ebili kuhonderaho.

• Orwo amateka g’abantu galikwahurana n’amateka ga Katonda, nitwetagwa kuhondera amateka g’ohai?

• Notekeleza nihaliki ezakukora Abakirisito batakunira serikali z’abantu?

 4. Yolekya nk’okwo tolikuunga mukono rubaju rwona rwona omu bitekelezo n’omu bikorwa byawe

Shoma 1 Yohana 5:21. Kandi, yolekya EVIDEO n’okufumoraho ebibazo ebili kuhonderaho.

• Omu video egi, kubaki Ayenge yayangire kwetaya omu kyama ky’esiasa anga omu sherehe z’ekitaifa, nk’okutera esaluti omu maisho g’ebendera?

• Isi, notekeleza akakora oburamuzi burungi?

Nibintuki ebindi ebyakubasa kulengesa omusimamo gwaitu ogw’okutaunga mukono rubaju rwona rwona? Yolekya EVIDEO, mushube mufumoreho ebibazo ebili kuhonderaho.

• Nitubasa kwolekya tutai nk’okwo titulikuunga mukono rubaju rwona rwona orwo alikubaho amashindano g’emizano kuruga omu mahanga aga buli ngeli?

• Nitubasa tutai kugendelera kutaunga mukono rubaju rwona rwona, n’orwo oburamuzi bw’omwana siasa buraba nibutugoshora anga kutushasa?

• Omu simamo gwaitu ogw’okutaunga mukono rubaju rwona rwona, gwakubasa kuyugisibwa gutai n’amakuru ago tulikuhulira kuruga omu byombo by’ehabari anga omu bantu abo tulikwema nabo?

 OMUBIGUFI

Abakirisito nibekaza muno kutaunga rubaju rwona rwona orw’esiasa omu bitekelezo, omu migambire, n’ombikorwa byabo.

Isi ebi wakubihorora otai?

• Nitwetaga kugira bitekelezoki ebikwete aha serikali z’abantu?

• Kubaki tutalikuunga mukono rubaju rwona rwona orw’esiasa?

• Nibintuki ebya kukukora ogumirwe kutaunga mukono rubaju rwona rwona?