EISOMO LYA 46
Kubaki Noyetagwa Kwehongera Yehova N’okubatizibwa?
Nitwehongera Yehova orwo tulikuragana kuraba omu nshara nk’okwo turayegashaniza ahali wenene wenkai n’okwebembeza engonzize omu mikalire yaitu. (Ezaburi 40:8) Ekintu ekili kuhonderaho nikubatizibwa. Orwo tulikubatizibwa, nitwolekya abandi nk’okwo twehongeire Katonda. Oburamuzi obw’okwehongera Yehova nibwo buramuzi obuli bw’omugasho muno omu mikalire yaitu. Nikihai ekirakwinegeza okole oburamuzi obwo obuli bw’omugasho muno omu mikalire yawe?
1. Nikihai ekilikwinegeza omuntu ayehongere Yehova?
Engonzi nizo zilikutwinegeza twehongere Yehova. (1 Yohana 4:10, 19) Ebibulia netukomeleza eti: “[Mugonzega] Omukama Ruhanga wawe n’omutima gwawe gwona n’amagezi gawe gona n’amani gawe gona.” (Mariko 12:30) Nitwolekya nk’okwo nitugonza Katonda timubigambo bushai, shana n’omu bikorwa byaitu. Nk’okwo kili aha mushaija n’omukazi abalikwendangana muno abali kuramura kushumika obushwere, nikwo n’okugonza Yehova kulikutwinegeza kumwehongera n’okubatizibwa.
2. Nimigishaki eyo Yehova alikuha Abajulizibe ababatizibwe?
Orw’olikubatizibwa, noyema hamoi n’eka ya Yehova eina ebyera. Kityo orayebonera engonzize omu mihanda mingi muno, kandi oragendelera kumwilira hai muno. (Shoma Malaki 3:16-18.) Yehova araba nka Sho, okushagaho oragira eka ya barumuna baitu na banyanyachwe ab’omu nsi yona abalikugonza Yehova nabali kukugonza. (Shoma Mariko 10:29, 30.) Ombutalengeshanyia, osaine kukora ebintu nanka otakabatizibwe. Noyetagwa kwega ebikwete ahali Yehova, okumugonza, n’okugira omwesigo aha mwanawe. Aha nzindo, kisaine oyehongere Yehova. Orwo orakora ebintu ebyo n’okubatizibwa, oraba obandize kutambukira omu mbarabara elikugya omu burora obutaliwaho. Ekigambo kya Katonda nikigamba kiti: “Okubatiza . . . nikubarokora.”—1 Petero 3:21.
MANYURUZA
Yega omanye kubaki kili kintu ky’omugasho omuli iwe kwehongera Yehova n’okubatizibwa.
3. Ichwe ichwena nitwetaga kuronkaho owo turakolera
Omwihanga lya Israeli elya karai, abantu abandi bakaba nibatekeleza nk’okwo bakwegashaniza ahali Yehova n’omu kanya ako kone kone kwegashaniza ahali katonda w’ebishuba Baali. Kyonkai Yehova akatuma omu rangiwe Eliya ahindure ebitekelezo byabo ebitali bya mazima. Shoma 1 Abakama 18:21, mushube mufumoreho ekibazo eki:
-
Abaisiraeli bakaba nibetagwa kukora buramuziki?
Nka Abaisiraeli, ichwe ichwena nitwetagwa kuronka olinya owo turakolera. Shoma Luka 16:13, mushube mufumoreho ebibazo ebi:
-
Kubaki titulikwetaga kwegashaniza ahali Yehova n’omu kanya ako konene konene kwegashaniza aha muntu anga akintu ekindi?
-
Nitwolekya tutai Yehova nk’okwo turonkire kwegashaniza ahali wenene?
4. Yekonje engonzi ezo Yehova akwolekize
Yehova atuhaire ebigemuro bingi ebina eiguzi. Isi nitubasa kumuhaki? Yolekya EVIDEO.
Yehova ayolekize atai okwo alikukugonza? Shoma Ezaburi 104:14, 15 na 1 Yohana 4:9, 10, mushube mufumoreho ebibazo ebi
-
Nibigemuroki kuruga ahali Yehova ebili kukwinegeza kumusiima?
-
Ebigemuro ebyo nibikukora oyehulire otai ekikwete ahali Yehova?
Katulikuhabwa ekigemuro ekyo tulikwenda, nitwolekya esiimi olinya ayatuha ekigemuro ekyo. Shoma Obwijukiro Bw’ebiragiro 16:17, mushube mufumoreho ekibazo eki:
-
Orw’olikutekeleza ebintu byona ebyo Yehova akukoleire, ekyo nikikwinegeza okoleki?
5. Okwehongera Katonda nikuleta emigisha mingi
Abantu bangi muno nibesiga nk’okwo okugira eiranga, emilimo mirungi, anga okugira eitunga nikubasa kubakora bagire ebyera. Isi, ago mazima? Yolekya EVIDEO, mushube mufumoreho ebibazo ebili kuhonderaho.
-
N’orwo omuzani ogu ali omu video egi yabaire nayenda omupira, kubaki yalekeire kuguzana?
-
Akaramura kwehongera Yehova tikuzana mupira. Isi, notekeleza akakora oburamuzi burungi? Kubaki?
Entumwa Paulo orwo yabaire atakabaire Mukirisito, akaba aina emilimo mirungi muno. Akaba ashomeire esheria y’Abayahudi n’omwalimuwe akaba aina eiranga. Kyonkai akalekera ebintu ebyo byona abase kuba Mukirisito. Isi, Paulo akechuza aha rw’oburamuzi obwo yakozire? Shoma Abafilipi 3:8, mushube mufumoreho ebibazo ebi:
-
Kubaki Paulo yagambire nk’okwo ebintu ebyo yakozire atakabaire Mukirisito bikaba bili “nk’omwejuno”?
-
Akabona migishaki omu kukora oburamuzi obwo?
-
Notekeleza nikihai ekirakukora ogire emikalire eli mirungi, isi, nikukolera Yehova anga kwehigira eiranga omu mikalire yawe?
Entumwa Paulo orwo yamazire kuba Mukirisito, akabona amagoba gangi kushaaga ebintu ebyo yalekire
ABANTU ABANDI NIBAGAMBA BATI: “Olye ensi, okukolera Katonda tikwina magoba.”
-
Kubaki notekeleza kintu ky’omugasho kwehongera Yehova?
OMUBIGUFI
Okugonza Yehova nikutwinegeza kumwehogera n’okubatizibwa.
Isi ebi wakubihorora otai?
-
Kubaki nitwetagwa kugonza Yehova omu mwoyo gwaitu gwona n’okwegashaniza ahali wenene wenkai?
-
Nimigishaki eyo Yehova alikuha Abajulizibe ababatizibwe?
-
Isi, iwe noyenda kwehongera Yehova?
ENJUZA MUNO
Leba enshonga eyakozire omwana muziki n’omuzani w’emizano baramure kwehongera Yehova.
Abasigazi n’Abaisiki Nibabaza Bati—Ndakozesa Ntai Emikalire Yange?—Kwijuka Ebirabireho (6:52)
Enjuza omanye enshonga ezishagireho ez’okwehongera Katonda.
“Kubaki Oyehongere Yehova?” (Mnara wa Mlinzi, Omwezi gwa Mbere 15, 2010)
Omu video egi ey’omuziki, leba obene ebyera ebyo balikubona balinya abehongeire Yehova.
Omu baruro elikugamba eti “Omu myaka mingi nkebaza nti, ‘Kubaki Tuli Barora?’”leba omanye ekyainegeize omukazi nanka ahenjuze ebintu ebyo yabaire nayebembeza omu mikalireye.
“Ebibulia Nehindura Emikalire” (Mnara wa Mlinzi, Omwezi gwa Ikumi na gumoi 1, 2012)
