EISOMO LYA 55
Unga Omukono Enteko Yawe
Amaelufu g’enteko agali omu nsi yona, againa amamilioni g’abantu nibegashaniza ali Yehova omu byera. Omu kihika niba uunga omukono enteko omu ngeli zingi, n’okushemelerwa kutora ebiragiro n’enyorekelera. Isi, iwe waboyeboneire ekyo omu nteko yanyu?
1. Nobasa otai kukozesa akanya n’amani gawe kuunga omukono enteko?
Ichwe ichwena nitubasa kuunga omukono enteko. Obulebero nibwobu, isi, omu nteko yanyu alimu abantu abagurushize anga abarwaire? Isi, nobasa kubajuna kugoba aha nkiiko? Anga nobasa kubajuna omu ngeli ezindi, nk’okugya kubagulira ebintu anga kubajuna emilimo y’omunju? (Shoma Yakobo 1:27.) Kandi, nitubasa kweihayo kukora obusafi n’okwikazage enju yaitu y’Obukama. Taliho muntu alikutukaka kukora ebintu ebyo. Okugonza Katonda n’abarumuna baitu nikutwinegeza ‘kweihayo omu bweyendezi.’—Ezaburi 110:3.
Abajulizi ababatizibwe nibabasa kuunga omukono enteko omu ngeli ezindi. Barumuna baitu abaina engesho ezili kusaana nibabasa kuba bahereza, n’anzido kuba bagurusi. Barumuna baitu nibabasa kuunga omukono omu kihika omulimo gw’okurangilira omu kukora bali mapainia. Abajulizi abandi nibabasa kujuna kwombeka amaju ag’okwegashanizamu anga kufurukira omu nteko elikwetaga obujuni obundi.
2. Nitubasa tutai kukozesa amahela n’ebintu byaitu ebyo twinabyo kuunga omukono enteko?
Nitubasa ‘kukozesa eitunga lyaitu kukunira Yehova.’ (Emigani 3:9) Nitushemelerwa kugira eipendeleo ely’okugira emichango y’amahela n’ebintu ebindi ebyo twinabyo kuunga omukono enteko yaitu n’omulimo gw’okurangilira omu nsi yona. (Shoma 2 Abakorinto 9:7.) Kandi emichango yaitu nekozibwa kujuna omu kanya k’ebibundo. Bangi baina emimanyilire “yokubikao ekintu nanka” babase kugira emichango. (Shoma 1 Abakorinto 16:2.) Nitubasa kuteka emichango yaitu omasanduku g’emichango agali omu bichweka byaitu mbali tuli kwegashaniza anga kuraba omutandao omuli donate.pr418.com. Yehova atuhaire akashango akakwolekya nk’okwo nitumugonza kuraba okwo tulikuramura kukozesa ebintu byaitu ebyo twina byo.
MANYURUZA
Enjuza omanye ebintu nanka ebyo wakubasa kukora kuunga omukono enteko.
3. Nitubasa kukozesa ebintu byaitu ebyo twinabyo
Yehova na Yesu nibagonza abantu abali kugira emichango omu bweyendezi. Obulebero nibwobu, Yesu akasiima entumbwa kazi ayabaire ali munaku ayagizire omuchango ogwabaire guli guke muno. Shoma Luka 21:1-4, mushube mufumoreho ebibazo ebi:
-
Isi, nitwetaga kugira omuchango ogw’amahela gangi tubase kushemeleza Yehova?
-
Yehova na Yesu nibehulira batai orwo tulikugira emichango omu bweyendezi?
Obase kwega okwo emichango yaitu elikukozibwa, yolekya EVIDEO. Mushube mufumoreho ekibazo ekili kuhonderaho.
-
Emichango n’ekozibwa etai kujuna enteko ezili omu nsi yona?
4. Nitubasa kweihayo kujuna
Omakiro g’Ebibulia, abakozi ba Yehova bakaba nibakora emilimo omu kihika kwikazage mbali babaire nibakolera emyegashanizo. Kyonkai ekyo kikaba kikweteho bingi kushaaga kugira amahela gonkai. Shoma 2 Amakuru 34:9-11, mushube mufumoreho ekibazo eki:
-
Buli Mwisiraeli akajuna atai kwikazage enju ya Yehova anga mbali babaire nibegashaniza?
Obase kubona okwo Abajulizi ba Yehova bali kuhondera obulebero obwo, yolekya EVIDEO. Mushube mufumoreho ekibazo ekili kuhonderaho.
-
Kubaki kintu ky’omugasho kwikazage enju yaitu y’Obukama?
-
Iwe nobasa kujuna omuli ngeliki?
5. Barumuna baitu nibabasa kwekaza kugobera emiruka eshagireho
Amaandiko nigatamu omwoyo abashaija Abakirisito bekaze kukora bingi ebishagireho kuunga omukono enteko. Obase kubona obulebero, yolekya EVIDEO. Mushube muhorore ekibazo ekili kuhonderaho.
-
Omu video egi, Ryan akongera atai ekihikakye abase kuunga omukono enteko?
Ebibulia negamba engesho ez’abashaija balikwetaga kugobera basaane kuba bahereza anga bagurusi. Shoma 1 Timoteo 3:1-13, mushube mufumoreho ebibazo ebi:
-
Barumuna baitu abali kwegomba kuba bahereza anga bagurusi nibetagwa kuba baina ngeshoki?
-
Eka zabo nizetagwa kuba zina ngeshoki?—Leba orujuru rwa 4 n’orwa 11.
-
Orwo barumuna baitu bali kwekaza kugobera engesho ezo, buli omoi omu nteko nagoshoka atai?
RUNDI OMUNTU YAKUKUBAZA ATI: “Abajulizi ba Yehova nibaihya nkaa amahela agokugendeleza omulimo gwabo?”
-
Iwe wakumuhorora otai?
OMUBIGUFI
Yehova nasiima muno ekihika kyaitu ekyo kuunga omukono enteko, omu kukozesa akanya, amani, n’ebintu ebyo twinabyo.
Isi ebi wakubihorora otai?
-
Nitubasa tutai kukozesa akanya n’amani gaitu kuunga omukono enteko?
-
Nitubasa tutai kukozesa ebintu ebyo twinabyo kuunga omukono enteko?
-
Nibintuki eby’olikwenda kukozesa kuunga omukono enteko?
ENJUZA MUNO
Enjuza omanye kubaki kany’aka Katonda tatereireho bakozibe mateka ga kushashura kichweka kya ikumi (sehemu ya kumi).
“Ebibulia Negambaki Ekikwete aha Kushashura Ekichweka kya Ikumi?” (Emakala eli omutandao)
Yega omanye enshonga ey’okwekaza kugobera emiruka omu nteko.
“Isi, ‘Noyekaza Kugobera Emiruka omu Nteko’?” (Mnara wa Mlinzi, Omwezi gwa Mwenda 15, 2014)
Leba obone okwo Abajulizi nanka abaina obumanzi okwo bali kweihayo muno kutwalira abo balikwegashaniza nabo amachapisho.
Leba obone emichango elikujuna omulimo gwaitu okwo elikwahurana muno n’amashirika agandi ag’edini.
“Omulimo gw’Abajulizi ba Yehova Nigugendelezibwa Gutai?” (Emakala eli omutandao)
