EISOMO LYA 57
Kora Kora Entambara Esikiire Noyetagwa Kukoraki?
N’orwo olikugonza Yehova n’okwelinda kukora ekintu kyona kyona ekyakubasa kumutamisa, omu kanya akandi noija kushobya. Kyonkai, aliho entambara ezisikire kushaaga ezindi. (1 Abakorinto 6:9, 10) Kora kora entambara esikiire, oijuke nk’okwo Yehova akyakwenda; mwangu w’okukuganyira n’okukujuna.
1. Nitwetagwa kukoraki Yehova abase kutuganyira?
Balinya abali kugonza Yehova, nibashasha muno orwo balikumanya nk’okwo bakora entambara esikiire. Kyonkai nibamarwa marwa kuraba omu ndagano egi eyo Yehova alikuha abantube: “N’orwo muraba nimutukura tukutuku aha rw’amafu ganyu murayera nk’epamba.” (Isaya 1:18) Katurayechuza kwo kwo kwo, Yehova aratuganyira. Twakubasa kwechuza tutai? Nitujunara muno aha rw’enshonga y’entambara eyo twakora, niturekera kukora entambara, mara nitutagiliza muno Yehova atuganyire. Kandi, nitwekaza kuhindura ebitekelezo ebitalikugasha anga emyegendesheleze etutahize omu ntambara, n’okwekaza kutura omu kuhonderana n’amateka ga Yehova agali garungi.—Shoma Isaya 55:6, 7.
2. Yehova nakozesa atai abagurusi b’enteko kutujuna orwo tulikukora entambara?
Orwo tulikukora entambara esikiire, Yehova natugambira ati ‘tutumeho abagurusi b’enteko.’ (Shoma Yakobo 5:14, 15.) Abashaija abo abahairwe omuruka ogwo nibagonza Yehova n’entamaze. Bamanyizibwe okwo bakugarura obukwatane bwaitu ahali Yehova.—Abagalasia 6:1.
Abagurusi b’enteko nibatujuna batai orwo tulikukora etambara esikiire? Abagurusi babili anga bashatu nibatujuna omu kukozesa ebihandiko. Kandi, nibatushoborora n’okutuha obuhanuzi obuli kutugasha oburatujuna tutashuba kukora ntambara rundi. Omu kanya nanka rundi bakutulekeza kukora emiruka nanka ey’Ekikirisito, kugoba orwo ehali yaitu ey’ebyo omwoyo erabage. Orw’omuntu alikukora entambara esikiire akabura kwechuza, abagurusi b’enteko baramutenga n’obushirika atabasa kuhagaza bantu bandi omu nteko.
MANYURUZA
Yega omanye bingi obase kushobokerwa n’okusiima okwo Yehova alikutujuna orwo tulikukora entambara esikiire.
3. Okwechuza entambara zaitu nikutujuna kugarura obukwatane bwaitu ahali Yehova
Orwo tulikukora entambara yona yona nitushasa Yehova, kityo nitwetaga kwechuza ahali wenene. Shoma Ezaburi 32:1-5, mushube mufumoreho ekibazo eki:
-
Kubaki kintu kirungi kwechuza entambara zaitu ahali Yehova kushaaga kulengesa kuzisheleka?
Orwo tulikumara kwechuza entambara zaitu ahali Yehova, turayehulirage muno katurahiga obujuni kuruga omu bagurusi b’enteko. Yolekya EVIDEO, mushube mufumoreho ekibazo ekili kuhonderaho.
-
Omu video egi, abagurusi b’enteko bakajuna batai Canon agarukire Yehova?
Nitwetagwa kufumora n’abagurusi omu butasheleka mara omu bugorogoki orw’okuba nibenda kutujuna. Shoma Yakobo 5:16, mushube mufumoreho ekibazo eki:
-
Kubaki kyangu abagurusi b’enteko kutujuna orwo tulikwolekya obugorogoki?
Yechuze entambara zawe, obe mugorogoki omu bagurusi b’enteko, kandi oikilize obujuni bw’engonzi kuruga ahali Yehova
4. Omugasho gw’entekateka y’okutenga n’obushirika
Omuntu akozire entambara esikiire kalikwanga kuhondera amateka ga Yehova, talikwija kujuburwa kugendelera kwema hamoi n’enteko. Aratengwa n’obushirika, kandi titulikwija kwema nawe, nangu n’okufumora nawe chei. Shoma 1 Abakorinto 5:6, 11 na 2 Yohana 9-11, mushube mufumoreho ekibazo eki:
-
Nk’okwo eitumbyo litumbisa ensano yona ey’omukate, okwema hamoi n’omukozi w’entambara atali kwechuza nikubasa kuleteraki enteko?
Anzido bangi abalikutengwa n’obushirika, nibagaruka omu nteko. N’orwo omuhano ogwo bahairwe gwabaleteire amashasi, gukabajuna kushobokerwa obusikizi bw’entambara yabo. (Ezaburi 141:5) Yolekya EVIDEO, mushube mufumoreho ekibazo ekili kuhonderaho.
-
Omu video egi Sonja akagoshorwa atai entakateka y’okutenga n’obushirika?
Entekateka ey’okutenga n’obushirika . . .
-
neretera etai amakune eibara lya Yehova?
-
neyolekya etai nk’okwo Yehova aina engonzi n’obusawaziko?
5. Orwo tulikwechuza Yehova natuganyira
Yesu akachwa enfumo elikutujuna kushobokerwa okwo Yehova alikwehulira orw’omuntu alikwechuza. Shoma Luka 15:1-7, mushube mufumoreho ekibazo eki:
-
Ebaruro egi nekwegesaki ekikwete ahali Yehova?
Shoma Ezekieli 33:11, mushube mufumoreho ekibazo eki:
-
Nitubasa kwolekya tutai okwo twayechuza kwo kwo kwo?
Nk’omushumba, Yehova nayetaho muno entamaze
ABANTU BANDI NIBAGAMBA BATI: “Nintina kugambira abagurusi okwo nkozire entambara aha rw’enshonga ninyija kutengwa n’obushirika.”
-
Iwe nobasa kugambiraki omuntu alikutekeleza atyo?
OMUBIGUFI
Orwo tulikukora entambara esikire, Yehova aratuganyira katurayechuza kwo kwo kwo n’okuramura kulekera entambara.
Isi ebi wakubihorora otai?
-
Kubaki kintu kirungi kwechuza entambara zaitu ahali Yehova?
-
Nitwetagwa kukoraki tubase kuganyirwa entambara zaitu?
-
Kubaki nitwetagwa kuhiga obujuni omu bagurusi b’enteko orwo tulikukora entambara esikiire?
ENJUZA MUNO
Leba omanye okwo omushaija nanka yayeboneire ekisha kya Yehova nk’okwo kili kushobororwa omuli Isaya 1:18.
Entekateka ey’okutenga n’obushirika negoshora etai bona ab’ekweteho?
“Okutenga n’Obushirika Ntekateka Elikwolekya Engonzi” (Mnara wa Mlinzi, Omwezi gwa Kanai 15, 2015)
Yega omanye okwo wakubasa kushoborora omuntu atali Mujulizi wa Yehova entekateka y’okutenga n’obushirika.
“Isi, Abajulizi ba Yehova Nibeshumba Abantu Ababaire Bali omu Dini Yabo?” (Emakala eli omutandao)
Omu baruro elikubamba eti “Nketaga kugarukira Yehova,” yega omanye okwo omushaija ayabaire alekeire amazima kubaki nayehulira nk’okwo Yehova akamunyurura kugaruka.
“Ebibulia Nehindura Emikalire” (Mnara wa Mlinzi, Omwezi gwa Kanai 1, 2012)
