EISOMO LYA 59
Nobasa Kwegumisiliza orw’Olikugingizibwa
Abakirisito bona nibetegeleza nk’okwo nibaija kwemera amateso anga kugingizibwa. Isi, ekyo nikyetagwa kututinisa?
1. Kubaki nitutegeleza kugingizibwa?
Ebibulia negamba eti kabutekire: “Omu mazima bona abalikugonza Ruhanga omu burora bwabo bajwangaine na Yesu Kirisito baragingizibwaga.” (2 Timoteo 3:12) Yesu akagingizibwa aha rw’enshonga akaba atali wa nsi ya Sitani. Kwakwo na ichwe tituli ba nsi egi, kityo tituli kushoberwa orwo tulikugingizibwa n’eserikali z’abantu anga amashirika g’edini.—Yohana 15:18, 19.
2. Nitubasa tutai kwetekateka aha rw’enshonga y’okugingizibwa?
Aka niko kanya ako kwega kwesiga Yehova. Tekateka akanya ak’okushaba buli kiro n’okushoma ekigambokye. Okike enkiiko obutosha. Okukora ebintu ebyo kurakuha amani ago kwemera okugingizibwa omu kuba manzi, n’orwo kuraba nikuruga omu bantu beka yawe. Entumwa Paulo, ayagingizibwe omirundi mingi ekahandika eti: “Omukama niwe aba mujuni wange tinditina.”—Abaheburania 13:6.
Kityo nitubasa kugumisa obumanzi bwaitu omu kurangilira obutosha. Orwo tulikurangilira nitwega kwesiga Yehova n’okwelinda omutego gw’okutina abantu. (Emigani 29:25) Koragira obumanzi bw’okurangilira kany’aka, kiraba kyangu kugendelera kurangilira n’orwo serikali ziralengesa kututanga kurangilira.—1 Abatesalonika 2:2.
3. Nitugoshoka tutai orwo tuli kwegumisiliza okugingizibwa?
Omu butalengeshanyia, tituli kushemelerwa orwo tuli kugingizibwa, kyonkai katuli kwemera okugingizibwa, omwesigo gwaitu nigugumisibwa. Nitwihilira haiha ahali Yehova aha rw’enshonga nitwebonera okwo alikutujuna orwo tulikwehulira titwina mani gakugendelera kwegumisiliza. (Shoma Yakobo 1:2-4.) Yehova nashasha orwo alikubona nituteseka, kyonkai nashemelerwa orwo alikubona nitwegumisiliza. Ebibulia negamba eti: “Nawe kamulikukorage mukaba nirwo muterwa kyonkai mukegumisiliza, aho Ruhanga nabasiima.” (1 Petero 2:20, NWT) Katuragendelera kwegumisiliza omu bwesigwa, Yehova aratuha emperwa y’okutura omu nsi eirai lyona mbali turayema kumwegashanizaho tutaina muntu wakutugingiza.—Matayo 24:13.
MANYURUZA
Yega omanye okwo twakubasa kugendelera kuba mahika ahali Yehova orwo tulikwemera okugingizibwa, n’emigisha eyo turabona aha rw’enshonga y’okukora tutyo.
4. Nobasa kwegumisiliza okugingizibwa kuruga omu bantu beka yawe
Yesu akaba namanya nk’okwo abantu nanka omaka gaitu baralengesa kututanga kwegashaniza ahali Yehova. Shoma Matayo 10:34-36, mushube muhorore ekibazo eki:
-
Orwo muntu alikuramura kukolera Yehova abantu b’ekaye nibabasa kumukolera batai?
Obase kubona obulebero bw’ekintu ekyo, yolekya EVIDEO, mushube mufumoreho ekibazo ekili kuhonderaho.
-
Orakoraki k’omuntu w’eka anga munywanyi wawe aralengesa kukutanga kukolera Yehova?
Shoma Ezaburi 27:10 na Mariko 10:29, 30. Orwo muramara kushoma buli ihandiko, mufumoreho ekibazo eki:
-
Endagano egi nebasa etai kukujuna orw’olikwemera okugingizibwa kuruga omu bantu b’eka anga banywanyi bawe?
5. Gendelera kwegashaniza ahali Yehova n’orwo oragingizibwa
Nitwetaga kuba manzi orwo abantu abandi balikulengesa kututanga kukolera Yehova. Yolekya EVIDEO, mushube muhorore ekibazo ekili kuhonderaho.
-
Obulebero obwatairweho barumuna baitu n’abanyanyaichwe omu video egi bwakugumisa butai?
Shoma Ebikorwa 5:27-29 n’Abaheburania 10:24, 25. Orwo muramara kushoma buli ihandiko, mufumoreho ekibazo eki:
-
Kubaki kintu ky’omugasho muno kugendelera kwegashaniza ahali Yehova n’orwo serikali ziratutanga kurangilira anga kukika enkiiko?
6. Yehova arakujuna kwegumisiliza
Abajulizi ba Yehova abato n’abakuru abaina emirelerwe etali emoi nibagendelera kukolera Yehova omu bwesigwa n’orwo bali kugingizibwa. Obase kubona ekintu ekya bajunire, yolekya EVIDEO. Mushube mufumoreho ekibazo ekili kuhonderaho.
-
Omu video egi, nikihai ekyajunire Abajulizi aba kwegumisiliza?
Shoma Abaroma 8:35, 37-39 na Abafilipi 4:13. Orwo muramara kushoma buli ihandiko, mufumoreho ekibazo eki:
-
Ehiandiko eli nilikuha bwesigeki nk’okwo nobasa kwemera ekilengeso kyona kyona?
Shoma Matayo 5:10-12, mushube mufumoreho ekibazo eki:
-
Kubaki nobasa kugira ebyera n’orwo olikugingizibwa?
Amamilioni g’abakozi ba Yehova nibagendelera kumukolera omu bwesigwa n’orwo balikugingizibwa. Kwakwo naiwe nobasa
ABANTU ABANDI NIBAGAMBA BATI: “Inye tinakubasa kwegumisiliza orwo ndi kugingizibwa.”
-
Nimahandikoki agakubasa kujuna abantu abo kuba manzi?
OMUBIGUFI
Yehova nashemelerwa ekihika kyaitu ekyo kumukolera n’orwo tuli kugingizibwa. Ombujuni bwe, nitubasa kugendelera kwegumisiliza!
Isi ebi wakubuhorora otai?
-
Kubaki Abakirisito nibetagwa kutegereza nk’okwo baragingizibwa?
-
Kany’aka nobasa kwetekateka otai obase kwegumisiliza orw’oragingizibwa?
-
Nikihai ekyakubasa kukujuna ogire obwesige nk’okwo nobasa kugendelera kukolera Yehova n’orwo orayemera akilengeso kyona kyona?
ENJUZA MUNO
Leba obone murumuna waitu omusigazi alikushoborora okwo Yehova yamujunile orwo yafungirwe omu gereza aha rw’enshonga y’okutaunga mukono orubaju rwona rwona.
Leba obone ekintu ekyajunire abanya bushwere nanka bagendelere kukolera Yehova omu bwesigwa omu myaka mingi okwihamu okugingizibwa.
Yega omanye okwo wakubasa kwegumisiliza omu bumanzi.
“Yetekateke Kany’aka aha Rw’enshonga y’Okugingizibwa” (Mnara wa Mlinzi, Omwezi gwa Mushanju 2019)
Nitwetagwa kubona tutai okugingizibwa kuruga omu bantu b’eka, kandi nitubasa kugoshoka tutai omu kwemera ehali egyo?
“Amazima Nigaleta, ‘Okugingizibwa, ti Milembe’” (Mnara wa Mlinzi, Omwezi gwa Ikumi 2017)
