¡TEPƗKATEKUHAYEIKAWANI TEYUTAʼƗWIYATƗ!
Yeme haxa pɨreutiyɨxɨa 2022—¿Kehaine Yuútsi niukieya mɨkɨtsíe?
Witaari 2022 waɨkawa tepɨteʼumari haxa tiʼanenemetsíe, kuyaxá pɨyukatsutɨa, rayeʼatɨ́ patɨ́a metá pɨtsewiximarie takwie. Mɨɨtá, xeikɨ́a Yuútsi niukieya pɨraxaxaata títakɨ yamɨtiyɨane.
Yemekɨ kemɨranuyɨne kemɨtiuyɨ́ 2022
Kemɨtiuyɨ́ ʼikɨ witaari pɨtikuhekɨkɨata tepeuyeyɨ́a Biblia mɨtiuterɨwa «tuukaari mɨtixɨximenitsíe» (2 Timoteo 3:1). ʼIkɨ yetiyɨanetɨ pɨtiuyukatsutɨa 1914. Patsɨ́, tineuxeiya kemɨtiuyɨ́ witaaritsíe pɨrayeʼatɨwa kemutiuʼutɨarie Yuútsi niukieyatsíe:
«Kuyaxá» (Mateo 24:6).
«Witaari 2022, hutarieka Europa kwieyaritsíe kuyaxá pɨyukatsutɨa metá ʼaixɨ pɨkareutiyuriexɨa». a
Matsi waɨkawa pemɨretimanikɨ nakaterɨwa kemaine ʼɨkitɨarika «Rusia invade Ucrania».
«ʼIkwai pɨkumawiré» (Mateo 24:7).
«Witaari 2022, waɨkawa haka pɨtixuawerixɨ mɨkatiyɨwekai hepaɨ». b
Xɨka mɨkɨtsíe waɨká pereumaimɨkɨni nakaterɨwa ʼɨkitɨarika «Kuyaxá Ucrania mutawe pɨtikuyuruwa matsi waɨkawa haka muxuaweni kwiepatsíe».
«Kwiniyate» (Lucas 21:11).
«Kwiniya Polio titewatɨ tarieka pɨyukatsutɨa, viruela del mono haxa pɨreutiyuriexɨa metá kwiniya COVID-19 ʼakuxi haxa pɨtiyuriene. ʼIkɨ pɨtikuhekɨkɨata kemɨtatiukwinitɨawe kwiniyate metá teuteri mepɨkateheutamaiwawe memɨyuʼɨwiyani memɨkateʼutikukwinenikɨ». c
Matsi waɨká pemɨretimanikɨ nakaterɨwa ʼɨkitɨarika «Kwiniya COVID 6 millones pɨwarukwirí».
«Haxa tiʼanenetɨ metá timamariweme» (Lucas 21:11).
«Kwinié pɨtiukuxɨxɨre, haa pɨkuwauke, waɨkawa ʼɨkwari pɨxuawe metá pɨtiukuhautsitɨre. Taxari mɨtixuawerixɨ 2022 pɨkahatɨmaiyarieni kepaitsɨ́ haxa pɨtiuyɨ́ kwipatsíe, mepɨkwi meyuwaɨkawatɨ teuteri metá tsiere hiipatɨ yukí mepeuyehɨa. d
ʼIkɨtsíe xɨka matsi waɨkawa pereumaimɨkɨni nakaterɨwa ʼɨkitɨarika «Kwinié pɨtiukuxɨrixɨ naime kwiepatsíe mɨkatiyɨwekai hepaɨ».
«Haxa mepɨyɨakakekai» (Lucas 21:9).
Mɨkɨ pɨtiuyuri ʼiitsɨɨkatari wahetsɨa memɨhú memɨwaniukimanikɨ». e
Matsi waɨká pemɨramaikakɨ ʼikɨtsíe nakaterɨwa ʼɨkitɨarika «Tumini pɨkarayeʼaxerí naime kwiepatsíe».
¿Ketiyɨní witaari makamietsíe?
Nixewitɨ pɨkaramaté kemɨtiyɨní witaari 2023 . Mɨɨtá, hɨrixɨarí tepɨtehamaté yepauka Yuútsi ʼIitsɨɨkameya ʼaixɨ pɨtiyurieni naime kwiepatsíe (Daniel 2:44). Mɨkɨ ʼiitsɨɨkame pɨtikumaweriyá tita mɨtatiukaʼenitɨwa metá pɨtiyurieni tita Yuútsi mɨreuyehɨwá kwiepatsíe mɨrayeʼaní (Mateo 6:9, 10).
Tematsiʼinié Ketsuútsi mariʼitsikaya pemɨweiyanikɨ «peyutaʼɨwiyatɨ» metá penieretɨ kemɨrayuyeʼatɨwa kwiepatsíe Yuútsi niukieya kemaine (Marcos 13:37). Ximuxi, ketaneʼutɨiri, pemɨretimanikɨ kehepaɨ hiikɨ metiupareewiwe Biblia, ʼekɨ metá ʼanuiwari. Mɨpaɨ ʼaixɨ tiʼaneneme xemɨteʼanupinikɨ ʼuxaʼá warié.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
Xɨari ʼikɨtá metsiʼunakiwe
TIKUXAXAATSIWATƗ TAHEETSÍE
Tineutawawá pemaʼiwatsiemiekɨ
Tineutawawá pemaʼiwatsiemiekɨ pemɨtitixaatakɨ Yuútsi Niukieyatsíe xeime Jehová niukíeya xaxaatame hamatɨa nutsɨ tinayehɨniya tita ʼeena mɨtiwawié pekatiʼatuatɨ pemɨtiyutiʼɨkitɨanikɨ
