24 de mayo 2022, ʼaixɨ pɨkatiuyɨ́ kiekaritsíe Uvalde (Texas, Estados Unidos). Xapatsíe The New York Times pɨtiuʼutɨarie, «xewitɨ ʼukí pɨwarukwí 19 tɨɨrí metá tsiere hutame ʼuukari teʼɨkitamete […] ʼɨkitɨaripa primaria Robb».

 Waɨkawa puheiweriyɨkɨ yemɨtiyɨanekɨ tatuukaaritsíe. Xapa KUSA Today titewatɨ pɨtiuʼutɨa, xeikɨ́a Estados Unidos, «249 tuaxarikate pɨtixuawirixɨ ʼɨkitɨaripa witaari manukatɨatsíe, yamɨkatiyɨwekaitsíe ʼatinieretɨ 1970».

 ¿Títakɨ haxa tiyɨatɨne? ¿Tita tatiukanɨtɨawe kepauka mɨpaɨ mɨtikuyɨnetsíe? ¿Tukaari rayeʼaní haxa mɨtiʼane mɨtikumaweretsíe? Yuútsi niukieya ʼikɨ ʼiwaurikate pɨtiʼeiya.

•    Yuútsi niukieya paine «kwinatɨrieka temeuyeyɨakatsíe» yapɨtiyɨnikekai, waɨkawa teuteri mepɨtixuawerekekai «yunuiwarima mekawanakeʼerietɨ» metá tsiere «meʼayukwiwawietɨ»; teuteri haxa meteʼuʼiyaaritɨ mepakɨnekekai. Mɨkɨ teuteri matsi mepɨyehunikekai «yeme haxa meʼitɨtɨatɨ» (2 Timoteo 3:1-5, 13). Xɨka matsi waɨká pereumaimɨkɨni, nakaterɨwa mainetsíe «¿Predijo la Biblia cómo sería la gente en nuestros días?».

 Meyuwaɨkawatɨ teuteri mepɨteyukuʼiwawiya títakɨ Yuútsi ʼatsi katikuyuruwa kepauka haxa mɨranuyeyeikatsíe, tuaxari ʼɨkitɨaripatsíe hepaɨ. Pemɨretimanikɨ Yuútsi niukieya kemaine nakaterɨwa «¿Por qué le pasan cosas malas a la gente buena?».

•    «Naitɨ meripaitɨ mɨtiutiʼutɨarie, temɨtetiʼɨkitɨarienikɨ katiniutiʼutɨarieni, [...] ʼutɨarika xapayari tatsinɨtɨakaku yuri temɨteʼeriekakɨ tetaʼikwewatɨ» (Xumatari [Romanos] 15:4).

 ʼƗxaatsikate Yuútsi niukieyatsíe mayehú metsiʼupareewiwe pemɨranutaxeiyaxɨanikɨ haxa mɨtɨyɨatɨne kwiepatsíe. Xɨka waɨkawa pereumaimɨkɨni, nakaterɨwa, xapa ¡Despertad! reʼuxame «¿Acabará algún día la violencia?».

 Heiwa tɨɨrí mepɨkuxexeiyá televisión heetsíe haxa tiʼaneneme nutsɨ radiotsíe mepɨkuʼenakare, mɨkɨ pɨwarutimariutawe. Xɨka ʼekɨ tɨɨrí pewarexeiyani metá pereumaimɨkɨni kepemɨtiwapareewieni mɨkɨtsíe, kenakaterɨwa «El efecto de las noticias en los niños».

•    «Pɨwatixɨná kememɨtenanaimarietsíe metá haxa mɨtiyɨatɨnetsíe» (Salmo 72:14).

•    «Yuʼixiparate hatsarunite mepayeitɨaxɨani, meta yupitsikate ʼɨxa xikame mepayeitɨaxɨani. ʼAri nuiwarite mepɨkayukwitɨweniri, meta tawariri ʼimieri kuyaxa mieme mepɨkayutiʼɨkitɨani» (Mikeyaxi [Miqueas] 4:3).

 Teuteri memɨkateyuriewawe hepaɨ Yuútsi pɨtiyurieni. ʼIitsɨɨkameya, —mɨyuawitsíe makawe— pɨrautiparitɨani metá pɨkumaweriya naime haxa mɨtiyɨane. Xɨka matsi waɨká pereumaimɨkɨni kemɨtiyurieni Yuútsi ʼlitsɨɨkameya, nakaterɨwa maine «El Reino de Dios traerá ‘paz en abundancia’».