•   «China kwieyaritsíe kwinié pɨtiuxɨká, hiikɨ witaritá hairieka pɨhɨɨkɨ yamɨratiyɨximetsíe» (The Guardian, 7 de septiembre 2022).

•   «Tepɨtetakwewie mutiuyehanetsíe Gran Cuerno de África yaxeikɨ́a mɨtiuwakini, ʼauxuwime witaari mɨratiyɨxime hepaɨ» (Noticias ONU, 26 de agosto 2022).

•    «Dos tercios Europa kwieyari pukuwaxime mɨkatiyɨwe hepaɨ 500 witaari manuyemietsíe» (BBC News, 23 de agosto 2022).

 Meyuwaɨkawatɨ temaikate meputiyuane yapɨtiyeyɨximeni nutsɨ matsi kwinié tiukuwaɨketɨ payaní. ¿Tetekwewieka ʼaixɨ mɨtiyeyɨtɨyaní? ¿Kehaine Yuútsi niukieya mɨkɨtsíe?

 Yuútsi niukieyatsíe pakaʼuxakairí ʼipaɨ pɨtiyɨnikekai temuʼuwatsíe:

•   «Naitsarie pɨtiyexuawerirɨmeni haaka» (Lucas 21:11).

 Heiwa waɨkawa haaka pɨtixuxuawere mukuwauketsíe. ʼAyumié profecías Yuútsi niukieyatsíe mayehú pɨraxaxaata haaka kemɨtiuyuriwe: pɨtatiukwinitɨawe metá pɨtatsiʼukwiwé (Apocalipsis 6:6, 8).

 Yuútsi niukieya pɨtikuhekɨkɨata títakɨ yamɨtiyɨane. Mana paine:

•   «[Teuteri] meukayɨwawe memɨteʼanuyewauní yutuukaaritsíe» (Jeremías 10:23).

 ʼIkɨ panuyɨne teuteri ʼaixɨ mepɨkateʼanuyekɨné xɨka «meteʼanayewawani yutuukaaritsíe» nutsɨ yɨhɨkɨate memɨyunɨʼaka. ʼAyumieme tita memuteʼanuyewawa pɨtikuyuruwa haa mumaweni yakatixaɨ muwakini.

•   Meyuwaɨkawatɨ científicos mepaitɨká, teuteri kememɨteyurié pɨtikuyuruwa kwinié mɨtiuxɨkani. ʼAyumié waɨká pɨtiukuwauke naime kwiepatsíe.

•   Haa mɨkuxuawetɨká mɨʼiwiyarie pɨkawaxɨaxime. ¿Títakɨ? Kepaɨtsɨ́ teuteri waɨká tumini meheuʼiwakutɨ haxa mepɨteyeyuriexime, ʼayumieme waɨkawa ʼiteɨrite mepuwiteke, tsiere haa mepɨtsewixima mekayɨkɨʼɨwiyatɨ tseepá keane mɨtiwarukwinitɨawe.

 Mɨtá Yuútsi niukieya ʼaixɨ tiʼaneme pɨtaraxaxaatɨwa

 Biblia paine Yuútsi ʼaixɨ pɨreutiyuriexɨani haa kemɨtikawaximetsíe. ¿Kehepaɨ ʼiyurieni?

1.  1. Yuútsi «puwatayuniyá keane kwie memɨnanaima» (Apocalipsis 11:18). Pɨtikumawiriyá tita mɨtikuyuruwa haa mumawini: teuteri haxa memɨteʼuʼiyaari kwie xeikɨ́a memɨnanaima (2 Timoteo 3:1, 2).

2.  2. «Kwie muwakitsíe haa kanitixuawerimɨkɨ, mana ʼiteɨrite kanitinemɨkɨ» (Isaías 35:1, 6, 7). Yuútsi naime ʼaixɨ pɨtiyurieni metá kwie haaraweri payeitɨani, hikɨrixɨarí haa waɨkawa kanitixuawerimɨkɨ.

3.  3. «ʼEkɨ kwie pepɨʼɨwiya metá pepɨtikuyuruwa waɨká mɨtitineikani heetsiena» (Salmo 65:9). Yuútsi kwie ʼɨwiyatɨ mayanikɨ, waɨkawa ʼikwai pɨtitixuawere metá haa ʼaixɨ ʼanetɨ meyunaime waheetsíe pɨyeʼaní.