Julio 2022, kwinimié pɨtiukɨxɨrixɨ naime kwiepatsíe mɨkatiyɨwekai hepaɨ.

•   «70 kiekari mukumanetsíe China, pɨtiutaniukie hutarieka matsi waɨká pɨkuxɨrekekai mɨkɨ metseriyaritsíe» (25 de Julio 2022, servicio de noticias de la CNN).

•   «ʼƗkwarite Europa mɨtiyehane naime pauyehɨa tɨma, kwinié mɨtiuxɨkakaikɨ putaixɨa yɨkɨmana (17 de Julio 2022, The Guardian).

•   «Tumikuti, hiipatɨ kiekarite Estados Unidos mɨkumanetɨkatsíe waɨká pɨkuxɨrixɨ, yapɨtiuyɨ́ kepaitsɨ́ kwinié mɨtiuxɨkakɨ la costa este, sur medio metá Medio Oeste mɨtiyehane» (24 de Julio 2022, The New York Times).

 ¿Ranuyɨne kenaame uxaʼá warié kayɨwekaxɨani kwiepatsíe temɨtiyaxé? ¿Kehaine Biblia mɨkɨtsíe?

 Hɨ́, kemɨtiukɨxɨxɨre pɨtikunanake kemaine Biblia metá kemɨtiyɨnikekai temuʼuwatsíe. Kepaitsɨ́ Ketsuútsi putayɨ́ tepɨtexeiyakekai «haxa tiʼaneneme» metá «timamariweme» (Lucas 21:11; Biblia, de Serafín de Ausejo). Waɨkawa teuteri mepɨmama kwinié tiuxɨkatɨ́ mɨkatikuhaiyeikawakɨ metá mepɨmama metekuʼeriwatɨ kenaame teuteri kwie meheuyehɨaní.

 Waikɨ, Yuútsi kwie putawewi heyeme mana memɨtitenikɨ (Salmo 115:16; Eclesiastés 1:4). Mɨkɨ pɨkatipitɨani tewi kwie meuyehɨpani. Matsi pɨɨtá paine «pewatayuniyake keane kwie memɨnanaima» (Apocalipsis 11:18).

 Tihutame tepɨtexeiya matsi kemɨtiyurieni kwiekɨ:

•   «Muwakitsíe temawierika kanitixuawirimɨkɨ, mɨta tsiere yetapa mɨkatiuxuawiriwetsíe kanitaxutuimɨkɨ tuutú hepaɨ» (Isaías 35:1). Mɨkatiuxuawiriwetsíe Yuútsi ʼaixɨ pɨrakuyurieni mana memɨtitenikɨ metá naime ʼaixɨ pɨtiyurieni tita haxa mɨtiuʼitɨarie.

•   «ʼEkɨ kwie pepɨʼɨwiya metá ʼaixɨ raʼaneme waɨká pepɨtiutixuawiritɨwa» (Salmo 65:9). Yuútsi kwie haraweri witsiʼaneme payeitɨani.

 Matsi waɨká pemɨretimaanikɨ kehepaɨ tuukaarite mɨrayutiwaparɨme metá Bibliatsíe kemɨrayuyeʼatɨwa, nakaterɨwa «¿Qué dice la Biblia sobre el cambio climático y nuestro futuro?».

 Pemɨretimaanikɨ kemɨrayuyeʼatɨwa Bibliatsíe kemɨtiutaniukiekaikɨ tiyuyawaparɨmetɨ, nakaterɨwa «¿Quién salvará el planeta?».