Waɨkawa mɨkuxaxaatsiwakɨ kemɨreyɨatɨne Ucrania, hiipatɨ yeiyarikate waɨkawa teuteri mepɨwaʼinié memɨyukwiyukɨ. Patsɨ́ kememɨtiyuane hiipatɨ yeiyarikatetsíe memanuyehaitɨtɨa:

•    «Pamɨpariutsi tepɨtewarahɨawe meyunaime kuyaxi Ucrania heetsíe memɨnuakɨ [...]. Tapareewiya xepexeiya, metá xeheetsíe tepɨyutinenewiwa» (Metropolitano Epifanio I de Kiev , The Jerusalem Post, 16 de marzo de 2022).

•    «Weʼeme yeiyarikatsíe Ortodoxa, tumikutikɨ kuyaxi Rusiatari wahaamatɨa pɨyukuxeɨri, metá pɨwaruwaɨritɨa yukiekari heetsíe memɨtanuanikɨ mɨkɨ xeikɨ́a kememɨteheutamaiwawe hepaɨ. Mexi kuyaxi Moscú kiekatari meteyeweiya Ucrania meyukwitɨwetɨ» (Reuters, 3 abril de 2022).

 ¿Yuútsi memayexeiya kuyaxatsíe metepareewieka? ¿Kehaine Biblia mɨkɨtsíe?

 Yuútsi niukieya paine Ketsuútsi memɨweiya mepɨkatepareewie kuyaxatsíe.

•    «ʼA espada neukaʼuta, kepaitsɨ́ keane espadakɨ mɨtiyukumemiwa mɨkɨkɨ pɨmierieni» (Mateo 26:52).

   ¿Ketsuútsi heuʼenietɨ tiyɨane keane muyumiene kuyaxatsíe tipareewietɨ?

•    «Nepɨxetsiyetuirie xeime ʼaitɨarika hekwame: xepɨyunakeʼerieka; ne nemɨxetinakeʼerie hepaɨ, xeme tsiere yaxeikɨ́a xepɨteyunakeʼerieka. ʼIkɨtsíe yunaitɨ metenetimaikuni kenaame xeme xehɨɨkɨ netɨɨriyama, xɨka xeyunakeʼerieka» (Juan 13:34, 35).

   ¿Keane kuyaxá heetsíe mɨtipareewie nakeʼeriya tikuhekɨatá Ketsuútsi yutɨɨriyama mɨtiwarutahɨawixɨ hepaɨ?

 Matsi waɨká pemɨretimaanikɨ nakaterɨwa, «El cristianismo y la guerra: ¿son compatibles?».

 ¿Tiyɨwe hiikɨ Ketsuútsi meʼuweiyatɨ kuyaxatsíe memɨkatepareewieka? Hɨ́. Yuútsi niukieyatsíe pɨtiutaniukiekairí «tukaari mɨtixɨximenikekaitsíe» mepɨtixuawerekekai teuteri naitsarie kiekatari, «kuyaxatsíe timieme» mepɨkatepareewienikekairí, Ketsuútsi mɨtiuʼɨkitaxɨ hepaɨ (Isaías 2:2, 4, nota).

•    Matsi waɨká pemɨretimaanikɨ, nakaterɨwa Mɨtitaʼɨwiya mɨrayehutsíe «¿Qué piensa Dios de las guerras?».

 Kwitɨwa Jehová, a «Yuútsi ʼaixɨ mɨtiyumatɨwa», yuʼiitsɨɨkamekɨ mɨyuawitsíe makawe teuteri pɨwatawikweitsitɨani «memɨnanaimarie metá memɨkwiʼiwatɨwe» (Filipenses 4:9; Salmo 72:14).

•    Pemɨretimaanikɨ kemɨtiyurieni, neuxeiya video ¿Ketinɨʼatɨ Yuútsi payaaní?