ʼƗKITƗARIKA 07

¿Jehová ketiukaʼiyaari?

KETIANEMETSÍE NEMƗREUʼENIEMƗKƗ

Xɨka xewitɨ Jehová ʼutayɨní, ¿keʼane kepetikuʼeriwa? ¿Petimaaté waʼatɨ kwinié timariwe metá kwinié tewa tiuyeika, xɨrawetsixi kwinié tewa memuyetéi wahepaɨ? ¿Nutsɨ xeikɨ́a pepɨtikuʼeriwa kwinié pɨtitɨrɨkaɨye kemɨtiukaʼiyaaritsíe, mimierika hepaɨ? ¿Kamɨtsɨ́ keane yeme pɨhɨɨkɨ Jehová? Yuniuki, Bibliatsíe, Jehová yapɨtatikuhɨawe kemɨtiukaʼiyaari metá ʼaheetsíe mieme kemɨtikuʼeriwa.

1. ¿Titayari katiyɨwe Yuútsi temɨxeiya?

«Yuútsi pɨkayuhekɨa» (Juan 4:24). Jehová tahepaɨ pɨkareukuwewiya. Mɨkɨ pɨhɨɨkɨ tɨrɨkariya muyuawitsíe kayuhekɨatɨ, muwa tsiere temixeiya tepɨkayɨwawe.

2. ¿Hiipame tepɨxeiya Jehová kemɨtiukaʼiyaari?

Tseepá Jehová temɨkaxeiyawawe, teʼinakiʼerietɨ tepakɨniwawe xɨka teheitimaní, kepaitsɨ́ mɨkɨ ʼaixɨ pɨtiukaʼiyaari. Biblia paine: «Jehová pɨtinakeʼerie mɨtiheitserie metá pɨkawarukuʼeʼeiriwa keane yuʼiyaarikɨ meminakeʼerie» (Salmo 37:28). Tsiere «mɨkɨ yeme tsipɨʼitɨa metá pɨtiuyukanenimayá», matsi yeme waɨkawa keane memɨteʼukaʼeniwa waheetsíe (Santiago 5:11). «Keane waʼiyaari mɨtsatsani Jehová waʼaurié putiwe; pɨwarukuwikweitsitɨwa keane memɨkayunixɨaxime yeme mekaheuwawaɨretɨ» (Salmo 34:18). ¿Peramaikái kenaame Jehová teʼukatemawitɨawe yakatixaɨ teʼikaheiweritɨawe ketemɨtekuyuruwatsíe? Keane hepaɨtsitana haxa mɨtikuyuruwa, haxa pɨtikaʼeritɨwa kemɨtikuʼeriwatsíe (Salmo [Nɨawari] 78:40, 41). Keanetá ʼaixɨ mɨtikuyuruwa, waɨká pikatemawieritɨwa (nakaterɨwa Proverbios 27:11).

3. ¿Jehová ketatikuhekɨatsitɨwa kenaame tatsiheunakiʼerie?

Jehová yeme ʼaixɨ pɨtiukaʼiyaari pɨtiuyukanakiʼerie. Biblia paine: «Yuútsi pɨnakeʼeriya» (1 Juan 4:8). Bibliatsíe Jehová pɨtatikuhekɨatsitɨwa kemɨtareunakiʼerie metá tsiere naime tita mɨtiunetɨatsíe (nakaterɨwa Hechos 14:17). Paatsɨ́, neutiʼeriwani kemɨtatiuwewitsíe. Tatsiʼutiwewi colores witsiʼaneneeme texeiyawaweme, kwikari teʼeniwaweme metá ʼaixɨ mɨráʼane temɨtehaʼinɨnɨatanikɨ. Mɨkɨ pɨrekanake temɨyutemamawieka tatuukaaritsíe.

MATSI WAƗKÁ TINETIMAʼÍ

Tepɨtehetimaní Jehová pɨyɨwe tseepá kemɨtiuyuri. Tsiere kemɨtikuyuruwa temɨtekuxexeiyanikɨ kemɨtiukaʼiyaari.

4. Tɨrɨkariya mɨkayuhekɨ́a: Yuútsi pɨtipinieya mɨkatikuhayeikawa

Taame tamamatekɨ tepɨteʼuximaya, Jehová pɨtiutaʼuximayata yutɨrɨkariya mɨkayuhekɨakɨ. Biblia pɨkahaine kenaame Yuútsi tɨrɨkariyaya mɨkayuhekɨ́a tewi hɨɨkɨ, matsi pɨɨtá tɨrɨkariyaya pɨhɨɨkɨ naime mɨtiutiwewikɨ. Xenakaterɨwa Lucas 11:13 metá Hechos 2:17, metá xeteneutixaata ʼikɨtsíe:

Yuútsi yutɨrɨkariya mɨkayuhekɨ́a pɨwayetuiriwa keane memiwawirie. Kamɨtsɨ́, ¿ʼekɨ petikuʼeriwa kenaame Yuútsi tɨrɨkariyaya tewi hɨɨkɨ, nutsɨ pɨɨtá pɨhɨɨkɨ tɨrɨkariyaya katikuhayeikawatɨ? ¿Titayari yapetikuʼeriwa?

Jehová yutɨrɨkariya mɨkayuhekɨakɨ yeme witsitiʼaneneeme pɨtiutiwewi. Xenakaterɨwa Salmo 33:6 metá 2 Pedro 1:20, 21, metá xeteneutixaata ʼikɨtsíe:

¿Jehová yutɨrɨkariya mɨkayuhekɨakɨ keratiyuriexime?

5. Jehová kemɨtiukaʼiyaari pɨtatsinake

Moisés Yuútsi ʼayexeiyatɨ pɨkaʼikuʼeiri. Yatɨtɨ ʼakuxi, ʼaixɨ rekumaitɨ́ peuyeimɨkɨkai. ʼAyumié heiwa pɨtitahɨawixɨ: «Netineutaʼɨkitɨa ʼahuyé nemakumaikakɨ» (Éxodo 33:13). Jehová pitaʼei rexaxaatɨwatɨ kemɨtiukaʼiyaari. Xenakaterɨwa Éxodo 34:4-6 metá xeteneutixaata ʼikɨtsíe:

¿Jehová Moisés ketiutahɨawixɨ kemɨtiukaʼiyaaritsíe?
¿Kemɨtiukaʼiyaari Jehová heetsíe tita metinake?

6. Jehová peuyuʼiyaaritɨa teuteri waheetsíe

Meripaitɨ, Yuútsi kiekarieya waɨriyarika meteʼuximayatsitɨarietɨ mepakɨ́ Egipto. ¿Jehová kereuʼeriekai waxeiyatɨ yukiekari kememɨteʼukaʼeniwakai? Xeneuʼeni AUDIO metá xeneyexeiyarɨmeni, nutsɨ xenakaterɨwa Éxodo 3:1-10. Metá xeteneutixaata ʼikɨtsíe:

AUDIO: Jehová pɨreikwinixɨ kiekarieya memɨteʼukaʼeniwakaikɨ (2:45)

Jehová mɨreikukukwinekɨ wakuxexeiyatɨ teuteri meteʼukaʼeniwame, ¿mɨkɨ kemetikuʼɨkitɨwa? (Xeneuxeiya tsimɨpepe 7 metá 8).
¿ʼAumɨ́ Jehová teuteri yeme tiwareupareewimɨkɨ? ¿ʼAumɨ́ mɨpaɨ tiuyuriwe? ¿Titayari mɨpaɨ petikuʼeriwa?

7. Mɨtiwewiyatɨkatsíe tepɨtekuxexeiya Jehová kemɨtiukaʼiyaari

Jehová pɨtikuhekɨkɨata kemɨtiukaʼiyaari mɨtiunetɨatsíe. VIDEO xeneuxeiya. ʼAriketá xenakaterɨwa Romanos 1:20 metá xeteneutixaata ʼikɨtsíe: