ʼƗKITƗARIKA 09
Nenewierikakɨ Yuútsi hetsɨa hura pepayeiká
¿Petiyumaté ʼekɨ waʼatɨ pareewiya peureuyehɨwá ʼatuukaaritsíe? ¿ʼIwaurikate kwinié rayeʼatɨkaime ʼakuxi kayutiʼeiyarieweme perexeiya? ¿Pereuyehɨwá xewitɨ ʼatsikawaɨritɨani metá metsikanɨtɨatɨyaní? ¿Metiunakiwe Jehová ʼaurié hurawa pemuyeikani? Mɨkɨ tinaimetsíe nenewierika metsiupareewiwe. ¿Kehepaɨtá petiyukunenewiwani? ¿Yuútsi naime nenewierikate tikuʼeniwa? ¿Kehepaɨ perakumate kenaame naime ʼanenewierikate Yuútsi kuʼeniwa? Paatsɨ́ temɨtehetimaní.
1. ¿Keane hetsɨa tepuyutinenewiwani? ¿Tita teteʼutixaxaatani tanenewierikatetsíe?
Ketsuútsi pɨtiuʼɨkitaxɨ tapaapa taheimá makawe hetsɨa xeikɨ́a tepɨyunenewieka. Mɨkɨ tsiere Jehová hetsɨa xeikɨ́a puyutinenewiwakai. Heiwa ʼipaɨ putayɨ́: «Xemetsɨ mɨpaɨ xepɨteyukunenewiwani: ‘TaPaapa mɨyuawitsíe pemakawe...’» (Mateo 6:9). Jehová hetsɨa temuyutinenewiwatsíe waɨká teʼihamikutatɨ tepakɨká.
Tanenewierikatsíe tepɨyɨwawe tseepá tita temɨteʼitixatɨa. Xeikɨatá, xɨka teteheuyehɨaká Yuútsi mɨtatsitaʼeiyakɨ, tepɨkateʼiwawirieka tita mɨkatinake. Biblia paine: «Xɨka tixaɨtɨ teteʼitawawirieni kemɨtinake, pɨtatsiʼenié» (1 Juan [1 Wani] 5:14). Ketsuútsi pɨtiutaxá tita temɨteʼutawauwé tanenewierikatsíe timieme (nakaterɨwa Mateo 6:9-13). Kepauka taheetsíe temuyutinenewiwani, tsiere tepɨkatehatɨtɨmaiyani pamɨpariutsi teteʼikuhɨawetɨ kemɨtaratipareewieximekɨ metá teʼiwawirietɨ hiipame mɨwapareewiekakɨ.
2. ¿Kehepaɨ teteʼuyunenewiwani?
Biblia ʼipaɨ katatinahɨaweni: «ʼAʼiyaaritsíe ketineuyepiri kepauka hɨxiena [Yuútsi] pemuwe» (Salmo [Nɨawari] 62:8). Kamɨtsɨ́ tanenewierikatsíe yuri tepɨteʼitixaxaatɨwani taʼiyaaritsíe tita mɨratineika, tepuyutanenewiwe kwí teʼutiniutɨ metá tataɨtá xeikɨ́a, tsiere yateteukuʼutɨ Jehová kemɨrekanake. Tsiere, tseepá hakewa metá tseepá keʼupaukakaku.
3. ¿Yuútsi tanenewierikate ketikuʼeiya?
Yɨɨkɨ tiʼaneneemetsíe pɨtatsikuʼeiya. Yuniukitsíe, Biblia, waɨká mexɨa pɨtatsikuʼeiya. Xɨka Yuútsi niukieya teʼutiterɨwani keane «mɨkatimate timaiweme kanayeitɨwani» (Salmo 19:7; nakaterɨwa Santiago 1:5). Kepaukatá haxa temɨteʼanuyehunitsíe, Jehová ʼaixɨ pɨtatiukaʼeritɨawe. Tsiere pɨtikuyuruwa taʼiwama memɨtatsipareewieka kepauka pareewiya temeuyehɨakatsíe.
MATSI WAƗKÁ TINETIMAʼÍ
Tepɨtexeiya kehepaɨ temɨteyukunenewiwani Yuútsi minakenikɨ metá kehepaɨ mɨtatiupareewiwe.
4. Tixaɨtɨ pɨreuyewetsé Yuútsi hetsɨa pemuyutinenewiwanikɨ
¿Ketetekuyuruwani Yuútsi tanenewierika mɨkuʼeniwanikɨ? VIDEO xeneuxeiya.
Jehová pinake mɨkɨ hetsɨa xeikɨ́a temuyutinenewiwani. Xenakaterɨwa Salmo 65:2 metá xeteneutixaata ʼikɨtsíe:
-
Yuútsi nenewierikate tikuʼeniwa, ¿ʼekɨ petikuʼeriwa mɨkɨ hetsɨa pemɨyunenewieka? ¿Títakɨ yapetikuʼeriwa?
Xɨka teteheuyehɨaká Yuútsi tanenewierikate mɨkuʼeniwanikɨ, yatepɨteyurieka kemɨtatikuhɨawe. Xenakaterɨwa Miqueas 3:4 metá 1 Pedro 3:12, metá xeteneutixaata ʼikɨtsíe:
-
¿Kehepaɨ teteʼuyuriwe Yuútsi tanenewierikate mɨkuʼeniwanikɨ?
Xɨka meyuhutatɨ kuyaxi xaɨtsíe kiekatari Yuútsi pareewiya meʼutawawirieni. ¿ʼAumɨ́ Yuútsi wanenewierika tiuʼeniwe?
5. Tanenewierikate taʼiyaari taɨtá paitɨ patineikani
Hiipatɨ mepɨtekɨʼɨkitɨariwa kehepaɨ yunenewierikatetsíe yaxeikɨ́a memutiyuaneni. ¿Mɨkɨtá nenewierikate Yuútsi tinake? Xenakaterɨwa Mateo 6:7 metá xeteneutixaata ʼikɨtsíe:
-
¿Keteteʼuyuriwe yaxeikɨ́a temɨkaʼutiyuanenikɨ «yaxeikɨ́a tiʼaneneeme» temɨkateyexatarɨmenikɨ tanenewierikatetsíe?
Neutiʼeriwani tita ʼatuukaaritsíe witsimɨʼatiuyuri metá mɨkɨkɨ pamɨpariutsi Jehová tineutahɨawi. Xɨka xei tsemana mɨpaɨ petiuyurieni, ʼatahuta tipaɨmeme pepɨtitawauní ʼanenewierikatsíe yaxeikɨ́a katiʼaneneeme.
Nuariekate mepɨteheunakeʼerie waniwé yuʼiyaaritsíe kemɨtiyukuhɨawe mɨtiwakuxaxaatɨwani. Jehová tsiere pɨreuyehɨwá taʼiyaaritsíe paitɨ temuyutinenewiwani.
6. Nenewierika Yuútsi ʼimikierieya pɨhɨɨkɨ
¿Kehepaɨ nenewierika pɨtatiutatɨrɨkariyawe haxa temɨteʼanuyehunitsíe? VIDEO xeneuxeiya.
Biblia pɨtarahɨawe nenewierika ʼaixɨ pɨtatiukaʼeritɨawe tataɨtá. Xenakaterɨwa Filipenses 4:6, 7 metá xeteneutixaata ʼikɨtsíe:
-
Tseepá nenewierika naime ʼaixɨ mɨkarakayuruwa, ¿kehepaɨ tatikupareewiwa?
-
¿Tita heetsíe timieme pereuyunenewimɨkɨ?
¿Peramaikái?
Niuki mɨpaɨ pɨʼaneni (amén) panuyɨne «mɨpaɨ ketiuyɨní» yakatixaɨ «yurikɨ». Meripaitɨrí meputiyuanekai mɨpaɨ pɨʼaneni nenewierika manuhɨanitsíe (1 Crónicas [1 Kemɨtiuyɨ] 16:36).
7. Tuukaari kenanuyewawani pemuyutinenewiwanikɨ
Waɨkawa temɨteʼayexeiyakɨ ʼayumieme heiwa tepɨtehatɨtɨmaiya temuyutinenewiwani. ¿Ketsuútsi nenewierika heetsiena kerayeʼakakai? Xenakaterɨwa Mateo 14:23 metá Marcos 1:35, metá xeteneutixaata ʼikɨtsíe:
-
¿Ketsuútsi kehepaɨ tuukaari ranuyewawakai muyutinenewiwanikɨ?
-
¿ʼEkɨtá tuukaari keperanuyewauwé pemuyutinenewiwanikɨ?
HIIPATƗ KEMEMUTIYUANE: «Tseepá keane hetsɨa temuyutinenewiwa ʼaixɨ pɨʼane».
-
¿ʼEkɨ kepeʼutayɨwe?
TITA PEMƗRETIMÁ
Xɨka taʼiyaaritsíe paitɨ teʼuyutinenewiwani Yuútsi ʼaurié hurawa tepakɨká. Tsiere ʼaixɨ teteheuʼeriekame pɨtatsiʼayeitɨwa temɨteʼayeʼatɨwanikɨ tita mɨtiwawá Jehová taheetsíe.
Mɨrayeʼerieni
-
¿Keane hetsɨa tepuyutinenewiwani?
-
¿Kehepaɨ teteʼuyunenewiwani?
-
¿Kehepaɨ nenewierika tatikupareewiwa?
MATSI WAƗKÁ TINEUKAXEIYA
Tinetimaʼí hiipatɨ kememɨteʼukaxexeiya kememɨteyukuʼiwawiyakai nenewierikatsíe.
«ʼAtahuta ʼiwaurikate nenewierikatsíe mieme» (La Atalaya, 1 de octubre de 2010)
Tinakaterɨwa titakɨ kwinié mɨrayeʼaxé pemuyutinenewiwani metá kehepaɨ ʼaixɨ yeme pemɨtiuyunenewiwani.
«¿Títakɨ kwinié rayaʼaxé temuyutinenewiwani?» (Artículo de jw.org)
Tinetimaʼí Biblia kemɨtikuʼɨkita keane temɨwarutinenewiwani.
«¿ʼAixɨ tiʼane teteima metá kakaɨyarixi wahetsɨa temɨyutimaitsitɨwani?» (Artículo de jw.org)
ʼIkɨ video kwikarimakametsíe tinetimaʼí kewa metá kepauka temeyutanenewiwe.
