¿Heiwakɨa petiutaʼinierie Jehová niukieya memɨkuxaata waxeɨritsikatsíe? Xɨka heiwa pekaʼanuyeiweni, xɨari pepeumá matɨari pemɨmietsíe. Kauka petineuyuʼiwawiyawe: «¿Kemetehetiyuruwa Jehová niukieya xaxaatamete yuxeɨritsikatsíe? ¿Titayari waheetsíe mieme kwinié reuyewetsé? ¿Ne tsiere nereuyeiwé?». ʼIkɨ ʼɨkitɨarikatsíe pepɨretimaní xeɨritsikate pehetaʼaxetɨ kemɨʼatiutatɨrɨkariyawe, Yuútsi pemɨhamikutanikɨ metá ʼaheetsíe kemɨʼatiupareewiwe.

1. ¿Titayari meteʼuyukuxexeɨriwa?

Xewitɨ Yuútsi niukieya ʼutɨwame putayɨ́ titakɨ kwinié mɨrayeʼaxé memuyukuxexeɨriwani: «Yumɨiretɨ meyuxeɨriekaku Jehová heetsíe mieme ʼaixɨ nekanitayɨmɨkɨ» (Salmo [Nɨawari] 26:12). Hiikɨ tuukaarikɨ, yaxeikɨ́a tsiere Jehová niukieya memɨkuxaata mepuyukuxexeɨriwa, metá mɨkɨ waɨkawa pɨwatemawieritɨa. Naitsarie kwiepa, tsemana manukayeikatsíe mepuyukuxexeɨriwa Yuútsi meʼayexeiyatɨ, meputikwika metá mepuyutinenewiwa. Tsiere xei witaari manukayeikatsíe meyuwaɨkawatɨ mepuyukuxexeɨriwa.

2. ¿Tita peretimaní taxeɨritsikatetsíe?

Yuútsi niukieyatsíe tepɨteʼutixaxaata metá mana pɨrakaxaxaatsiwa ketɨtɨ mayetaine (nakaterɨwa Nehemías 8:8). Xɨka ʼekɨ peheuyaní, waɨkawa pepɨretimaní Jehová heetsíe metá kemɨtiukaʼiyaari. Xɨka matsi waɨká petimaiká kemereunakiʼerie waɨkawa hamikuya peheuyeimɨtɨ pepayeiwé. Tsiere pepɨretimaní mɨkɨ kemɨʼatiupareewiwe ʼatuukaaritsíe ʼaixɨ pemɨtiyemienikɨ (Isaías [Kitsariyaxi] 48:17, 18).

3. ¿Kemetipareewieni teuteri xeɨritsika pemɨwaretimaní?

Jehová pɨtarahɨawe: «Tepɨtewautɨweni kehepaɨ temɨteyupareewieni temɨyunakeʼeriekakɨ metá ʼaixɨ temɨteyuriekakɨ, tekwatekuhayeikawani teʼuyukuxexeɨriwatɨ» (Hebreos 10:24, 25). Xeɨritsikatsíe, teuteri pepɨwaretimaní kememɨteʼuyukanakiʼerie, mɨkɨ ʼahepaɨ tsiere waɨká mepɨteheumaiku Yuútsi heetsíe. Mana pepɨreʼenieni ʼaixɨ niuki Bibliatsíe timieme (nakaterɨwa Romanos 1:11, 12). Tsiere teuteri pepɨwaretimaní yɨɨkɨ tiʼaneneemetsíe memɨteʼuyekɨ metá kememɨteʼuyuri memɨtenewiekakɨ. Mɨpaɨ mɨtiʼanenekɨ Jehová pɨreuyehɨwá temɨkaheuyeweka taxeɨritsikatetsíe.

 MATSI WAƗKÁ TINETIMAʼÍ

4. Jehová niukieya memɨkuxaata waxeɨritsikate

Meri siglotsíe, Ketsuútsi tɨriyamama mepuyukuxexeɨriwakai Jehová heetsíe memɨtehetimanikɨ (Romanos 16:3-5). Xenakaterɨwa Colosenses 3:16 metá xeteneutixaata ʼikɨtsíe:

• ¿Ketsuútsi tɨriyamama Jehová kemeteʼayexeiyakai?

1. Taxeɨritsikatetsíe xaatsikate putixaxaatsiwa tsiere tepɨtekuhekɨkɨata ketemɨtekuʼɨkitani metá video teputixexeiya. Naitɨ pɨtiuyukatsutsutɨwa kwikarikɨ metá nenewierikakɨ tsieretá yaxeikɨ́a pɨranuyunɨtsa.

2. Hiipame mɨtitixatsienitsíe, keane memetaʼaxe yuniuki memɨyetuani mepɨyɨwawe.

3.   Meyunaitɨ mepeukɨniwawe: ʼuukitsi, ʼuukari, memeuyumaitɨká metá tɨɨrí…

4. Jehová niukieya memɨkuxaata waxeɨritsikatetsíe xewitɨ pɨkawiyarie. Yakatixaɨ kiitenie tumini pɨkawawié.

5. Pemɨyutɨrɨkariyani peuyewetsé xeɨritsika pemetaʼaxenikɨ

• ¿Titayari xeɨritsikatsíe tetehetaʼaxeni?

 TITA PEMƗRETIMÁ

Xeɨritsikatsíe pehetaʼaxetɨ matsi waɨkawa pepɨretimaní Jehová heetsíe, waɨká xemɨyuhamikutanikɨ metá hiipame wahaamatɨa pemeyexeiyanikɨ.

Mɨrayeʼerieni

• ¿Títakɨ Jehová tatiʼinié temuyukuxexeɨriwani?

• ¿Tita peretimaní Jehová niukieya memɨkuxaata waxeɨritsikatsíe?

• ¿Kehepaɨ tsiere ʼaumɨ́ metiupareewiwe xɨka xeɨritsika pehetaʼaxeni?