ʼIWAURIKA 1
¿Keane yeme nepɨhɨɨkɨ?
¿ʼEKƗ KEPETIUYURIWE?
Paatsɨ́ ʼikɨtsíe neutiʼeri: Karen yapɨreutewi rí ʼixɨararipa yeyeikatɨ, yapauka tá yuhamika puʼeni metá pɨrehɨawe:
«¿ʼAxaɨtá kepetiyuriene?»
Manakunierixɨtsíe mana niuweni hamikaya Jessica, huutame cerveza ʼahapatɨ. Xeime ʼixatɨatɨ pɨrehɨawe: «Peukanunutsi rí. Nanuʼieka pemɨʼakatemawienikɨ ¿pekatiyɨwe?».
Karen pɨkaʼiimɨkɨ kuxi tsimɨyumaatekɨ, tsiere peumaa kataku hamikaya tiuʼerieni kenaame kaʼinaake mɨyutemaawieka. Kepaitsɨ́ Jessica ʼaixɨ pɨtiukaʼiyaari xɨka ʼanuʼieni xɨari haxa pɨkaʼane. Pɨtikuʼeriwa: «Kutá xeime xeikɨ́a nepanuʼieni, kutá droga hepaɨ pɨkamayá».
Xɨka ʼekɨ Karen pehɨɨkɨtɨnike, ¿kepetiuyuriwekai?
NEWAKEKA NEUʼATIʼERIIXƗA
ʼAixɨ pemɨtiyurienikɨ ketinamaiká keane pemɨhɨɨkɨ. ʼIkɨ panuyɨne pemutiʼeriwani pemɨramaatetsíe ʼaixɨ mɨtiʼane metá titatsíe pemɨtiʼerie. Mɨpaɨ petiyurienetɨ pepɨyutaʼɨɨwiya metá pepɨyɨwekaxɨani ʼatuukaaritsíe kepemɨtiyurieni hiipatɨ yamekaʼatekuhɨawekaku (1 Corintios 9:26, 27).
¿Tita reuyewetsé mɨpaɨ pemɨtiyurienikɨ? Paatsɨ́ meri hiipame ʼiwaurikate temɨtiʼeiya.
1. ¿TITATSÍE WAƗKÁ NETIMAATE?
Xɨka peramaiká titatsíe waɨká pemɨtimaate metá ʼaixɨ peʼitɨaka ʼataɨtá paitɨ, pɨʼatsipareewieni ʼaheetsíe pemɨtiʼeriekakɨ.
BIBLIA KEMƗTIKUʼƗƗKITA: Nɨʼariwame Pablo pɨtiuʼutɨa: «Tseepá ne yeme waɨká nemɨkareutaxaatawe, riixɨ́a nepɨrakumaaté» (2 Corintios 11:6). Yuútsi Niukíeya mɨmaikaikɨ pɨtiunewi kepauka mutiniukimarietsíe. Yaranuyemietɨ pɨkatiuʼeri kenaame yuheetsíe tiʼerietɨ kaʼayaaní (2 Corintios 10:10; 11:5).
KENEUʼATIʼERIIXƗA: Tinakaʼutɨa tita ʼaixɨ pemɨreutayuriwe.
Hiikɨ tá tinakaʼutɨa tita ʼaixɨ pemɨtiukaʼiyaaritsíe. (Tatsɨrí, xɨka petiuyukanenimayaka, petiwaarini, perayeʼatɨwani metá yapauka peʼaaxeni).
2. ¿TITATSÍE WAƗKÁ NEKARAKUMAATE?
Xɨka kaunari ʼakapɨnini mana yapauka pakatekiwe, yaxeikɨ́a tsiere pepɨreuyehɨaní ʼataɨtá kepemɨʼitɨakai xɨka pekaretimaaní tita pemɨkarakumaikái.
BIBLIA KEMƗTIKUʼƗƗKITA: Pablo pɨtimaikái titatsíe waɨká mɨkarakumaikái. ʼAyumié pɨtiuʼutɨa: «Netaɨtá paitɨ kenemɨtiyukuhɨawe Yuútsi nɨʼarikateya yeme pinaake, mɨɨtá newaiyaritsíe xeime nɨʼarika nepexeiya kenemɨtiyukuhɨawe netaɨtá paitɨ hepaɨ katiyukuhɨaweme, mɨkɨ nɨʼarika pɨnetsihɨa newaiyari mɨʼixɨrikiyatsíe» (Romanos 7:22, 23).
KENEUʼATIʼERIIXƗA: ¿Tita ʼaixɨ petiukuyuriwe kuxi waɨká pemɨkarakumaatetsíe?
3. ¿KEHEPAƗ NEREUYURIMƗKƗ?
¿Kaxutsíe peʼanutiyerɨme tinɨʼawame petiutahɨawiwe kenaame kiekari warie ʼayeikani perehɨawetɨ ketiuhayewa gasolina ʼayexɨyuké? ¿Waʼatɨ ʼaixɨ mɨkaʼane? Metá, ¡tsiere waɨká pepɨtiuʼatuawe!
¿Tita peretimaiwé? Xɨka ʼatuukaaritsíe yɨɨkɨ pereuyuriemɨkɨni xeikɨ́a hauʼerietɨ peukaʼanakuyeikani. Matsi pɨɨtá pepɨramaiká hakewa pemeutɨ́a metá kepemɨtiyaaní.
BIBLIA KEMƗTIKUʼƗƗKITA: Pablo pɨtiuʼutɨa: «Hauʼerietɨ nepɨkaʼunautsarɨme» (1 Corintios 9:26) Pablo xeikɨ́a hauʼerietɨ pɨkaʼuyeikakai, matsi pɨɨtá pɨranuyewau kemɨtiyurienikekai metá yapɨtikamiekai mɨranukuʼaaxekɨ (Filipenses 3:12-14).
KENEUʼATIʼERIIXƗA: Tihaikame tinakaʼutɨa kepemɨreuyurimɨkɨ ʼikɨ wiitaaritsíe.
4. ¿TITATSÍE NETIʼERIE?
Xɨka peramaiká keane pemɨhɨɨkɨ, ʼiteɨri hepaɨ peʼanetɨ pepayaaní kwinié teewa mɨreukawiiya, tseepá kwinié mɨtiukuʼeeká pɨkaʼatihɨiyani.
Xɨka pekaramaiká titatsíe pemɨtiʼerie, yɨɨkɨ peukatiyurieni. Kepaitsɨ́ xeikɨ́a tita ʼahamikuma memɨteheuyehɨwa hepaɨ pepɨtikayaaní. Keane mɨpaɨ mɨtikuyuruwa pɨkaramaate keane mɨyɨane.
Xɨka tá yapetiyurieneni kepemɨtiʼakuhɨawe tseepá hiipatɨ yɨɨkɨ memɨtekuyuruwa pepɨkareuyehɨaní keane pemɨhɨɨkɨ.
BIBLIA KEMƗTIKUʼƗƗKITA: Xɨari Daniel kuxi pɨtemaikɨtɨkai yunuiwari kawaxeiyatɨ tewa mewitɨkietsíe. Yatɨtɨ, «yuʼiyaaritsíe paitɨ putayɨ́» kenaame kayukwiemanikeka Yuútsi ʼaitɨarikateya heuʼenietɨ (Daniel 1:8). Pɨkaratɨmai keane mɨhɨɨkɨtɨkai. Pɨrayaʼatɨa titatsíe mɨtiʼeriekai.
KENEUʼATIʼERIIXƗA: ¿Titatsíe petiʼerie? Paatsɨ́: ¿Yuutsitsíe petiʼerie? ¿Títakɨ? ¿Títakɨ ʼekɨ petikuʼeriwa kenaame Yuútsi ʼuyeika?
¿Petikuʼeriwa kenaame Yuútsi mariʼitsitɨarikateya metsiʼupareewiwe? ¿Titayari?
Kamɨtsɨ́, ¿xawari mɨkuʼenitɨariene hepaɨ nutsɨ kɨyé ʼeeká mɨtɨrɨkaɨye mɨkaʼetihɨpa hepaɨ? Xɨka kɨyé hepaɨ pereunewimɨkɨni peukatikuhayeikawani petikuhekɨatatɨ keane pemɨhɨɨkɨ. Mɨkɨ metsipareewieni ʼikɨ ʼiwaurika pemɨtaʼeiyakɨ: ¿Keane yeme nepɨhɨɨkɨ?
