Paatsɨ́ ʼikɨtsíe neutiʼeri: Miércoles putaikai rí, Geoffrey 17 wiitaari mexeiya, yuʼuximayatsika tiutinɨka rí pɨʼuxipie. Kepaitsɨ́ pɨrayeʼatɨa rí, ʼɨparitsíe watawiereka televisión putaiyaxɨ.

Yareutewikaku tá paapaya mana patané haxa rakaʼerietɨ.

Xɨka ʼekɨ Geoffrey pehɨɨkɨtɨnike, ¿kepetiuyuriwekai?

Xɨka huyetá petiunɨʼaximekaku ranutanaka, ʼauriena peʼukuyame pepɨyemié. Yaxeikɨ́a tsiere pɨtikuyɨne ʼapaapama wahaamatɨa pemɨtitaxaatakɨ yɨɨkɨ pepɨtiuyuriwe.

 ʼƗKƗ HEPAƗ:

Leah paine: «Mɨkanetsiʼenieka hepaɨ nepɨtinemaate». Nereutewitɨ rí netikuxaatakaku heiwa putaine: «¿Kepeʼutayɨ́?»

¿LEAH YUPAAPA KETIʼEIYA?

1. Yupaapa mɨtahiiwieni.

   Leah hehiiwiwatɨ pɨrehɨawe: «¡Yɨɨkɨ nemetitahɨawé! ¡Keneneuʼeni!».

2. Mɨkɨtsíe rí mɨkatitaxaatɨani.

   Leah yupaapa pɨkatiutaxaatɨa rí kemɨtiiyuriekai.

3. Nutsɨ ʼariké mɨtitaxaatɨani.

   Leah ʼariké yupaapa matɨa pɨtitixaata nutsɨ xapa pitaʼutɨirieni kemɨtiiyurié rexaxaatɨwatɨ.

¿Keane ʼaixɨ pɨʼane Leah heetsíe mieme?

TSIPATSƗ́: Paapaya tixaɨtsíe pɨɨtá pɨtiuʼerietɨyeika, ʼayumié tsipɨkaretimá mɨtiutaxaatɨarietsíe. Xɨka Leah A ʼanuyewaume ʼitahiiwieni, paapaya tsipɨkaretimaní títakɨ mɨrehiiwiwa. Xɨka mɨpaɨ tiuyurieni pɨkaʼenierieni. Tsiere ʼaixɨ pɨkaʼane yupaapa mɨpaɨ mɨtikuhɨaweni (Efesios 6:2). Xɨka ʼikɨ ʼanuyewauní tixaɨtsíe pɨkatiwapareewieni.

Pɨyɨwe B manayewauní, xeikɨ́a tá yeme ʼaixɨ pɨkakuyɨne. ¿Titayari? Leah mɨpareewiyanikɨ peuyewetsé yupaapa mɨtitaxaatɨani. Xɨka paapaya karamaiká mipareewieni pɨkayɨwe. Xɨka mekateʼutaxaata ʼaixɨ mepɨkateʼakayurieni.

Riixɨ́a xɨka Leah C ʼanuyewauní tseepá heiwa paapaya mɨkatikuʼeniwa, pɨyɨwekaxɨani ʼariké mɨtitaxaatɨani. Xɨka tá xapa ʼitaʼutɨirieni matsi ʼaixɨ pɨtikaʼeritɨani.

Xapatsíe Leah yupaapa naime yapɨtiutahɨawiwe kemɨreihɨawimɨkɨ. Mɨpaɨ paapaya pɨretimaní kemɨtiiyurié. Xɨka C meʼanuyewauní meyuhuutame waheetsíe mieme ʼaixɨ pɨʼane. Xɨka yunaitɨ meteʼutixaata yakatixaɨ xɨka xapa ʼitaʼutɨirieni ʼaixɨ pɨyɨní mepɨteʼayaʼatɨwa kemaine ʼeena «ʼaixɨ yari temɨyuxeiyanikɨ» (Romanos 14:19).

¿Leah tita matsi tiupareewiwe?

Xeimetsíe tineuti’eri metá xɨka mɨkɨ ranuyewauní kemɨtiuyɨwe.

Kenayeʼeriwani: Xɨka ʼapaapama yɨɨkɨ petiwarutahɨawé ʼahepaɨ mekwaʼatehetiʼenietɨkɨɨné.

ʼIKƗ HEPAƗ:

Tepɨteʼerieni kenaame ʼapaapama memetsihaʼiwawiya titayari petihaʼá, ʼekɨ tá petiwaruʼei: «Nekareuxaatamɨkɨ».

Mɨkɨ mepɨteuʼeriwe kenaame petikuʼeriwa «nepaapama meukanetsiʼupareewiwe nehamikuma xeikɨ́a nepɨtiwatixaatɨani yɨɨkɨ nemɨranuyemienitsíe».

Tepɨteʼerieni kenaame haxa tiʼanemetsíe petiuyemiekaku ʼapaapama meʼatsiheupareewikukaku petiwarahɨawe: «Tsixepɨkatehaʼeriwani nexaɨtá nepɨyɨwe».

• ¿ʼApaapama kemeteʼuʼeriwe?

• ¿Kepeʼutayɨwe ʼaixɨ pemɨtiwaʼeiyakɨ?