Paatsɨ́ ʼikɨtsíe neutiʼeri: Julia xikɨri hɨxie muyuxeitsíe puutayɨ́ kenaame kwinié tiwaiya. Pɨtiuʼeri «tsineheupetɨ nepeuyeimɨkɨ». Yatɨtɨtá hamikumaama metá paapamama meputiyuane kenaame «kwinié tiwaki».

Pɨreutewi rí Julia tiyukuhɨawetɨ tseepá kemɨtiuyuri yakɨ reuhanatɨ maayanikɨ. Xeikɨ́a yapaɨmexa tuukaari pɨyuhakieni pɨtiyukuhɨawe...

Xɨka Julia hepaɨ petiʼamaikake, ¿kepetiuyuriwekai?

Haxa pɨkaʼane pemeuyuʼiyaaritɨaka kepemɨtiyuhekɨatsíe. Biblia hiipame pɨwaraxaxaata ʼuukitsi metá ʼuukari witsimetetemarime tatsɨrí Sara, Raquel, José, David, metá Abigaíl. Tsiere paine kenaame xewitɨ ʼuká ʼuyeikakai Abisag titewatɨ «yeme witsititemaikɨtɨ» (1 Reyes 1:4).

Xeikɨ́a tá, waɨkawa teemari mepɨyuhɨawe ʼaixɨ memɨteyuhekɨkɨakakɨ. Xɨka mɨpaɨ xeikɨ́a metekuʼeriwani ʼaixɨ mepɨkaʼuyuyuriwe. ¿ʼIkɨtsíe peramaikái?

• Temaikate meteʼutiwauka meputiyua kenaame 58% ʼuukari kwinié meteheuhanakai, xeikɨ́a tá 17% pɨtiyuritɨkai.

• Tsiere hiipatɨ ʼuukari mekawaiyatɨkaitɨ́ memutiʼiwawiyarietsíe 45% mepaitɨkatei kenaame kwinié metewaiyatɨkatei.

• Hiipatɨ ʼɨimarixi tsimemeupepenikɨ mepɨyukuhakiwa, mɨkɨ pɨtiwarukwinitɨawe tatsɨrí Anorexia. Mɨkɨ pɨtikuyuruwa yuʼikwai memɨtekuhayeikawani xɨka mɨpaɨ meyɨaka mepukwiwawe.

 Xɨka ʼekɨ mɨpaɨ metiyurieka pareewiya keneutawawá. ʼApaapama mɨpaɨ ketiniwarutahɨawi yakatixaɨ xeime yumaikame. Yuútsi Niukíeya paine: «Keane yeme hamiku mɨhɨɨkɨ tseepá kepauka pɨtiuyukanaakeʼerie metá taʼiwá pɨhɨɨkɨ yeme ʼiyaaritɨarika tsaata» (Proverbios 17:17).

Matsi yeme ʼaixɨ teʼaneneeme tatsiʼayeitɨwa xɨka tataɨtá paitɨ ʼaixɨ teteyukuhɨaweni. Paatsɨ́ neuyuʼɨɨwiya Yuútsi Niukíeya kemaine Absalóntsie David nuʼaya:

«Xewitɨ ʼukí Israel pɨkaʼuyeikakai yeme witsititemaikɨtɨ. [...] Yuheimá paitɨ ʼakayunetɨ yuhetɨ́a paitɨ naitɨ tsipɨtiyuhekɨakai» (2 Samuel 14:25).

Xeikɨ́a tá kwinié pɨtiuyutaʼɨrekai, puyutaweʼetakai metá pɨtiuyukuʼeʼeiriwakai. ʼAyumieme ʼaixɨ pɨkatikuxaxaatsiwa Yuútsi Niukieyatsíe, paine kenaame tiuyukuʼeʼeiriwakai, hiipame waheekatɨ pɨwatakukuyakai.

ʼAyumieme Yuútsi Niukíeya pɨtatikuʼɨxatsitɨwa:

«Tewi hekwatɨ xenayuyeitɨa» (Colosenses 3:10).

«Heerié xeikɨ́a xemɨteʼanakapine xepɨkatehekɨatani [...] matsi pɨɨtá xeketenehekɨatani yuʼiyaaritsíe kexemɨʼanene» (1 Pedro 3:3, 4).

Haxa pɨkaʼane ʼaixɨ pemɨreʼakemaritɨaka, matsi pɨɨtá ʼaixɨ pɨʼane xɨka ʼataɨtá paitɨ ʼaixɨ petiukaʼiyaarini. Reumietɨ pepetimaatiwá kepemɨtiukaʼiyaari xeikɨ́a meukayuʼɨɨwiya kepemɨtiyuhekɨatsíe, xewitɨ ʼɨimari Phylicia titewatɨ paine: «Xɨka heerié tsipetiʼahekɨaka yapauka pepɨxeiyarieni, mɨɨtá teuteri xeikɨ́a meʼatsiʼayeʼerieni xɨka ʼataɨtá paitɨ ʼaixɨ petiukaʼiyaarini».

¿Metinaake kepemɨtiyuhekɨ́a?

¿Doctor hetsɨa petiuyutaʼaitawe petaxitekieme ʼaixɨ pemɨtiyuhekɨakakɨ?

¿Tita ʼaheetsíe petiuwapawe?

• KEPEMUTEWI

• KEPEMƗRAHETÉ

• ʼAKƗPÁ

• KEPEMEUPÉ

• ʼAHƗXIE

• KEPEMAYEʼANE

Xɨka huutametsíe «hɨ» peʼutayɨní metá xɨka haikame peʼanuyewauní nutsɨ waɨká, ʼikɨtsíe keneutiʼeri: Xɨari pemɨtiʼaxeiya hepaɨ hiipatɨ meukaʼatexeiya. Xeikɨ́a tá heiwa waɨká tepɨteyuwawirie teheuyuʼiyaaritɨatɨ ʼaixɨ temɨtexeiyariekakɨ (1 Samuel 16:7).