ʼIWAURIKA 9
¿Yuri netiʼerieka kenaame yeutari waheetsíe teʼayenexɨa?
¿ʼEKƗ KEPETIUYURIWE?
Paatsɨ́ ʼikɨtsíe neutiʼeri: Alex pɨkaramaaté titatsíe yuri mɨtitaʼerieni. Mɨkɨ meripaitɨ rí pɨramaaté kenaame Yuútsi naime tiutiwewi. Hiikɨ tá tiʼɨɨkitame pɨtikuhɨawe kenaame yeutari waheetsíe temayenexɨa tiyuri. Alex yuʼiwama pɨkatiwareuʼeritɨamɨkɨ kenaame ʼuʼerie. «Kutá temaikate meputiyuane kenaame yeutari waheetsíe teʼayenexɨa, ʼayumié ʼaixɨ pɨkaʼane mutaineni kenaame ʼaixɨ mekatekuʼɨɨkita».
Xɨka ʼekɨ Alex pehɨɨkɨtɨnike, ¿yuri petiutaʼeriwe kenaame yeutari waheetsíe teʼayenexɨa, xeikɨ́a ʼetsikwera mɨpaɨ memɨtekuʼɨɨkitɨariwakɨ?
NEWAKEKA NEUʼATIʼERIIXƗA
Xɨka hiipatɨ meutiʼiwawiyarieni yapauka meputiyuane kenaame yeutari waheetsíe teʼayenexɨa nutsɨ kenaame teʼunetɨarie, riixɨ́a tá mepɨkateʼakumaate títakɨ yamemɨteyukuhɨawe.
-
Hiipatɨ mepɨteʼerie kenaame teʼunetɨarie xeikɨ́a mɨpaɨ teyupanie memɨteʼuʼɨɨkitɨariekɨ.
-
Hiipatɨ tá mepɨteʼerie kenaame yeutari waheetsíe teʼayenexɨa, mɨpaɨ memɨteʼuʼɨɨkitɨariekɨ yuʼetsikwera.
ʼIPAƗ KETINEʼAKUʼIWAWIYANI
Yuútsi Niukíeya paine: «Pɨtiyuri, kí pɨxuawe xewitɨ ʼitiwewieku, keane tá naime mɨtiutiwewi Yuútsi pɨhɨɨkɨ» (Hebreos 3:4). ¿ʼAixɨ rekuyɨne ʼikɨ ʼɨɨkitɨarika?
ʼIkɨ kí yuxaɨtá pɨkaʼuyutawewi, ʼayumieme puʼerie keane mɨtiyukuhɨawe kenaame naime Mɨtiutiwewi kaʼuyeika.
KEMƗTIKUNIUWA: Tita naitɨ mɨtixuawe mɨyuawitsíe yapɨtiʼane reutanexɨaku mɨtiutatekixɨtsíe, mɨkɨ pɨtitewá Big Bang.
1. ¿Keane nutsɨ tita tiuyuri Big Bang mutatekixɨ?
2. Tita matsi ʼaixɨ tiʼane: ¿Kenaame yuxaɨtá tiuné nutsɨ xewitɨ tiutiwewieku pɨtiuné?
KEMƗTIKUNIUWA: Teuteri yeutari waheetsíe tepayenexɨa.
3. Xɨka teuteri yeutari waheetsíe teʼayenexɨani, ¿kamɨtsɨ́ títakɨ taame matsi waɨkawa teteʼakumaate?
4. ¿Titayari naitɨ tsimemɨtepepe tixaɨtɨ katiwareuyehɨwá metá matsi yeme ʼaixɨ meteheukuwewiyatɨká?
KEMƗTIKUNIUWA: Temaikate meputiyuane kenaame yeutari waheetsíe teʼayenexɨa.
5. ¿Keane yamɨtiuʼɨɨkitaxɨ yeme yuxaɨtá tiutiwauka yatiutayɨ́?
6. ¿Kemeyupaɨmetɨ mepɨtekuʼeriwa kenaame yeutari waheetsíe teʼayenexɨa xeikɨ́a temaikate mɨpaɨ memɨtekuʼɨɨkitakɨ?
«Tineuʼeri waʼatɨ hukú tsata peʼumietɨ kí witsiʼaneme petiukaxéi kɨyekɨ wewiyaakame. Xɨari pepɨkatiuʼeriwe: ¡Tsipɨʼane! Xɨari ʼeena hukú ʼukaxɨrieka kí puyutawewi. Kwaheyutiʼenierietɨyeika. Kamɨtsɨ́, ¿ʼaixɨ tiʼane temɨteyukuhɨaweni kenaame yuxaɨtá tiuné?» (Julia).
«Xɨka xewitɨ metiutahɨawé kenaame xapate mɨwawewiyatsíe, pintura hetatekeku xewitɨ diccionario heyutawewi, ¿yuri petitaʼeriiriewe?» (Gwen).
¿TÍTAKƗ YUUTSITSÍE YURI TETEʼERIEKA?
Yuútsi Niukíeya metikuʼɨɨkitɨwa kenaame peʼutiʼeriwani kepemɨtiyurienitsíe (Romanos 12:1). ʼIkɨ panuyɨne kenaame xeikɨ́a yuri pekatiʼerieka, tatsɨrí:
-
KEPEMƗTIYUKUHƗAWEKƗ: «Netaɨtá paitɨ nepɨtiyukuhɨawe kenaame xewitɨ kwinié titɨrɨkaɨyetɨ ʼuyeika».
-
HIIPATƗ KEMEMƗTEKUʼERIWAKƗ: «Keane wahaamatɨa nemuyeika Yuútsi mepayexeiya».
-
WAƗRIYARIKA XEWITƗ METSIPITƗAKƗ: «Nepapaama menetekuhɨawe Yuútsi nepayexeiyani. Tseepá yanemɨkaraʼeriwa».
Yapemɨtikuhɨawarɨwakɨ xeikɨ́a yuri peukatiʼerieka, matsi pɨɨta ketinamaiká títakɨ mɨkɨtsíe pemɨtiʼerie.
«Tiʼɨɨkitame mɨtatikuhɨawetsíe ketemɨteheukuwewiyatɨká, mɨkɨ yuri pɨnetiutaʼeritɨwa kenaame Yuútsi ʼuyeika. Tseepá tsitipepeme temɨtehexeiya waɨká pɨreuyewetɨká. Tekwatemaate tataɨtá kemɨreyɨane temayenenierenikɨ. ¡Yeme ʼaixɨ pɨreukuwewiya!» (Teresa).
«Nemɨtikuxexeiyatsíe kí kwinié ʼutɨtɨme kanuuwa yakatixaɨ kaxu nepɨyukuʼiwawiya: ¿Keane pitawewi? Tsipatsɨ́, peuyewetsé xewitɨ kwinié reutamaiwetɨ kaxu mɨtawewienikɨ kepaitsɨ́ yutaɨtá kwinié tipaɨmeme pɨrexeiya tsitipepeme, mɨkɨ naitɨ ʼaixɨ pɨreukupitɨká mɨkuyeikanikɨ. ʼAyumieme xewitɨ kaxu mɨtiuwewi hepaɨ yaxeikɨ́a tsiere tewi xewitɨ pitawewi» (Richard).
«Matsi waɨká nemɨretimaamatekaitsíe ʼetsikwera waɨkawa yuri nekatiʼerietɨ rí nepatɨ́a kenaame yeutari waheetsíe tekaʼayenexɨa» (Anthony). Tsiere putayɨ́ kenaame yapauka mɨtiuʼerieni yɨwe kenaame xewitɨ tatsiʼutiwewi.
¿ʼIKƗ PERAMAIKÁI?
Tseepá temaikate kwinié memɨteheutewi metewautɨwetɨ, yaxeikɨ́a meukatekuʼɨɨkita ketemɨteʼanexɨatsíe timieme. Xɨka temaikatetɨtɨ yaxeikɨ́a mekatekuʼɨɨkitani metá kenaame meteʼakumaate meʼutiyuatɨ, ¿kamɨtsɨ́ haxa tiʼane pemɨtikuʼiwawani xɨka yuri metekuʼɨɨkitani?
