Paatsɨ́ ʼikɨtsíe neutiʼeri: David tiunɨʼaximetɨ xaɨtsíe pɨyeʼa yɨɨkɨ tiuʼanekaku. Kepauka Calle metá kí meutiʼukai muxeitsíe pɨretimá kenaame xaɨtsíe yɨanekai. Peuyewe. Yakaraʼeriwatɨ xeime pɨɨtá huyé kwananukuwéi.

Xɨka ʼekɨ David pehɨɨkɨtɨnike, ¿kepetiuyuriwekai?

Tihaikame pepɨranuyewauwé:

1. Peputaʼiwauwe pemɨtaʼanikɨ kewa pemeutɨ́a.

2. Pepitiwauwé mapatsíe.

3. Pepɨtiunɨʼaximeni peraʼeriwatɨ kenaame huyé pekaxeiya.

Pepɨramaate xɨka C peʼanuyewauní ʼaixɨ pɨkayɨní.

A metá B ʼaixɨ pɨʼanene, riixɨ́a tá B matsi waɨká metsiʼupareewiwe: Kepaitsɨ́ mapa pɨʼatsiyewitɨtɨyaní naime ʼahuyetá.

Yuútsi Niukíeya tsiere mɨpaɨ metiupareewiwe.

Xapa waɨkawa mɨyunané pɨyɨwe:

• Mɨʼatsipareewieni haxa pemɨranuyemienitsíe.

• Mɨʼatsipareewieni pemeyutimaanikɨ metá ʼaixɨ pemɨʼitɨakakɨ.

• Mɨʼatsipareewieni ʼatuukaaritsíe ʼaixɨ pemɨreumienikɨ.

Kepauka teniuwawetɨ temakɨkatsíe, teʼutiʼiwawatɨ tepakɨɨká.

• ¿Keane mɨyuawi puneetɨa?

• ¿Xurawetsixi títakɨ tiwewiyatɨká?

Teyumaatetɨ temakɨɨkatsíe tá ʼipaɨ tepɨteyukuʼiwawiya.

• ¿Títakɨ haxa teteʼanuyekɨɨká?

• ¿Títakɨ tetetakukuwe?

¿Peramaikái kenaame ʼeiyarikate rayemié Yuútsi Niukieyatsíe?

Waɨkawa teuteri meputiyuane kenaame Bibliatsíe rayemié xaatsikate xeikɨ́a katiyuritɨ nutsɨ kenaame teuteri waxapa hɨɨkɨ xeikɨ́a nutsɨ kenaame kayɨwe temeitiʼenietɨkɨɨné. Mɨɨtá ¿tiyuri? ¿Tiyuri teuteri kememutiyuane Bibliatsíe? ¿ʼAumɨ́ xewitɨ tiwaruʼitaiyaku yemeteyukuhɨawe?

Hiipatɨ meteyukuhɨawe kenaame Biblia haine Yuútsi katininɨʼaka kwieepa. Mɨɨtá ¿ʼekɨ kepetiʼakuhɨawe? Kwieepatsíe yeme ʼaixɨ kwatiyɨane. Naitsarie tepɨwaxeiya teuteri meteʼukaʼeniwame, kwiniyate metá meyunaitɨ mepɨyekwixime, haxa pɨtiyɨatɨne. ¿Yuútsi tiuyukanaakeʼerietɨ mɨpaɨ tiʼaneneme taheetsíe tiyaʼatɨwa?

¿Pereumaimɨkɨ keane mɨtinɨʼa ʼeena kwieepa? Biblia ʼeiyarikaya ʼaixɨ metikaʼeritɨani.

Pepɨretima rí kenaame mariʼitsitɨarikate ʼikɨ xapatsíe mayehú naitɨ ʼanayahapanie Yuútsi Niukieyatsíe. Jehová Niukíeya memɨkuxaata mepɨteʼerie kenaame Yuútsi Niukíeya waruwitɨxime. Mainekɨ «Yuútsi ʼineetɨaku yapɨreʼuxa, mɨtatikuʼɨɨkitɨwanikɨ, yamɨtatikuhɨawenikɨ tita haxa mɨtiʼane, tatikuʼɨɨkitɨwatɨ tita ʼaixɨ mɨtiʼane» (2 Timoteo 3:16, 17). ʼIkɨ xapa tseepá meripai mɨmieme hiikɨ tsiere pɨʼatsipareewiwe.